Read lunyore OKHUCHIAKA 13 Bible Online

OKHUCHIAKA 13 - lunyore bible

OKHUCHIAKA 13

¹Aburamu yarula Emisiri nende omukhasiwe halala nende biosi ebiayali n'nabio natsia enandete wesibala sia Kanaani, ne Loti yatsia halala n'naye.

²Aburamu yali omuhinda okhusila. Yali nende amakondi, tsimbusi nende tsing'ombe, ma nende efetsa netsahabu.

³Yamala narula habwene yaho natsilil'la nende oluchendo nahengele Betseli. Yoola habundu ahali hakari wa Betseli nende Ai aheliheema lilie liali olwokhuranga

⁴ahayali niyombokha olusambwa. Habwene yaho yamwekayakaya OMWAMI.

⁵Loti naye khandi yali nende amakondi, tsimbusi nende tsing'ombe, halala nende amaheema.

⁶Esibala yisio sisiabahela bosi khulwokhumenyamwo tawe, sichila bali nende ebiayo ebinji ma sibaali abanyala okhumenya halala tawe.

⁷Obusoolo bwamala nibubaho hakari wabaayi bemiruko chia Aburamu nende abaayi bemiruko chia Loti. Olwene yilwo Abakanaani nende Abaperisi bali nibasimenyele musibala yisio.

⁸Kho Aburamu nabool'la Loti mbu, “Ifwe khuli abata, ne sikenyekhanga obusoolo bubeho hakari wabandubo nende abanje tawe.

⁹Yanza khwabukhane. Wele ahotsia. Notsia khumukhono musaatsa ne nase nzia khumukhono mukhasi.”

¹⁰Loti yachinguula tsimoni tsitsie nalola esipaapi sia Yorodani okhwola Soari nisili namaatsi amenji singa omukunda kwo MWAMI, nohomba singa esibala sie Misiri. Kano kaliho OMWAMI nasili okhumulula Sodoma nende Komora.

¹¹Kho Loti yamala niyeela esipaapi sia Yorodani siosi ni natsia ebukwe. Nimbwo abandu babili yabo babukhana.

¹²Aburamu nasikala musibala sia Kanaani, ne Loti namenya mumataala kali musipaapi nara liheemalie ahembi nende Sodoma.

¹³Ne abandu ba Sodoma bali ababi khandi bakholanga tsimbi imbeli wo MWAMI.

¹⁴Loti namal'le khutsia, OMWAMI yabool'la Aburamu mbu, “Chinguula tsimonitsio aholi yaho ma ohenge bulahi tsimbeka tsiosi.

¹⁵Nakhuhelesie ibe nende olwibulolwo esibala siosi esiololanga, ne siakhabe esisio inziayo.

¹⁶Ndakhakhuhelesie olwibulo olwinji okhusila, singa olukuukhi, ne abulaho owakhanyale okhubabasia bosi. Singa obwo lukuukhi luranyala okhubasibwa nimbwo olwibulolwo luranyala okhubalwa.

¹⁷Lunondi tsia olambuule esibala yisio siosi, sichila khuheye esibala yisio siosi.”

¹⁸Ma Aburamu nasimula liheemalie natsia okhumenya ahembi nende emisaala chie Miruba chia Mamure echili mu Heburoni, ma niyombokhelaho OMWAMI olusambwa.