Read lunyore OKHUCHIAKA 15 Bible Online

OKHUCHIAKA 15 - lunyore bible

OKHUCHIAKA 15

¹Inyuma weyako, Aburamu yalola libisulo ne nahul'la OMWAMI namubool'langa mbu, “Oraria tawe Aburamu. Nakhulinde mumabi khandi nakhuhelesie omukabwa omukali.”

²Nebutswa Aburamu yakalusia naboola mbu, “OMWAMI Nyasaye wobukhongo, emikabwachio chiakhangasila sina olwa mbula omwana? Owandi n'naye owakhalie obulaame bwanje ni Eliasa owa Damasiko.

³Siwaimbakhwo abaana tawe, ne mulala khubasumba banje niye owakhabukule emiandu chianje.”

⁴Ma nahul'la OMWAMI nal'lomanga khuye khandi naboola mbu, “Omusumba uyo Eliasa siyakhabukule emiandu chichio tawe. Omwana uwo mwene niye owakhanyoole obulaame bubwo.”

⁵OMWAMI namuhiinia esioba namubool'la mbu, “Hengakhwo khwikulu obasie tsinyininyini noba niwakhanyala okhutsibasia. Olwibulo lulwo lwakhabe olwinji singa mbwo.”

⁶Aburamu yamala nara obusubili bubwe mu MWAMI nikachila OMWAMI nasangasibwa n'naye ma namuhuchil'la.

⁷OMWAMI namubool'la mbu, “Nise OMWAMI, owakhuhiinia mwitaala lia Uru elili Babulonia mbu khuhelesie esibala yisi sibe esisio.”

⁸Nebutswa Aburamu yareeba mbu, “OMWAMI Nyasaye, ndakhamanya mbwena mbu siakhabe esianje?”

⁹OMWAMI namukalusia mbu, “Nder'ra ing'ombe emoli, imbusi esibini, nende likondi limiiku ebili nemihika chitaru ma nende esituka nende likhuulwi.”

¹⁰Aburamu nabileera biosi khu Nyasaye nabikhalania hakari, ma nara ebitonye mutsimbaso tsibili buli sitonye nisihengan'ne nende esindi; nebutswa siyakhalania amanyonyi tawe.

¹¹Etsisori tsietsa nitsiyeela khunyama, nebutswa Aburamu yatsikhunga.

¹²Olweliuba liali niliyeelanga, tsindoolo tsinyinji tsiahila Aburamu, ne oburi nende okhuhenda nibimwitsila.

¹³OMWAMI namubool'la mbu, “Olwibulo lulwo lwakhabe olucheni musibala esirali esiabwe tawe, bakhabe abasumba ne bakhanyasibwe emihika etsimia tsine.

¹⁴Nebutswa ndakhaleere esinyasio khusibala esiakhabakhole abasumba. Ne olwa balirula musibala yisio, bakharule nende emiandu eminji.

¹⁵Nawe wakhamenye emihika eminji ma wakhafwe noli nomulembe khandi wakhayabilwe.

¹⁶Ne inyuma wetsinzibulo tsine, abandu bolwibulo lulwo bakhakalukhe, sichila sindakhataabie Abaamori tawe okhwola olwobubi bwabwe bwakhenjihe ma khulwako balanyoole esinyasio.”

¹⁷Olweliuba liali niliyel'le ne esiilima nisiliho, oluchio olutumanga omwosi nende esichienga siomul'lo bialolekha nibibir'ranga hakari webitonye bietsinyama.

¹⁸Habwene yaho OMWAMI yalomba indakano nende Aburamu. Yaboola mbu, “Subisianga okhuhelesia abolwibulo lulwo esibala sino siosi okhurula khulwakho lwe Misiri okhwola khumuchela kwa Efurate,

¹⁹nisilimwo eb'bala bia Bakeni, Abakenisi, Abakadamoni,

²⁰Abahiti, Abaperisi, Abarefaimu,

²¹Abaamori, Abakanaani, Abakirikashi, nende Abayebusi.”