Read lunyore OKHUCHIAKA 1 Bible Online

OKHUCHIAKA 1 - lunyore bible

OKHUCHIAKA 1

¹Mukhuchiaka Nyasaye yalonga likulu nende esibala.

²Esibala sisiali nende likondo tawe ma nisiba butswa esikhaya. Olutungu olwafuunikha esibala lwali nesiilima esikali, ne obunyali bwa Nyasaye[1] bwayeyema ikulu khumaatsi.

³Ma Nyasaye naboola mbu, “Obulafu bubeho”, ne obulafu nibubaho.

⁴Nyasaye nayanzisibwa nende obulafu. Ma niyabukhania obulafu okhurula khusiilima.

⁵Nalanga obulafu “Om'basu” ne esiilima nasilanga “Obutukhu.” Omukolooba nikubira ma omukamba nikwoola. Niliba litukhu liokhuranga.

⁶Nyasaye naboola mbu, “Esilama esikali sibe hakari wamaatsi, siabukhanie amaatsi mutsimbeka tsibili.”

⁷Ma Nyasaye nalomba esilama esibambukhu, niyabukhania amaatsi akali hasi wasio nende akali ikulu wasio. Ne nikekhola mbwo.

⁸Nakulikha esilama yisio “Likulu”. Omukolooba nikubira ma omukamba nikwoola. Niliba litukhu liakhabili.

⁹Nyasaye naboola mbu, “Amaatsi akali hasi welikulu ketse halala khe liloba lilolekhe”, nikekhola mbwo.

¹⁰Nakulikha liloba “Esibala” ne amaatsi akali niketsele halala nakakulikha “Inyanza.” Ma Nyasaye nayanzisibwa n'nabio.

¹¹Nyasaye naboola mbu, “Esibala simelemwo obunyaasi, emimela chiokhubalusia tsimwo nende emisaala chiamatunde”, ne nikekhola mbwo.

¹²Esibala siamala nisimelamwo obunyasi nende emimela tsimbila etsiabukhan'ne, ne Nyasaye nayanzisibwa n'nabio.

¹³Omukolooba nikubira ma omukamba nikwoola. Niliba litukhu liakhataru.

¹⁴Nyasaye naboola mbu, “Ebiakhilo bibeho khwikulu okhwabukhania om'basu okhurula khubutukhu. Ma bibe esimanyilo sietsinyinga, nende amatukhu nende emihika.

¹⁵Nabiakhenje khwikulu okhuhaana obulafu khusibala.” Ne nikekhola mbwo.

¹⁶Ma Nyasaye nalomba ebiakhilo b'bili; eliuba liamihenje m'basu, ne omwesi kwamihenje butukhu; khandi yalomba tsinyininyini.

¹⁷Nyasaye nabira khwikulu mbu biakhenje khusibala,

¹⁸nibiamiha om'basu nende obutukhu ma nende okhwabukhania obulafu okhurula khusiilima. Nyasaye nayanzisibwa n'nabio.

¹⁹Omukolooba nikubira ma omukamba nikwoola. Niliba litukhu liakhane.

²⁰Nyasaye naboola mbu, “M'maatsi bitsulemwo ebilonje ebili nobulamu, ne amanyonyi nako kapulukhenje ikulu wesibala mumiiya.”

²¹Ma Nyasaye nalomba emisutse emikhongo nende ebindu bindi biosi ebilamu ebimenyele m'maatsi, nende amanyonyi kosi. Ma Nyasaye nayanzisibwa n'nabio.

²²Nabilaamila tsikhabi naboola mbu, “Mwibulane nimwinjiha, mwitsule m'maatsi akali munyanza, ne amanyonyi nako ketsule musibala.”

²³Omukolooba nikubira ma omukamba nikwoola. Niliba litukhu liakharano.

²⁴Nyasaye naboola mbu, “Esibala sibemwo ebili mwoyo nende etsisolo etsiabukhan'ne, etsiobulamu nende biosi ebimoolanga.” Nikekhola mbwo.

²⁵Ma Nyasaye nalomba etsisolo tsiosi etsiom'bulimo nende etsirukwanga ma nende biosi ebimoolanga hasi. Nyasaye nayanzisibwa n'nabio.

²⁶Nyasaye naboola mbu, “Khulombe omundu mukhufwana khwefwe, mwikondo liefwe. Bakhabe nende obunyali khutsisutse, amanyonyi, nende tsisolo tsiosi etsiom'bulimo nende etsirukwanga ma nende biosi ebimoolanga hasi.”

²⁷Ma Nyasaye nalonga omundu mukhufwana khukhwe omwene. Yabalonga omusaatsa nende omukhasi.

²⁸Ma Nyasaye nabalaamila ikhabi, nababool'la mbu, “Mwibulane, mwinjihe, mwitsule musibala ma musiamihe. Khandi mube nobunyali khutsisutse tsiosi etsili mutsinyanza, nende amanyonyi ma nende etsisolo tsiosi.

²⁹Muheeye obunyali khumimela chiosi echialusianga tsimwo nende emisaala chiosi echili khusibala echiebiamo biachio bilimwo tsimwo, nabibetsenje ebiakhulia bienywe.

³⁰Ne khutsisolo tsiosi, nende amanyonyi mal'le okhuhaana emimela chiamasaafu nende obulimo, bibe ebiakhulia.” Nikekhola mbwo.

³¹Nyasaye nahenga ebindu biosi ebiayali nalombele ma nasangasibwa n'nabio biosi. Omukolooba nikubira ma omukamba nikwoola. Niliba litukhu liakhasasaba.