Read lunyore OKHUCHIAKA 23 Bible Online

OKHUCHIAKA 23 - lunyore bible

OKHUCHIAKA 23

¹Sara yamenya emihika emia ndala amakhumi kabili nende chine nachitaru.

²Yafwila musibala sia Kiriatsi Arabba, esilangwanga leelo mbu Heburoni, musibala sia Kanaani, ma Aburahamu niyekhuula okhusila khulwa okhufwa khwa Sara.

³Aburahamu narula ahomufuwe yali nali, natsia khu Bahiti, naboola mbu,

⁴“Ise ndi omucheni butswa omenyele muinywe, mungusiekhwo liloba elianzabilamwo omukhasi wanje.”

⁵Abahiti nibakalusia mbu,

⁶“Khuhul'le Omwami, ibe oli omukhulundu, owakhuhengangakhwo singa omwemeli omukhongo. Oyabile omukhasiwo mubilindwa biefwe ebichoomekhe. Sialiho omundu khu ifwe owakhakhwima esilindwa siokhuyabilamwo omufuwo tawe.”

⁷Ma Aburahamu nabenamila,

⁸naboola mbu, “Nimuba nimuhuchiliye mbu nzabile omufu wanje hano, yanze mureebele Efuroni omwana wa Sohari

⁹yangusie olwangaywa lwa Makipela, oluli ahembi khundulo khwomukunda kukwe. Mumureebe yangusichis'sie khubukusi bwatooto, imbeli wenywe, kho libe liloba lianje eliandakhakhola okhuba eliebilindwa.”

¹⁰Efuroni mwene yali niyekhaye nende Abahiti basie mumukhung'ano, nakalusia abandu bosi nibahul'langa abali nibali musilibwa sielitaala, naboola mbu,

¹¹“Umbuyie bulahi omwami. Naakhuhe omukunda yikwo kwosi nende olwangaywa lulimwo. Khuheelanga imbeli wabandu banje bano bosi, khe obe onyala okhuyabilamwo omukhasiwo.”

¹²Aburahamu niyenama imbeli wa Bahiti

¹³ma nabool'la Efuroni, buli mundu nahul'langa mbu, “Noyanza umbul'le, nyenya ngule omukunda yikwo kwosi. Bukula omurungo kwobukusi bwomukunda, ma nzabilemwo omufu wanje.”

¹⁴Efuroni nakalusia mbu,

¹⁵“Omwami, obukusi bwomukunda yikwo nebitonye biefetsa ebihela etsimia tsine, nabio nisina hakari wanje n'nawe? Yabilamwo omukhasiwo.”

¹⁶Aburahamu nahuchiil'la amang'ana ka Efuroni, ma namuchel'la ebitonye biefetsa ebiayali naral'le imbeli wabandu bosi khubukusi obwarumikhilwanga nende abakholi beinganga.

¹⁷Nimbwo omukunda kwa Efuroni okwalinji Makipela, ebukwe wa Mamure, kwamala nikuba okwa Aburahamu. Kwalimwo omukunda, nende imbinga, ma nende emisaala chiosi okhwola khulwakho lwakwo.

¹⁸Biosi biamanyikha singa emiandu chia Aburahamu khu Bahiti bosi abali nibetsele mumukhung'ano.

¹⁹Aburahamu nayabila omukhasiwe Sara mumbinga yimwo eli musibala sia Kanaani.

²⁰Kho esibala esialinji esia Abahiti nende imbinga eyalimwo, biamala nibiba omwandu kwa Aburahamu khulwokhuba liloba liokhuyabilamwo abafu.