Read lunyore OKHUCHIAKA 16 Bible Online

OKHUCHIAKA 16 - lunyore bible

OKHUCHIAKA 16

¹Sarai omukhasi wa Aburamu siyali niyamwibul'lakhwo omwana tawe. Ne yali nende omukhaana Omumisiri, owali omusumbawe owalangwa Hagari.

²Kho yabool'la Aburamu mbu, “OMWAMI waimbikha oluhono sila okhunyoolakhwo abaana tawe, yanza obukule omukhaana omusumba wanje, obe n'naye. Haundi anyala okhunzibul'la omwana.” Aburamu yahuchil'la aka Sarai yali nabooye.

³Ma Sarai nahaana Hagari khu Aburamu mbu babe n'naye. (Yaka kekhola Aburamu namal'le emihika likhumi mu Kanaani).

⁴Aburamu naba nende Hagari ma nabelekha. Olwayalola nabelekhele yamala nachaaya Sarai.

⁵Ma Sarai nabool'la Aburamu, “Niwe ochilanga amabi yaka nikekhola khu ise. Ise omwene ndakhuhelesia omusumba wanje, ne okhurula namanya mbu wabelekha wainjaaya. OMWAMI akwan'ne akhalache niwina khu ifwe oli habwene, ibe nohomba ise.”

⁶Aburamu yakalusia, “Nomusumbawo, ma ali hasi wobunyalibwo, omukhol'le obwowenya.” Ma Sara namukhupia esibi Hagari okhwola olwayelukha.

⁷Om'malaika wo MWAMI yanyoola Hagari nali hamuchela musitsiimi khunjila etsitsanga Shuri,

⁸namubool'la “Hagari omusumba wa Sarai, orula hena, ne otsitsanga hena?” Naye namukalusia, “Nzilukhanga Sarai, omukhaye wakhol'langa emilimo.”

⁹Om'malaika naboola, “Okalukhe khuye ma otsilil'le okhuba omurumwawe.”

¹⁰Nameta okhumubool'la mbu, “Ndakhakhuhelesie olwibulo olwinji okhusila olwomundu arakhabasie tawe.

¹¹Nawibule omwana omusiani, ne nomukulikhe Ishimaeli, sichila OMWAMI uhuliye okhulakayakhwo okhwokhunyakhana.

¹²Nebutswa omusianiwo alimenya singa esikhili yom'bulimo, yakhalwane nende buli esikhili, ne buli mundu yakhalwane n'naye. Yakhamenye ehale khubekho babe bosi.”

¹³Hagari yereeba omwene, “Ni sahene mbu nduutsi Nyasaye ma sili omulamu okhubool'lakhwo abandu?” Ma nalanga OMWAMI owali nal'lomele n'naye, “Niwe Nyasaye ololanga.”

¹⁴Niko akachilanga esitaho sili hakari wa Kadeshi nende Beredi nisilangwa “Beeri Lahai Roi.”[6]

¹⁵Hagari yebula omwana omusiani ne Aburamu namukulikha Ishimaeli.

¹⁶Aburamu yali nemihika amakhumi munane nachisasaba olwene yilwo.