Read lunyore OKHUCHIAKA 12 Bible Online

OKHUCHIAKA 12 - lunyore bible

OKHUCHIAKA 12

¹OMWAMI yabool'la Aburamu mbu, “Rula musibala sienywe, khubekho baabo, nende hango ha papawo, ma otsie musibala esianakhumanyie.

²Ndikhuhelesia abetsukhulu abenji abakhabe oluyia olukhongo. Ndikhulaamila ikhabi, nende okhukaliyia eliira lilio ne wakhabe omunakhabi.

³Ndakhahaane ikhabi khuyabo abakhulaamila ikhabi, nebutswa ndakhalaame yabo abalikhulaama. Ne okhubir'ra mu ibe ndakhalaamile tsinzibulo tsiosi ikhabi.”

⁴Olwa Aburamu yali nemihika amakhumi kane nakataru yarula Harani, singa OMWAMI yali niyamubool'la, ne Loti yatsia halala n'naye.

⁵Aburamu yabukula Sarai omukhasiwe, nende Loti omwana womwana wabwe, nende emianduchiosi echiabali nibanyoola Harani, ma nende abakholi babwe bosi. Nibachiaka oluchendo lwokhutsia musibala sia Kanaani. Olwaboola Kanaani,

⁶Aburamu yachenda okhwola olwa yoola habundu hatsienukhu halangwa Shekemu, khumusaala kwa More. Mumatukhu yako Abakanaani bali nibasimenyele musibala yisio.

⁷OMWAMI nalolekha khu Aburamu namubool'la mbu, “Sino nisio esibala esianambelesie olwibulo lulwo.” Ma Aburamu niyombokhela OMWAMI owali namulolekheye olusambwa.

⁸Yamala narulayo natsia khulubeka lwebukwe lwa Betseli musibala siebikulu ma nakhomayo liheemalie hakari wa Betseli elubeka wemasaba, nende Ai elubeka lwebukwe. Niyombokhaho olusambwa ma niyekayakayilaho OMWAMI.

⁹Yamala natsilil'la noluchendo nahengele olubeka lwenandete.

¹⁰Ne yaliho inzala musibala sia Kanaani, ma Aburamu narula natsia Emisiri okhumenyakhwoyo sichila inzala yali ingali okhusila.

¹¹Olwayali nali ahembi okhwinjila Emisiri, yabool'la omukhasiwe Sarai mbu, “Ibe oli omukhasi welikondo lilahi.

¹²Olwa Abaamisiri nabakhulole, nabasubile mbu oli omukhasi wanje ne nabanzire, nawe nabakhulekhe.

¹³Nobabool'le oli mbotswa ne sinabanzire tawe khandi nabandende bulahi khulweibe.”

¹⁴Olwa yenjila Emisiri, Abaamisiri balola omukhasiwe nali owelikondo lilahi.

¹⁵Balala khubemeli bomuruchi we Misiri bamulola ma nibabool'la omuruchi obwayali nelikondo lilahi, kho yamala nahilwa munyumba yomuruchi.

¹⁶Khulwaye omuruchi yalinda Aburamu bulahi, namuhelesia amakondi, tsimbusi, tsing'ombe, etsipunda, abarumwa nende tsingamia.

¹⁷OMWAMI yakhupia omuruchi esibi halala nende abeinyumbaye, khulwokhubukula Sarai. Yabaleer'ra obulwaye obubi obwabukhan'ne.

¹⁸Omuruchi yamala nalanga Aburamu namureeba mbu, “Nisina esiaukholeye yisi?” Busina oraimbool'la nomukhasiwo?

¹⁹Busina niumbool'la nomukhaana wenywe ma nikachila nimubukula okhuba omukhasi wanje? Omukhasiwo ngwoyu, mubukule orule otsie.

²⁰Omuruchi nalaka abandube, ma nibahinia Aburamu musibala yisio, halala nende omukhasiwe nende biosi ebia yali n'nabio.