Read lunyore OKHUCHIAKA 11 Bible Online

OKHUCHIAKA 11 - lunyore bible

OKHUCHIAKA 11

¹Olwokhuranga abandu bosi musibala bali nende ol'lolomo l'lala ma khandi barumikhilanga amang'ana amafwanani.

²Olwabali nibachendanga nibatsia ebukwe banyoola esipaapi musibala sia Babulonia ma nibamenyayo.

³Nibabool'lana abene khubene mbu, “Chende khulombe amatifwali ma khukasambe katinye.” Ma nibalomba amatifwali kokhwombokhela nende elaamu yokhukatiila.

⁴Nibaboola mbu, “Khwombokhe litookho elili nende omunaara okwokhwola khwikulu, khe khwelombele eliira khubule okhusalaanibwa hosi hosi khusibala.”

⁵OMWAMI niyeekha hasi okhulola litookho nende omunaara okwabandu bali nibombokhele.

⁶Naboola mbu, “Lola, abandu yaba nibalala khandi bal'lomanga ol'lolomo l'lala, ne yikhu nokhuchiaka butswa okhwebindu biabanyala okhukhola. Sibuliba obutoro okhubakaya tawe.

⁷Chende khwikhe hasi khukoyanie ol'lolomo lwabwe khe babule okhuhuchilisania.”

⁸OMWAMI yamala nabasalaania khusibala siosi ma nibalekha okhwombokha litookho tsana.

⁹Litookho tsana liamala nililangwa Babeli, sichila niho aho OMWAMI yakoyanichisia ol'lolomo lwabandu bosi. Ne okhurula yaho OMWAMI yabasalaania musibala siosi.

¹⁰Tsino nitsio tsinzibulo tsia Shemu. Emihika chibili inyuma wemikhula olwa Shemu yali nali nende emihika emia ndala yali samwana Aripakishadi.

¹¹Ma yamala namenya emihika chindi etsimia tsirano, ne yali nende abaana bandi.

¹²Olwa Aripakishadi yali nemihika amakhumi kataru nende chirano yali samwana Shela,

¹³ma yamala namenya emihika chindi etsimia tsine nende chitaru, ne yali nende abaana bandi.

¹⁴Olwa Shela yali nemihika amakhumi kataru yali samwana Eberi,

¹⁵ma yamala namenya emihika chindi etsimia tsine nende chitaru, ne yali nende abaana bandi.

¹⁶Olwa Eberi yali nemihika amakhumi kataru nende chine yali samwana Peleki,

¹⁷ma yamala namenya emihika chindi etsimia tsine nende amakhumi kataru, ne yali nende abaana bandi.

¹⁸Olwa Peleki yali nemihika amakhumi kataru yali samwana Reu,

¹⁹ma namenya emihika chindi etsimia tsibili nende chirano nachine, ne yali nende abaana bandi.

²⁰Olwa Reu yali nemihika amakhumi kataru nende chibili yali samwana Seruki,

²¹ma namenya emihika chindi etsimia tsibili nende chine nachitaru, ne yali nende abaana bandi.

²²Olwa Seruki yali nemihika amakhumi kataru yali samwana Nahori,

²³ma namenya emihika chindi etsimia tsibili, ne yali nende abaana bandi.

²⁴Olwa Nahori yali nemihika amakhumi kabili nende chirano nachine yali samwana Tera,

²⁵ma namenya emihika chindi emia ndala nende likhumi nachirano nachine, ne yali nende abaana bandi.

²⁶Olwa Tera yali nemihika amakhumi kane nakataru yali samwana Aburamu, Nahori, nende Harani.

²⁷Tsino nitsio tsinzibulo tsia Tera owali samwana Aburamu, Nahori, nende Harani. Harani yali samwana Loti.

²⁸Harani yamala nafwila musibala esiayebul'lwamwo esia Uru mu Babulonia, samwana nasili mwoyo.

²⁹Aburamu natesia Sarai ne Nahori nateesia Milika omukhaana wa Harani. Harani yali khandi samwana Isika.

³⁰Sarai yali omukumba, siyalikhwo nende omwana tawe.

³¹Tera yabukula omwanawe Aburamu, nende omwitsukhuluwe Loti, omwana wa Harani nende Sarai, omukhasi wa Aburamu, narula n'nabo Uru mu Babulonia okhutsia musibala sia Kanaani. Niboola Harani, nibamenyayo.

³²Tera yafwilayo nali nende emihika etsimia tsibili nende chirano.