Read lunyore OKHUCHIAKA 20 Bible Online

OKHUCHIAKA 20 - lunyore bible

OKHUCHIAKA 20

¹Aburahamu yarula Mamure natsia musibala sia Negebu ma namenya hakari wa Kadeshi nende Shuri. Olunyuma, olwayali namenyele Gerari,

²yaboola mbu omukhasiwe Sara nimbotsowe. Khe Omuruchi Abimeleki wa Gerari nalaka mbu Sara ahilwe khuye.

³Mubutukhu Nyasaye yetsela Abimeleki mwilooro naboola, “Ibe nofwe, sichila ubukuuye omukhasi uyu, ouli omukhasi wabene.”

⁴Nebutswa Abimeleki yali nasili okhuba nende Sara naboola, “Omwami, mbula esikha siosi tawe! Olanzira ise nende abandu banje noho?

⁵Aburahamu mwene abooye mbu Sara nomukhaana wabwe, khandi Sara mwene naboola mbwo. Ndakhol'le kano munjila yesilongoole, ma sindikhwo nende esikha siosi tawe.”

⁶Nyasaye namubool'la mwilooro mbu, “Yee, manyile okholeye yaka munjila yesilongoole, niko akachil'le nikhwikal'la okhukhol'la tsimbi, ma simbuchiliye otiilekhwo khumukhasi uyo tawe.

⁷Ne luno kalusia omukhasi uyo khumusaatsawe. Okhuba nomuroobi, ne yetsa okhukhusaayila, khe obule okhufwa. Nebutswa nobula okhukalusia, khulakanga mbu nofwe, ibe nende abandu baabo bosi.”

⁸M'mabwebwe omukamba okwalondakhwo Abimeleki yalanga abemelibe bosi ma nababool'la akali nikekholekhele, ne bosi baria okhusila.

⁹Ma Abimeleki nalanga Aburahamu namureeba, “Nisina esiokhukholeye yisi? Ndakhukholeye abubi sina obuchil'le niwenya okhuleera olubi khuise nende obwami bwanje? Omundu wosi siyenyekhanga akholekhwo akokhol'le kano tawe.

¹⁰Busina nokhola mbwo?”

¹¹Aburahamu nakalusia, “Ndapaal'lenje mbu omundu salikhwo hano omuhetsanga Nyasaye oluyali tawe ma nimbaara mbu mwakhanzira kho mubukule omukhasi wanje.

¹²Ne tooto nomukhaana wefwe, sichila no mwana wa Papa wanje, owa Mama wanje undi, ne ndamuteesia nomukhasi wanje.

¹³Khe olwa Nyasaye yaimbinisie munyumba ya Papa niyandeera musibala siebucheni, ne nimbool'la omukhasi wanje mbu, ‘Nobool'lenje buli mundu mbu ndi mbootsowo khulwokhukhumanyia mbu waimbul'la.’ ”

¹⁴Abimeleki yamala nakalusia Sara khu Aburahamu, ma khandi namuhelesia amakondi nende tsing'ombe nende abakholi.

¹⁵Nabool'la Aburahamu, “Esibala sianje siosi siesino, omenyekhwo aha wenyele.”

¹⁶Ne nabool'la Sara, “Mbetsanga omusiani wenywe ebitonye biefetsa ebihela elefu ndala singa esimanyisio khubosi abamuli n'nabo mbu soli nes'sikha tawe. Buli mundu namanye mbu sokhol'lekhwo abubi bwosi tawe.”

¹⁷Ma Aburahamu nasaaya Nyasaye, ne Nyasaye nahonia Abimeleki nende omukhasiwe, nende abakholibe abakhasi kho babe abanyala okhwibula abaana.

¹⁸Sichila OMWAMI yali niyabekala tsimbelekhelo abomwitaala lia Abimeleki bosi khulwa akali nikekhol'le khu Sara omukhasi wa Aburahamu.