Read lunyole Ohuhwehula 19 Bible Online

Ohuhwehula 19 - lunyole bible

Ohuhwehula 19

¹“Ebyo ni byaŋwa nga pulira oti hani majanjaasi gʼehiŋindi hyʼabaatu ni gaŋwera mwigulu. Abaatu abo baali bemba nʼejanjaasi eryʼamaani baati, “Hujumirye Hatonda! Hatonda omwene buŋangi era owʼeŋono atunoŋooye,

²olwohuba asala emisango nʼatehubbira. Olwʼehyo asaliiye abaatu bomu mu hibuga ehyo ehibbala omusango, olwʼohubbaamya abaatu boosi hu hyalo bajumirya ebiitu ebitali Hatonda. Baaba hyʼomuhasi omuhwedi owonoona abaatu mu hyalo nʼahola ni nabo obuhwedi. Abasasuuye olwʼohwita abaŋeeresa babe.”

³Nga nindi bameedaho baati, “Hujumirye Hatonda! Eriisi lyʼohunya hwahyo ko liduunya emirembe nʼemirembe.”

⁴Ngʼaŋo abasaaja abahulu bala abiri nabane ko nʼebiramu bira ebine bihubba amafuha bijumirya Hatonda owaali ni gehaaye hu tebe yiye eyʼobuŋugi ni bemba baati, “Cʼehyo ehyene nʼehyene, Hujumirye Hatonda!”

⁵Ngʼaŋo ejanjaasi liŋwera mu tebe yʼobuŋugi ni ŋaliŋo aloma ati, “Mujumirye Hatonda, enywe mwesimwesi abaŋeeresa babe, enywe mwesimwesi abamuŋa eŋono, abegingihiriri nʼabaŋaasi!”

⁶Ngʼaŋo nindi pulira ejanjaasi eryali oti hani lyʼehiŋindi hyʼabaatu ni lifuga oti hani mwoluumo gwʼamaaji agʼomubando aŋandi oti hani hubbwabbwanuha hwʼeraadu abaatu abo ni bahayaana baati, “Hujumirye Hatonda! Olwohuba Hatonda weefe oyo omwene buŋangi njʼaŋuga.

⁷Leha husaŋalye era hwejage era humuŋe eŋono! Olwohuba ngʼolu omusinde bamuŋimba nʼomuhasi wuwe omweŋa, hino njʼehiseera ehya Yesu ali hyʼEtaama Etusaŋo Ebibi, ohweŋimba nʼabaatu babe, olwohuba bahenire ohwetegeha.

⁸Hatonda ahenire ohubagwalaasa, era bali hyʼomugole oyu bambahiise ebyambalo ebiŋoono ebya laasi ebimeregenya.” (Ebyambalo ebya laasi biri mu hifaananyi hyʼebikolwa ebigwalaafu ebi baatu abo baholanga.)

⁹Ngʼaŋo malayika oyu nali ni naye gandoma ati, “Ŋandiiha oti, ‘Nga bali nʼekabi abo aba Hatonda anahalange hu mbaga ya Yesu ali mu hifo hyʼEtaama Etusaŋo Ebibi ni geŋimba nʼabaatu babe eyiriba oti hani higole!’ ” Ngʼameedaho ati, “Ebibono bino ebindoma bya Hatonda era bituufu.”

¹⁰Ni naŋulira ebibono ebyo nga kubba amafuha ohumujumirya. Aye nga niye gandoma ati, “A-a! Leha otahola otyo! Ese keesi ndi muŋeeresa wa Hatonda hyʼewe nʼabahyo abasigaayeyo abalomera abaatu ebiŋamba hu Yesu. Jumirya nje Hatonda olwohuba njʼagaba obuŋangi obwohulomera abaatu ebiŋamba hu Yesu nʼabita mu Mwoyo wuwe.”

¹¹Naali keja nga mbona egulu ni liwihuuhire era nga muŋwamo esolo eyi balanga baati embalaasi. Embalaasi eyo yali kosa nʼeriho nʼayihaayeho ni bamulanga baati, “Omwesigwa era Owamazima.” Oyo njʼasala emisango nʼatehubbira era asoosa abalabe babe olwʼesonga etuufu.

¹²Omuutu oyo gaali gambaaye engule enyene enyingi hu mutwe era emoni jije ni jimesya oti hani nimi jʼomuliro. Baali bamuŋandiihireho esiina cooka nga ŋabula bundi alimanyire ohutusaho ye omwene.

¹³Gaali gambaaye ekaaso eyaali oti hani bayinihire mu mafugi. Esiina lirye erindi gaali nje “Hibono hya Hatonda.”

¹⁴Eŋe lyʼabasooli abomwigulu lyali limuŋwaho egongo ni limulonda. Abasooli abo baali bambaaye ebyambalo ebya laasi ebihosa era ebiŋoono era hiisi mulala hu bo yeesi ni gehaaye hu mbalaasi ekosa.

¹⁵Ebibono ebi gaali ni nabyo mu munwa byali oti piima, nʼaja hubitambisa ohusoosa nʼohuŋangula amawanga amajeemu. Era alibaŋugisa simbo yʼobwami eyʼehyoma amahulu gahyo ti “ali nʼobuŋangi obwʼamaani.” Hino alihihola mu siina lya Hatonda Omwene buŋangi abaliho ehiruŋi ehyʼamaani olwʼebibi ebi bahola.

¹⁶Hu kaaso yiye ŋabisambi baŋandiihaho esiina baati, HABAHA WʼABAHABAHA ERA MUSENGWA YʼABASENGWA.

¹⁷Ngʼaŋo mbona malayika owundi. Malayika ono gaali gemereeye mu njase yʼeryuba. Ngʼalangirira mu janjaasi eryʼamaani nʼaloma enyuni ejaali ni jiri hugululuha mu bbaga ati, “Muuje muhumbaane mweriire ehiiŋulo ehi Hatonda genda hubeŋula.

¹⁸Muuje mulye eminohi jʼabahabaha, abahulu bamaŋe, nʼabaatu abʼeŋono, ejʼembalaasi nʼabajihalaho, nʼeminohi jʼabaatu bosibosi ohuŋirira aŋalala, abeedu nʼabatali beedu, abegingihiriri nʼabaŋaasi.”

¹⁹Ngʼaŋo mbona ogusolo nago gula nʼabahabaha abomu hyalo nʼamaŋe gaabwe ni bahumbeene ohuŋiriŋana ni nooyo owaali ni gehaaye hu mbalaasi ekosa nʼeŋe lirye.

²⁰Aye nga baŋamba ogusolo ni naabbi ola alagula ebyʼobudulingi, owaholanga ebyamaliholiho mu siina lyagwo gaadulinga abaatu babataho eraama yʼogusolo era bajumirya ehifaananyi hyagwo. Ni babaŋamba nga babadaanya ni bali balamu mu nyanja eyiri ti nameehere eyaduha omuliro ogutasima.

²¹Abasooli abʼamaŋe gaabwe abasigayeŋo nga bafa olwʼehibono ehyaŋwa mu munwa gwʼoyo owaali hu mbalaasi ekosa ehyali oti hani piima eyaali nʼesobekereeye mu munwa gugwe. Era ngʼenyuni jija jehyasa hu minohi jʼemibiri jaawe.