Read lunyore OKHUCHIAKA 21 Bible Online

OKHUCHIAKA 21 - lunyore bible

OKHUCHIAKA 21

¹OMWAMI yalaamila Sara ikhabi, singa obwa yali niyalaka,

²ma nabelekha ne niyebul'la Aburahamu omwana omusiani olwa yali nali omusakhulu. Omusiani uyo yebulwa munyinga ya Nyasaye yaboola yakhebul'lwemwo.

³Aburahamu namukulikha Isaka.

⁴Olwa Isaka yali namatukhu munane, Aburahamu yamuseba singa obwa Nyasaye yali niyamulaka:

⁵Aburahamu yali nende emihika emia ndala olwa Isaka yebulwa.

⁶Sara naboola, “Nyasaye umbeye obusangali nende okhutsekha. Buli mundu ohul'lakhwo, alatsekhe n'nase.”

⁷Ma nameeta okhuboola mbu, “Niwina owakhabooleye Aburahamu mbu Sara yakhanuniekhwo abaana? Ne kata mbwo mwibuliye omwana omusiani mumatukhu kobusakhulu bubwe.”

⁸Omwana nakhula ne khwitukhu liayalesibwa amabeele Aburahamu yalomba lisabo likali okhusila.

⁹Litukhu lindi Ishimaeli, omwana wa Hagari Omumisiri yebul'la Aburahamu yali nasinanga nende Isaka omwana wa Sara.

¹⁰Sara nabalola ne nabool'la Aburahamu, “Okhuunge omusumba mukhasi uyu nende omwanawe, barule hano. Omwana womusumba womukhasi uno arakhanyoolakhwo omukabwa kwobuhinda bubwo obwomwana wanje Isaka yakhalamilwe tawe.”

¹¹Kano kanyasia Aburahamu okhusila, sichila Ishimaeli khandi yali omwanawe.

¹²Nebutswa Nyasaye yabool'la Aburahamu, “Orahenda omwoyo khulwomusianiwo nende omusumbawo omukhasi, Hagari tawe. Okhole kosi aka Sara akhubool'la okhukhola sichila tsinzibulo tsitsio tsiandakhulaka tsiakharul'le mu Isaka.

¹³Khandi ndakhahelesie omwana womusumbawo omukhasi abaana abenji ma balabe olwibulo olwinji sichila ye khandi no mwanawo.”

¹⁴M'mabwebwe omukamba kwalondakhwo, Aburahamu yahelesia Hagari ebiakhulia nende esimuka esilimwo amaatsi. Namureela ebindu yibio khumukongo ma namusebula halala nomusianiwe. Hagari natsia natiimatiima musitsiimi sia Berisheba.

¹⁵Olwa amaatsi kosi kali nikahweye musimuka yebala omwana musitsakha

¹⁶natsia niyekhala etsimiita emia ndala okhurula khuye, naboola, “Sinyenya ndole obwomwana wanje afwa tawe.” Ne olwa yali niyekhayeho omwana[8] nachaaka okhulakaya butinyu.

¹⁷Nyasaye yahul'la omwana nalakayanga, ne om'malaika wa Nyasaye nal'loma khu Hagari okhurula mwikulu naboola mbu, “Nisina esikhunyasianga Hagari? Oraria tawe. Nyasaye uhuliye omusianiwo nalakayanga.

¹⁸Sinjila, tsia obukule omwana, omuhombelesie. Ndakhakhole olwibulo lulwe okhuba oluyia olukhongo.”

¹⁹Ma Nyasaye niyekula tsimoni tsia Hagari ne nalola esitaho esiamaatsi. Yatsia niyetsusia amaatsi musimukasie, ma nahil'lakhwo omwana.

²⁰Nyasaye yali nende omwana uyo, ma nakhula namenya musitsiimi sia Parani ne naba omusitsa wokhuyiitsa nobuyingo.

²¹Nyina namunyool'la omukhasi okhurula musibala sie Misiri.

²²Olwene yilwo Abimeleki batsia nende Fikoli, omukhongo wabasikari belihelie, nibabool'la Aburahamu, “Nyasaye ali n'nawe mukosi akokholanga.

²³Kho wesuhile hano imbeli wa Nyasaye mbu siwakhangaatekhwo nohomba abaana banje, nohomba abolwibulo lwanje tawe. Ise ndi omusubilwa khuibe kho nawe undesuhile mbu nobe omusubilwa khu ise nende esibala siomenyelemwo sino.”

²⁴Aburahamu naboola, “Khusubisinjia.”

²⁵Aburahamu namwekan'na Abimeleki khumang'ana kesitaho esiabatiyi babe bali nibamunuul'le.

²⁶Abimeleki naboola, “Simanyile niwina okhol'le akene yaka tawe. Siwaimbooleyekhwo tawe, ne luno nilwo olwokhuranga okhukahul'lakhwo.”

²⁷Ma Aburahamu nabukula amakondi nende tsing'ombe nahelesia Abimeleki, ma bombi nibalomba indakano.

²⁸Aburahamu niyahula ebimeme bine nabitaru okhurula musiayo sisie,

²⁹ne Abimeleki namureeba, “Okhol'lembwo khulwasina?”

³⁰Aburahamu nakalusia, “Huchil'la obukule ebimeme bine nabitaru bino bibe esimanyilo mbu nise owayaba esitaho yisi.”

³¹Khulwa akene yako habundu yaho hakulikhwa eliira mbu Berisheba, sichila niho aha bombi babili bali okhwesuhila.

³²Olwabali nibamal'le okhulombela indakano ha Berisheba, Abimeleki nende Fikoli nibarula nibatsia musibala sia Filisiti.

³³Ma Aburahamu naraaka omusaala kwesikomooli mu Berisheba ma niyekayakaya OMWAMI, Nyasaye weinziayo.

³⁴Aburahamu yamenya musibala sia Filisiti oluhono olurambi.