Read lunyore OKHUCHIAKA 22 Bible Online

OKHUCHIAKA 22 - lunyore bible

OKHUCHIAKA 22

¹Inyuma wamatukhu nalebe Nyasaye yateema Aburahamu, yamulanga, “Aburahamu!” Ne Aburahamu nakalusia, “Ndi hano.”

²Nyasaye naboola, “Bukula omwanawo omutelwa Isaka, owa wayanza okhusila, otsie musibala sia Moria, khusikulu esianakhumanyie, omuhaane singa omusango khu ise.”

³Omukamba okwalondakhwo, nikusili m'mabwebwe, Aburahamu yarenya tsikhwi khulwomusango, nara emisiko khusikhili yiye, ma nabukula Isaka nende abakholi babili. Nibachiaka oluchendo okhutsia habundu ha Nyasaye yali namubooleye.

⁴Khwitukhu liakhataru Aburahamu yalola habundu tsana nasili ehale.

⁵Ma nabool'la abakholi babe, “Musikale hano nende epunda, ne nase nende omubuukha khutsie okhwekayakaya Nyasaye, ma khukalukhe.”

⁶Aburahamu natuukha Isaka tsikhwi, ne ye omwene nachinga om'bano nende elianda liokhuhambia omul'lo. Olwa bali nibatsitsanga,

⁷Isaka naboola mbu, “Papa!” Naye nakalusia mbu, “Yee, omwana wanje.” Isaka nareeba, “Ndolanga noli nende amanda komul'lo ma nende tsikhwi, ne likondi liomusango lilihena?”

⁸Aburahamu nakalusia, “Nyasaye omwene yeetsa okhuhaana.” Ma bombi babili nibatsilil'la noluchendo halala.

⁹Olwa boola habundu aha Nyasaye yali namubooleye, Aburahamu yombokha olusambwa ma naloosiakhwo tsikhwi. Naboha omwanawe ma namura khulusambwa, khutsikhwi ikulu.

¹⁰Ma nabukula om'bano okwokhumwira.

¹¹Nebutswa om'malaika wo MWAMI nalanga okhurula mwikulu, “Aburahamu, Aburahamu!” Naye nakalusia, “Yee, ndi hano.”

¹²Nyasaye namubool'la, “Orasaalisia omubukhawo tawe, kata oramukhol'lakhwo ling'ana liosi tawe. Bulano manyile mbu oriitsanga Nyasaye, sichila siunyimile omwanawo tawe.”

¹³Aburahamu nasukhana ne nalola likondi nilihan'nde tsinzika musitsakha. Natsia nalibukula ma nalihaana singa omusango omusambe musilenje siomwanawe.

¹⁴Aburahamu nakulikha habundu yaho eliira mbu, “OMWAMI nahaane.” Ne okhwola leelo abandu baboolanga, “Khusikulu sio MWAMI, ye nahaane.”

¹⁵Om'malaika wo MWAMI yalanga Aburahamu olwakhabili okhurula mwikulu,

¹⁶naboola mbu, “OMWAMI aboolanga, ‘Ndesuhanga khuliira lianje omwene mbu ndakhakhuhe ikhabi sichila ukhol'le kano ma siunyimile omwanawo omutelwa tawe.

¹⁷Khusubisinjia mbu ndakhenjihie olwibulo lulwo singa tsinyininyini tsiokhwikulu, nohomba singa omuyekhe okwokhuluchinga lweinyanza. Olwibulolwo lulileka abasuku balwo.

¹⁸Tsimbia tsiosi tsiakhaareebe okhutsilaamila tsikhabi singa namiiye abolwibulolwo tsikhabi, sichila wali okhuhul'la amalako kanje.’ ”

¹⁹Aburahamu nakalukha khubakholibe, ma nibatsia bosi Berisheba, ewa Aburahamu yamenya.

²⁰Inyuma wamang'ana yako Aburahamu yahul'la mbu Milika mukha Nahori omwana wabwe wayibula abaanamunane,

²¹Usi omwana wokhuranga, Busi omwana wabwe, Kemueli samwana Aramu,

²²Kesedi, Haso, Pilidashi, Yidilafi, nende Betsweli.

²³Betsweli niye owali samwana Rebeka. Yaba nibo abaana munane aba Milika yebul'la Nahori, omwana wanga Aburahamu.

²⁴Reuma omukhasi wa Nahori yali niyabikha naye niyebula Teba, Gahamu, Tahashi, nende Maaka.