Read lunyore OKHUCHIAKA 14 Bible Online

OKHUCHIAKA 14 - lunyore bible

OKHUCHIAKA 14

¹Abaruchi bane, Amurafeli wa Babulonia, Arioku wa Eliasari, Kedorolaoma wa Elamu, nende Tidali wa Koimu,

²batsia okhulwana lihe nende abaruchi bandi barano. Nabo bali Bera wa Sodoma, Birisha wa Komora, Shinabu wa Adama, Shemaberi wa Seboimu, nende omuruchi wa Bela (nohomba Soari).

³Abaruchi barano bano bahambana halala Mwibanda lia Sidimu, elilangungwa luno Inyanza Yechumbi.

⁴Bali hasi hoburuchi bwa Kedorolaoma khulwemihika likhumi nende chibili nebutswa khumuhika kwelikhumi nende khataru bakhola indiri.

⁵Mumuhika kwelikhumi nende khane Kedorolaoma nende abaruchi bayali n'nabo batsia nende amahe kabwe nibaleka abandu ba Refaimu mu Ashatorotsi Karanaimu, nende abandu ba Susimu mu Hamu, nende abandu ba Emimu mu Shawe Kiriatsaimu,

⁶nende abandu ba Hori mubikulu bia Seiri okhwola Eleparai, ahembi nende esitsiimi.

⁷Ma nibakalukha Kadeshi (olwene yilwo yalangwanga Enamishipati). Nibaleka esibala siosi esia Abaamaleki, nende esia Abaamori abamenya Hasasori Tamari.

⁸Ma omuruchi wa Sodoma nende owa Komora, nende owa Seboimu, nende owa Bela nibarula nibachaaka lihe mwibanda lia Sidimu,

⁹nibakhupana nende omuruchi wa Elamu, Tidali omuruchi wa Koimu, Amurafeli omuruchi wa Babulonia, nende Arioku wa Eliasari, abaruchi bane nibalwana lihe nende abaruchi barano.

¹⁰Ne libanda lia Sidimu lialimwo amako amenji akelaamu, ne olwa abaruchi ba Sodoma nende Komora bateema okhwilukha okhurula mwihe, bakwa mumako yako, nebutswa abaruchi bandi belukhila mubikulu.

¹¹Abaruchi bane yabo bamala nibayaaka emianduchiosi echia Sodoma nende Komora, nende ebiakhulia biabwe biosi, ma nibatsia.

¹²Loti, omwana womusiani wanga Aburamu, yali niyamenya Sodoma, bamubukula nende emiandu chichie nibatsia n'naye.

¹³Nebutswa omundu mulala owali nahonokokhele niyetsa nabool'la Aburamu Omuheburania, owali niyamenya ahembi nende emisaala emichienukhu echia Mamure wa Amori. Mamure nende omwana wabwe Eshikoli nende Aneri bali abalina ba Aburamu abokhumwoyo.

¹⁴Olwa Aburamu yahul'la mbu omwanawe yali natil'lwe, yalanga abasaatsa bokhulwana abali mwitaalalie, abahela etsimia tsitaru nende likhumi namunane, ma nalondel'la abaruchi bane bala okhwola Dani.

¹⁵Olwo obutukhu bwoola yakabula abandube mumikanda, ma naseera abasukube, nabaleka. Yabataabia okhwola Hoba elili esinyolu wa Damasiko.

¹⁶Ma nakalusia emianduchiosi echiali nichibukuywe khandi nakalusia omwanawe Loti nende emianduchie, halala nende abakhasi nende ababohe bandi.

¹⁷Olwa Aburamu yakalukha okhurula mubulechi bubwe bwa Kedorolaoma nende abaruchi bandi, omuruchi wa Sodoma yatsia okhumwakan'na mwibanda lia Shawe (elili libanda liomuruchi).

¹⁸Ne Melikisedeki owali omuruchi wa Salemu ma khandi omwesaalisi wa Nyasaye Oweikulu Okhusila, yaleer'ra Aburamu omukaati nende ewaini.

¹⁹Namulaamila ikhabi naboola mbu, “Nyasaye Oweikulu Okhusila, owalomba likulu nende esibala, alaamile Aburamu tsikhabi.

²⁰Nyasaye Oweikulu Okhusila, owakhuhelesia obulechi khubasukubo, yetsoomibwe.” Ma Aburamu nahelesia Melikisedeki esielikhumi khubiyaako biosi ebia yali nahonisie.

²¹Omuruchi wa Sodoma yabool'la Aburamu mbu, “Obukule emianduchiosi, nebutswa umbelesie abandu banje.”

²²Aburamu nakalusia mbu, “Ndesuhanga imbeli wa Nyasaye Oweikulu Okhusila, owalomba likulu nende esibala,

²³mbu simbukulakhwo esindu sisio tawe, kata lube oluusi nohomba omukoye kwesilaaro. Khase wakhaboola mbu, ‘Nise owachila Aburamu naba omuhinda.’

²⁴Sinandebukul'lekhwo esindu siosi tawe. Nambuchil'le ebindu biabandu banje barumikhiye bionyene. Nebutswa olekhe Aheri, Eshikoli nende Mamure babukule emikabwa chiabwe.”