Read lunyore OKHUCHIAKA 18 Bible Online

OKHUCHIAKA 18 - lunyore bible

OKHUCHIAKA 18

¹OMWAMI yalolekha khu Aburahamu hamisaala chiemiruba chia Mamure. Aburahamu yali niyekhaaye hamuliangokwe Liheema lilie munyinga tsiom'basu omululu,

²ne olwa yahenga ikulu yalola abandu bataru nibasinjiiye imbeliwe. Ne olwa yabalola yelukha bwangu okhutsia okhubakaan'na, niyenama hasi khulwokhuhana oluyali,

³naboola mbu, “Abaami, nimuyanza murakhabira butswa sila okhweberakhwo tawe. Nderechekhele okhumurumikhila.

⁴Lekhe ndere amaatsi mwesaabe ebilenje bienywe, munyala okhuhulukhila m'musaala kuno.

⁵Khandi nzie okhuleera esiakhulia siti, simuhelesie tsingufu khe mutsilil'le noluchendo lwenywe. Mumbelesisie oluyali khulwa okhwitsa mungo mwanje, khe mulekhe mutende.” Nibakalusia, “Khuhuchiiliye okhole singa oboye.”

⁶Aburahamu yatetekhana natsia mwiheema nabool'la Sara, “Bukula bwangu obusie obunyukhe emichelo chitaru olombe emikaati.”

⁷Ma natsia tsimbilo musiayo niyendamwo esimoosi esieinyama indubukhu nahelesia omutiiyi, naye niyanguha okhusilomba.

⁸Nabukula amafura kokhuteekha, nende amabeele, nende inyama tsana, ma narenjekha ebiakhulia imbeli wabacheni, nabatenda omwene, nabo nibalia.

⁹Ne nibamureeba, “Omukhasiwo Sara ali hena?” Naye nakalusia mbu, “Ali mwiheema.”

¹⁰Mulala khubo naboola “Emiesi chirano nachine nichihweye ndakhakalukhe ne omukhasiwo Sara aliba nali no mwana omusiani.” Sara yali nali inyumawe m'muliango kweliheema, nahuyianga.

¹¹Aburahamu nende Sara bali abakhungu okhusila, ma Sara yali niyalekha okhutsia m'mwesi.

¹²Khe Sara yamala atsekhe omwene ma naboola, “Ise ndakhunguhile okhusila, ndakhasangala okhuba nomusakhulu wanje tooto? Kata mbwo omusaatsa wanje naye wakhunguhile okhusila.”

¹³Ma OMWAMI nareeba Aburahamu mbu, “Esichil'le Sara natsekha naboola ‘Ndakhabelekha omwana nindakhunguuha’ nisina?

¹⁴Silikhwoho esindu esili esitinyu esiakharama OMWAMI? Ne singa mbooye, emiesi chirano nachine okhurula leelo, ndakhakalukhe, ne Sara yakhabe nali nende omwana omusiani.”

¹⁵Sichila Sara yali noburi yeyambakhana naboola mbu, “Ise sinzekhelekhwo tawe OMWAMI.” Naye naboola mbu “Yee, otsekhele.”

¹⁶Ma abasaatsa yabo nibarula nibatsia habakhaloleye Sodoma, ne Aburahamu natsia n'nabo khulwa okhubaseebula.

¹⁷OMWAMI naboola mbu, “Simbisa Aburahamu akanakhole tawe.

¹⁸Olwibulolwe lwakhabe olwibulo olukhongo ne okhubir'ra muye ndakhalaamile tsinzibulo tsiosi tsikhabi.

¹⁹Ndali okhumwela khe abe onyala okhwibaal'la abaana babe nende abolwibulolwe bambul'le ma bakholenje akali akahabwene. Nibakhola mbwo, namukhol'le kosi aka ndamulaka.”

²⁰OMWAMI nabool'la Aburahamu, “Abandu ba Sodoma na Komora bayaalwanga khulwokhukhola obubi, khandi tsimbi tsiabwe netsingali okhusila.

²¹Okhwola ngongome okhutsia habali ndole nikali okhwekaanwa khwabwe khwambuliye nokhwatooto.”

²²Ma abandu babili yabo nibarula nibaselenjera okhutsia Sodoma, nebutswa OMWAMI yasikala nende Aburahamu.

²³Aburahamu natsia khu MWAMI ma namureeba mbu, “Tooto mwene nomume abandu abalunji abarali namakoso?

²⁴Nikakhaba bakhabamwo abandu abalunji amakhumi karano, wa'khuye litaala liosi? Siwakhalilekha khulwokhuhonia amakhumi karano, yabo?

²⁵Siwakheera abalunji halala nende abamayaanu tawe. Yako sikakhanyalikha tawe. Omukhalachi wesibala siosi okhwola akhalache habwene.”

²⁶OMWAMI namukalusia mbu, “Nindakhanyoola abandu abalunji amakhumi karano mu Sodoma, ne ndekha litaala liosi khulwe yabo.”

²⁷Aburahamu khandi naboola mbu, “Omwami, yanza umbeele okhwekhulumamia khulwokhutsilil'la okhul'loma n'nawe, Ise ndi butswa omundu-namundu orahel'le okhuboola esindu siosi tawe.

²⁸Nebutswa haundi bakhanyoolekha abandu amakhumi kane nende barano abalunji musilenje siabandu amakhumi karano. Wakhamulula litaala khulwa balemelekhwo barano noho?” OMWAMI namukalusia mbu, “Sindakhamulula litaala ninyoolamwo abandu abalunji amakhumi kane nende barano tawe.”

²⁹Aburahamu khandi naboola mbu, “Haundi bakhabamwo amakhumi kane bonyene.” Naye namukalusia mbu, “Sindakhalimulula nibalimwo amakhumi kane tawe.”

³⁰Aburahamu naboola mbu, “Omwami noyanza orasinyikhila tawe, nebutswa ndareeba khandi. Ne nibakhabamwo amakhumi kataru bonyene?” Naye naboola mbu, “Sindakhakhola mbwo nindakhanyoolamwo amakhumi kataru tawe.”

³¹Aburahamu naboola mbu, “Omwami yanza umbeele okhwekhulumamiakhwo khulwokhutsilil'la okhul'loma n'nawe. Ne nikaba bakhanyoolekha amakhumi kabili bonyene?” OMWAMI naboola mbu, “Sindakhamulula litaala nindakhanyoolamwo amakhumi kabili tawe.”

³²Aburahamu naboola mbu, “Omwami noyanza orasinyikha tawe, ndaboola khandi l'lala lwonyene. Ne nikaba likhumi bonyene nibo abanyolekha?” OMWAMI naboola mbu, “Sindakhalimulula tawe khulwelikhumi yabo.”

³³Olwa yali namal'le okhul'loma nende Aburahamu, OMWAMI yamala natsia, ne Aburahamu nakalukha ingo.