Read lunyole Ohuhwehula 5 Bible Online

Ohuhwehula 5 - lunyole bible

Ohuhwehula 5

¹Nindi nali keja nga mbona omufumbo gwʼolupapula mu muhono omulungi ogwʼoyo owaali ni gehaaye hu tebe eyʼobuŋugi. Hu lupapula ohwo hwaliho ebiŋandiiho mugati nohu mugulu, era ni balufumbire omufumbo baaluboŋa nʼebifundwa musanvu ebi bawoŋesa obulimbo.

²Ngʼaŋo mbona mulala hu bamalayika ba Hatonda owaali nʼobuŋangi owʼamaani. Malayika oyo ngʼabuusa nʼejanjaasi eryʼamaani ati, “Njʼani owoolana nʼomulimo gwʼohuwoŋolola ebifundwa hu mufumbo gwʼolupapula olwo, era galwanjulusa?”

³Cooka ŋaŋumaŋo kadi mulala mwigulu oba hu hyalo, oba ŋaasi wʼeroba, owaali nʼasobola ohwanjulusa omufumbo gwʼolupapula nʼohusoma ebyalimo.

⁴Hino hyandetera ohulira ebyembaha ebyene, olwohuba siŋaaliŋo owaali nʼobuŋangi owʼohwanjulusa omufumbo gwʼolupapula nʼohusoma ebyalimo.

⁵Ngʼaŋo mulala hu basaaja bahulu gandoma ati, “Otalira. Bona! Ŋaliŋo Epologoma yomu hiha hya Yuda eyiŋwa mu tumbu ja habaha Dawudi. Oyo gaŋangula hibooyi Sitaani era ali nʼobuŋangi owʼohuboŋolola ebifundwa omusanvu, nʼohwanjulusa omufumbo gwʼolupapula.”

⁶Ngʼaŋo mbona Yesu, ali mu hifo hyʼEtaama Etusaŋo Ebibi ni gemereeye ohuupi nʼetebe eyʼobuŋugi, ebiramu ebine nʼabasaaja bahulu abiri nʼabane ni bamweswanigirihiise. Mu faani yiye, gaali hyʼoyu betire aye ŋaahani nʼalamuhire. Gaaliho ameega musanvu nʼemoni musanvu ejiri mu hifo hyʼemyoyo omusanvu eja Hatonda Omwene buŋangi eji gaŋindiha hu hyalo.

⁷Nga Yesu, ali mu hifo hyʼEtaama Etusaŋo Ebibi anaaŋa omufumbo gwʼolupapula ohuŋwa mu muhono omulungi ogwʼoyo owaali ni gehaaye hu tebe eyʼobuŋugi.

⁸Ni ganaaŋa omufumbo gwʼolupapula, ngʼebiramu ebine nʼabasaaja bahulu amahumi abiri nʼabane, bahubba amafuha mu moni jʼoyo ali mu hifo hyʼEtaama Etusaŋo Ebibi. Hiisi mulala hu bo gaali nʼedungu ko nʼeŋooja erya zaabbu eryejuuyemo obubbaani ni hali habonero ahalaga esaala eji baatu ba Hatonda baŋeeresa eyi ali.

⁹Ngʼebiramu ebine nʼabasaaja bahulu amahumi abiri nʼabane bemba olwembo olu baali ni batembangaho baati, “Woolana ohunaaŋa omufumbo gwʼolupapula, nʼohuboŋolola ebifundwa ebiruwoŋire. Olwohuba bahwiita, era olwʼohufa huhwo, amafugi gago ganunulira Hatonda abaatu abʼesibo nʼesibo, ohuŋwa mu hiisi hiha nʼendimi nʼamawanga gosigosi hu hyalo,

¹⁰ngʼobafuula egwanga lyʼabasengi abaŋeeresa Hatonda weefe, era abaliŋuga hu hyalo.”

¹¹Naali keja pulira amajanjaasi gʼehiŋindi hyʼabamalayika ehitabaliha. Abamalayika abo baali bemereeye ohweswanigirisa etebe eyʼobuŋugi ŋalala nʼebiramu bira ebine ko nʼabasaaja bahulu abiri nʼabane.

¹²Nga bemba nʼejanjaasi eryʼamaani baati, “Ewe Yesu, ali mu hifo hyʼEtaama Etusaŋo Ebibi, Ewe oyu banamaani beeta, obuŋangi, obuŋinda, amagesi, nʼamaani bihwola, era woolana abaatu ohuhuŋa eŋono, nʼohuhujumirya!”

¹³Era nga pulira hiisi hiitu ehiramu ehiri mwigulu, hu hyalo, ŋaasi wʼeroba nomu nyanja, hiisi hiitu aŋabula hubihisya ni byemba biiti; “Abaatu bajumirye, era baŋe eŋono oyo owihaaye hu tebe eyʼobuŋugi ko ni Yesu, ali mu hifo hyʼEtaama Etusaŋo Ebibi. Obuŋangi nʼobuhulu bibe byawe emirembe nʼemirembe!”

¹⁴Ebiramu ebine nga bitaaho enjihiso biiti, “Amiina.” Ngʼabasaaja bahulu amahumi abiri nabane bahubba amafuha bajumirya.