Read lunyore OKHUCHIAKA 2 Bible Online

OKHUCHIAKA 2 - lunyore bible

OKHUCHIAKA 2

¹Kho likulu nende esibala biahwa, nende ebiali nibilombeywemwo biosi.

²Khwitukhu liakhane nakhataru Nyasaye yali namal'le emilimochie ma nahuluukha.

³Yamala nalaamila litukhu liakhane nakhataru ikhabi ma naliahula okhuba lichoomekhe, sichila nilio eliayahuluukhilamwo khumilimo chiobulonji.

⁴Ma nimbwo likulu nende esibala bialombwa. Olwo MWAMI Nyasaye yalomba esibala nende likulu,

⁵emimela chiosi sichialikhwoho tawe kata tsimwo sitsianyala okhumela tawe sichila yali nasili okhukwisia ifula ma khandi omundu siyaliho onyala okhulima liloba tawe,

⁶nebutswa amaatsi kelifumbi karula hasi nikanyisia esibala.

⁷Kho OMWAMI Nyasaye yabukula liloba okhurula hasi, nalomba omundu okhurula khulio; ma nafuura emiiya chiobulamu m'moolu kaake ma, omundu naba omulamu.

⁸OMWAMI Nyasaye naraaka omukunda mu Edeni, Ebukwe, ma naramwo omundu owayali nalonjele.

⁹Yamesia khwiloba tsana siomusaala omulahi okwokhwama amatunde amalahi. Hakari womukunda kwaliho omusaala kwobulamu nende omusaala okwokhumanyia amalahi nende amabi.

¹⁰Omuchela kwarula mu Edeni okwokhusama omukunda ne kwakabukhanamwo okhuba emichela chine.

¹¹Omuchela kwokhuranga kulangwa Pishoni, nikwo okwabotokhana esibala siosi esia Hawila,

¹²esilimwo omukasa omulahi, khandi amafura kesuswa indahi kaliyo nende oruchina rwobukusi obutinyu.

¹³Omuchela kwakhabili ni Kihoni, nikwo okwabotokhana esibala sia Kushi.

¹⁴Omuchela kwakhataru ni Tigurisi, okubir'ranga ebukwe wa Asiria, ne omuchela kwakhane ni Efurate.

¹⁵OMWAMI Nyasaye yara omundu m'mukunda kwa Edeni khulwokhulima nende okhukulinda.

¹⁶Namubool'la mbu, “Onyala okhulia khumatunde komusaala kwosi m'mukunda,

¹⁷nebutswa orakhaliakhwo amatunde kokhumusaala kwokhumanya obulahi nende obubi tawe. Litukhu liawakhaliekhwo wakhafwe.”

¹⁸OMWAMI Nyasaye naboola mbu, “Sibuli obulahi omundu uyu okhuba yenyene tawe, namulombele omukhonyi oumukhoyele.”

¹⁹Ma nabukula liloba nalomba etsisolo tsiosi nende amanyonyi, naleer'ra omundu uyo alole amera kabikulikha. Eliira liosi eliomundu yakulikha buli sindu, nilio eliali eliira eliasio.

²⁰Omundu yamala nakulikha etsisolo tsiosi amera nende amanyonyi, nebutswa sibulaho khubio esiakhabeye singa omukhonyi oumukhoyele tawe.

²¹OMWAMI Nyasaye yahelesia omundu tsindoolo tsisiro, ne olwa yali nakonanga, Nyasaye yahiinia olubafu lulwe l'lala ma nakalusia inyama habundu tsana.

²²Nalomba omukhasi okhurula khulubafu yilwo ma naleer'ra omundu.

²³Omundu naboola mbu, “Uno luno nelikumba liokhumakumba kanje, inyama khutsinyama tsiom'bili kwanje. Alalangwa omukhasi, sichila yahiinibwa khumusaatsa.”

²⁴Khulweyako omusaatsa alalekha samwana nende nyina, ahambaane nende omukhasiwe, ma babe om'bili mulala.

²⁵Ne omusaatsa uyo nende omukhasiwe, bombi bali esihechenye, nebutswa sibalolakhwo es'simba murwe tawe.