Read lunyore OKHUCHIAKA 19 Bible Online

OKHUCHIAKA 19 - lunyore bible

OKHUCHIAKA 19

¹Olwa abamalaika babili yabo boola Sodoma khubwiile, Loti yali niyekhaaye hasilibwa sie litookho. Olwa yabalola, yasinjila natsia okhubakaan'na. Yabenamila khulwo oluyali,

²ma naboola, “Abaami, yanze mwitse munyumba mwanje, mwesaabe ebilenje ma mukone obutukhu bwolwalelo. Mukamba tsuli namutsilil'le noluchendo.” Nebutswa nabo bakalusia mbu, “Tawe, khulakona khunjila khuno.”

³Natsilil'la okhubahomba, ma okhwola nibahuchil'la okhutsia n'naye munyumbamwe. Loti nalaka abatiiyi babe okhulomba emikaati ma nibalomba ebiakhulia ebilahi khubacheni. Olwa biali nibierechekhele ne nibalia.

⁴Abacheni nibasili okhukona, abasaatsa ba Sodoma beetsa nibafumbila inyumba tsimbeka tsiosi. Abasaatsa bosi abomwitaala yilio baliho, ababuukha nende abasakhulu.

⁵Balanga Loti nibareeba mbu, “Abasaatsa betsele okhukona munyumba mumwo bali hena? Baleere esioba yino khukone n'nabo!”

⁶Loti narula esioba ma niyekala omuliango.

⁷Nababool'la mbu, “Abasianje, musaayanga mbu nimuyanza murakhakholakhwo esifwabi sifwana mbwo tawe.

⁸Lole, ndi nende abakhaana banje babili abasili okhubukaanakhwo nomusaatsa wosi. Lekhe muleer're mubakhole singa obwa mwenya. Nebutswa murakhol'lakhwo abandu bano ling'ana liosi tawe, sichila nabacheni munyumba yanje, ne okhwola mbalinde.”

⁹Nebutswa nabo nibaboola mbu, “Rulayo, ibe oli butswa omucheni yino! Oli nabunyali sina obwokhukhubool'la akakhukhola? Rulayo khase khwakhakhukhola akayombele akakhukhol'la abachenibo yabo.” Ma nibasindikha Loti inyuma nibesuta ahembi mbu bafunake omuliango.

¹⁰Nebutswa abasaatsa babili abali munyumba banyiila amakhono kabwe nibakhwesa Loti nibamwinjisia munyumba, ma nibeekala omuliango.

¹¹Nibabofusia abasaatsa bosi abali esioba, kata sibali abanyala okhunyoola omuliango tawe.

¹²Abasaatsa babili yabo nibabool'la Loti mbu, “Nolikhwo nende omundu undi wosi — abasianibo, abakhaanabo, abakhasi babasianibo, nohomba abeekhobo bandi abamenyele mwitaala muno bahiiniemwo bosi,

¹³sichila khwitsa okhumulula litaala lino liosi. OMWAMI uhuliye obusitaki obutinyu khubandu yaba ma ukhurumile khwitse okhumulula Sodoma.”

¹⁴Ma Loti natsia khubasaatsa abali nibakhwetsanga abakhaanabe, nababool'la mbu, “Eyunjie murule hano, OMWAMI yetsa okhumulula habundu hano.” Nebutswa bakanakana mbu netsimbakha butswa.

¹⁵M'mabwebwe abamalaika bateema okhumuyungia Loti nibaboola mbu, “Khola bwangu. Bukula omukhasiwo nende abakhaanabo babili murule, khe mulekhe okhukosia obulamu bwenywe olwe litaala liba nilimululwanga.”

¹⁶Loti niyesingoyoyiakhwo. Nebutswa OMWAMI yamubelel'la, ma abasaatsa yabo nibamutiila omukhono, khandi nibatiila omukhasiwe nende abakhaanabe babili amakhono, nibabahiinia esioba welitaala.

¹⁷Ma mulala khubamalaika naboola mbu, “Mwilukhe, muhonie obulamu bwenywe. Murakhahengakhwo inyuma kata okhusinjila musipaapi tawe. Mwilukhile mubikulu khe mubule okhwirwa.”

¹⁸Nebutswa Loti nakalusia mbu, “Tawe, noyanza orakhol'la mbwo tawe, Omwami wanje,

¹⁹ukholeye aketsimbabasi amenji ma uhonisie obulamu bwanje, nebutswa ebikulu bili ehale okhusila. Okhumumwa khunyala okhunyoolel'la, ma haundi nyala okhufwa nisili okhwolayo.

²⁰Ololanga akhataala khatititi khala? Khali ahembi okhusila. Lekha nzilukhilemwo — nakhatititi butswa — ne nyala okhuhonelamwo.”

²¹Naye nakalusia mbu, “Nobulahi, mbuchiliye. Simulula akhataala khala tawe.

²²Yilukha bwangu! Sikholakhwo esindu siosi tawe okhwola olwoba niwol'leyo.” Sichila Loti yakhalanga akhataala khatititi, khamala nikhalangwa Soari[7].

²³Eliuba liali niliakharula olwa Loti yoola Soari.

²⁴Ma OMWAMI nakwisilia Sodoma nende Komora Elamu yomul'lo singa ifula,

²⁵ma nakamulula kosi nende libanda liosi, halala nende abandu balimwo bosi nende ebindu biosi ebiamela khwiloba.

²⁶Nebutswa omukhasi wa Loti yakhupa amasemo inyuma ma nakwa lichina liechumbi.

²⁷Omukamba kwalondakhwo, mumabwebwe, Aburahamu yahuuna habundu hayali nasinjiyenje imbeli wo MWAMI.

²⁸Nahenga Sodoma nende Komora mwibanda liosi nalola omwosi nikutumanga khusibala yisio singa omwosi okurula khusitioli esikali.

²⁹Nebutswa olwa Nyasaye yamulula amataala komwibanda aha Loti yamenyanga, yetsul'la Aburahamu ma nahuchiil'la Loti ahone ma abe omulamu.

³⁰Khulwa mbu Loti yaria okhumenya Soari, ye nende abakhaanabe babili batsia okhumenya muluhangaywa musikulu.

³¹Omukhaana omukhulundu nabool'la omukhaana wabwe, “Papa wefwe luno atsitsanga nakhunguha, ne abasaatsa sibalikhwo musibala muno abalikhuleera khe khulanyoole abaana tawe.

³²Chenda khuhelesie papa amalwa ma akholwe, ma khube n'naye, khwibule abaana n'naye.”

³³Kho mubutukhu yibwo bamuhelesia amalwa nanywa ma omukhaana mukhulundu naba n'naye. Ne yali nakhol'we okhusila kata siyamanya esiekhola tawe.

³⁴Litukhu lialondakhwo omukhaana mukhulundu nabool'la omukhaana wabwe, “Ise ndabeye nende papa obutukhu bwabeeye, leelo khumuhelesie amalwa akholwe, ma nawe obe n'naye. Ma fwesi khube nende abaana okhurula khu Papa.”

³⁵Obutukhu yibwo bahelesia samwana amalwa, ma omukhaanawe omutu nakona n'naye. Khandi sichila yali nakholwe okhusila siyamanya esiali okhwekhola tawe.

³⁶Khe abakhaana ba Loti babili bamala nibabelekha tsinda okhurula khu samwana.

³⁷Omukhaana omukhulundu yebula omwana omusiani namukulikha Moabu. Niye kukanyene Abamoabu baliho luno.

³⁸Omukhaana mutu naye khandi yebula omwana omusiani, owa yakulikha Benami. Niye kukanyene Abaamoni baliho luno.