Read lunyore OKHUCHIAKA 17 Bible Online

OKHUCHIAKA 17 - lunyore bible

OKHUCHIAKA 17

¹Olwa Aburamu yali nemihika amakhumi karano nakane nende chirano nachine OMWAMI yamulolekhela, namubool'la mbu, “Nise Nyasaye Wokhunyala Biosi. Umbul'le ma okholenje amalunji buli khasotso.

²Ndakhalombe indakano n'nawe ma ndakhenjihie tsinzibulo tsitsio.”

³Aburamu niyenama hasi obweni bubwe nibwola khwiloba ma Nyasaye namubool'la mbu,

⁴“Nombanga indakano yino n'nawe: khusubisinjia mbu wakhabe omwibuli wetsimbia tsinyinji.

⁵Eliira lilio sinalibetsenje khandi Aburamu tawe, nebutswa Aburahamu, sichila khukholanga okhuba omwibuli web'bala ebinji.

⁶Ndakhakhuhelesie tsinzibulo tsinyinji ne balala khubo bakhabe abaruchi. Wakhabe nende tsinzibulo tsinyinji etsiakhabe tsinzibulo tsinyinji.

⁷“Ndakhareho lisubisio lianje khuibe nende abetsinzibulo tsitsio tsiamatukhu keimbeli singa indakano erakhahwe tawe. Ndakhabe Nyasayewo khandi Nyasaye wolwibulo lulwo.

⁸Ndakhakhuhelesie ibe nende abolwibulo lulwo esibala sino esiomenyangamwo singa omucheni. Esibala siosi esia Kanaani siakhabe esiolwibulo lulwo inziayo, nase ndakhabe Nyasaye wabwe.”

⁹Nyasaye nabool'la Aburahamu mbu, “Nawe ohuchiil'le okhulinda indakano yanje, ibe omwene nende olwibulo lulwo olwakheetse, mutsinzibulo tsiabwe tsiosi.

¹⁰Ibe nende olwibulolwosi okhwola muhuchil'le okhuseba omusaatsa wosi oli muinywe.

¹¹Okhurula n'nondi namusebwenje likhoba lielifunga lienywe. Sino nasibe esilolelo sieindakano hakari wenywe n'nase.

¹²Buli omwana omusiani owibulwa niyakhoola amatukhu munane, nali mwitaala lilio, kata abe nali omusumba nohomba omurende nasebwenje.

¹³Buli omusiani nasebwenje khulwo okhumanyia mbu indakano yanje neyeinziayo.

¹⁴Omusaatsa wosi ouli omusinde ourasebwa tawe, siyakhabalwe singa mulala khubandu banje tawe, sichila siyalonda indakano yanje tawe.”

¹⁵Nyasaye nabool'la Aburahamu mbu, “Sinolanjenje omukhasiwo Sarai khandi tawe, okhurula n'nondi eliira lilie nalibetsenje Sara. Namulamile tsikhabi ne nakhuhelesie omwana omusiani okhubir'ra muye.

¹⁶Namulamile ikhabi ma yakhabe nyina tsinzibulo tsiosi, ne abaruchi babandu balirula mulwibulo lulwe.”

¹⁷Aburahamu yenama hasi ma nachaka natsekha olwa yapaala, “Omundu yakhanyoola omwana nali nende emihika emia ndala? Ne Sara yakhabelekha omwana nali nemihika amakhumi karano nakane?”

¹⁸Nareeba Nyasaye mbu, “Busina khuralekha Ishimaeli alabukule emiandu chianje?”

¹⁹Nyasaye naboola mbu, “Tawe, omukhasiwo Sara nakhwibul'le omwana omusiani ne nomukulikhe Isaka. Ndakhatinyilisie indakano yanje n'naye khandi nende olwibulolwe inziayo.

²⁰Mbuliye obureebi bubwo khu Ishimaeli, khe namulamile tsikhabi ma ndakhamuhe abaana abenji nende olwibulo olwinji okhusila. Yakhabe samwana abakhulundu likhumi nababili, ne ndakhamukhole oluyia olukali.

²¹Nebutswa ndakhakufuhasie indakano yanje no mwanawo Isaka owa Sara aliibula inyinga singa ino mumuhika kwitsa.”

²²Olwa Nyasaye yamala okhul'loma khu Aburahamu, yamulekha natsia.

²³Khwitukhu liene yilio Aburahamu yalonda aka Nyasaye yamulaka, ma naseba omusianiwe Ishimaeli nende abasaatsa bandi bosi abali mwitaala lilie, nibalimwo abasumba abebul'lwa hango hahe nende abayali niyakula namapesa.

²⁴Aburahamu yali nende emihika amakhumi karano nakane nachirano nachine olwa yasebwa,

²⁵ne omwanawe Ishimaeli yali nemihika likhumi nachitaru olwa yasebwa.

²⁶Bosi basebwa litukhu elala,

²⁷halala nende abasumba ba Aburahamu bosi.