Read lunyore OKHUCHIAKA 24 Bible Online

OKHUCHIAKA 24 - lunyore bible

OKHUCHIAKA 24

¹Aburahamu yali niyasakhuye okhusila, ne OMWAMI yali niyamulaamila tsikhabi mukosi akayakholanga.

²Nabool'la omukholiwe owali omukhulundu khubosi ma khandi owali niyasinjil'la ebindu biosi ebiayali n'nabio mbu, “Nyenyanga ore omukhono kukwo mumarango[9] kanje,

³ma wesuuhe muliira lio MWAMI, Nyasaye welikulu nende esibala mbu siwakhel'lekhwo omwana wanje omukhasi okhurula mubakhaana ba Bakanaani bandamenyamwo tawe.

⁴Ne wakhatsie musibala siandebul'lwamwo ma olanyool'lemwo omwana wanje Isaka omukhasi okhurula mubekho befwe.”

⁵Nebutswa omukholi uyo nareeba, “Ne nikakhaba mbu omukhaana tsana yakhasuula okhwitsa n'nase musibala sino, ndakhabukula omwanawo ndamukalusia musibala siawarulamwo noho?”

⁶Aburahamu namubool'la mbu, “Orakhakalusiakhwo omwana wanje musibala yisio tawe.

⁷OMWAMI, Nyasaye welikulu yambinia mungo mwa papa, khandi musibala siandebul'lwamwo, ma niyandaka butinyu mbu yakhaheelesie olwibulo lwanje esibala sino. Narume om'malaika imbeliwo, ma nonyoole omukhasi khulwa omusiani wanje.

⁸Nikakhaba omukhaana siyakhahuchil'la okhwitsa n'nawe tawe, ne oba omulakhuule khusilakamunwa yisi. Nebutswa orakhakalusiakhwo omwana wanje ebwene iyio tawe.”

⁹Khe omukholi uyo yamala nara omukhonokwe mumarango ka Aburahamu, omwamiwe, ma namwesuhila khumang'ana yako.

¹⁰Omukholi uyo owalindanga emiandu chia Aburahamu yamala nabukula tsingamia tsiomwamiwe likhumi, ma narula natsia Mesopotamia mwitaala lia Nahori yamenyangamwo.

¹¹Olwa yoolayo, yasikamia tsingamia ahembi nende esitaho esioba welitookho. Tsiali etsisaa tsiokhumukolooba olwa bakhasi betsanga okhwenda amaatsi musitaho.

¹²Nasaaya naboola mbu, “OMWAMI Nyasaye, womwami wanje Aburahamu, khusaayanga mbu unyal'le litukhu lino ma ohesie esilakamunwasio khu mwami wanje Aburahamu.

¹³Lola ndi khusitaho siamaatsi esiabakhaana bomwitookho muno betsa okhutahamwo amaatsi.

¹⁴Omukhaana wanambool'le khubo mbu, ‘Noyanza ruula isongoyo umbekhwo amaatsi nywe,’ naye naboola, ‘Nywa, khandi nzia khunywesia tsingamia tsitsio,’ nabe niye owaweleye omurumikhiliwo Isaka. Nase namanye mbu umubeeleye esirenda Omwami wanje.”

¹⁵Olwayali nasisaaya, Rebeka yoolaho nende isongo yamaatsi khumurwekwe. Rebeka yali omwana wa Betsweli, owali omwana womusiani wanga Aburahamu owalangwa Nahori halala nomukhasiwe Milika.

¹⁶Yali omukhaana welikondo lilahi okhusila ma nasili okhubakhwo nomusaatsa wosi tawe. Yakongoma musitaho, nataha amaatsi musongoye ma nachaaka oluchendo lwokhukalukha ingo.

¹⁷Omukholi wa Aburahamu natsia tsimbilo okhumwakan'na namubool'la mbu, “Noyanza mbeekhwo amaatsi musongo nywe.”

¹⁸Naye naboola, “Nywakhwo, omwami,” ne naruula isongo okhurula khwibeka namutiil'la ma nanywa.

¹⁹Olwayali namal'le okhunywa omukhaana naboola, “Lekha ndahile tsingamia tsitsio amaatsi natsio tsinywe katsihele.”

²⁰Natsukha bwangu amaatsi kali musongoye mulukalayi lwamaatsi ma niyelukha natsia okhusomba amaatsi kandi okhwola olwe tsingamia tsiosi tsiali nitsinyweye.

²¹Omusaatsa uyo naye yamuhenga butswa nabun'ne alole nikali OMWAMI umulombeye oluchendo lulwe.

²²Olwomukhaana uyo yali namal'le okhunywesia tsingamia tsiosi, omusaatsa uyo yahiinia epete yetsahabu eyobukusi obukali nende emikasa chibili echiokhura khumukhono.

²³Namureeba mbu, “Oli omukhaana wa wiina? Yanza umbool'le nikali obweyangu bulikhwo munyumba yenywe obwakhwakhakonamwo.”

²⁴Omukhaana nakalusia mbu, “Ise ndi omukhaana wa Betsweli omwana wa Nahori nende Milika.

²⁵Khulikhwo nende amasakhwe nende ebiokhulia bietsingamia ma khandi khuli nende habundu aheinywe munyala okhukona.”

²⁶Omusaatsa uyo nasikama hasi niyetsoomia OMWAMI.

²⁷Yaboola mbu, “OMWAMI, Nyasaye womwami wanje Aburahamu yetsoomibwe, okhuba uhesisie esilakamunwa sisie khu Mwami wanje. OMWAMI unyemeleye okhwola khubekho bomwami wanje.”

²⁸Omukhaana uyo niyelukha tsimbilo natsia nabool'la abali munyumba ya nyina amang'ana yako kosi.

²⁹Ne Rebeka yali nende omwana wabwe owalangwa Labani, owarula tsimbilo natsia khusitaho ahomukholi wa Aburahamu yali.

³⁰Labani yali naluutsi epete nende emikasa khumakhono komukhaana wabwe ma nahuliiye amang'ana komusaatsa uyo yali nabooye. Natsia khumukholi wa Aburahamu, owali nasinjiiye ahembi netsingamiatsie hasitaho.

³¹Ne namubool'la mbu, “Witse khutsie n'nawe ingo. Oli omundu owa Nyasaye yahelesia tsikhabi. Busina osinjiye hano? Mal'le okhukhulombela habundu hokhukona khandi nombeeye tsingamiatsio obweyangu.”

³²Kho omundu uyo niyenjila munyumba, ne Labani nabohol'la ebiali khutsingamia ma natsihelesia amasakhwe. Ma naleer'ra omukholi wa Aburahamu halala nende abandube amaatsi kokhwesaaba ebilenje.

³³Olwebiakhulia bialerwa omundu uyo naboola mbu, “Sindiakhwo nisili okhuboola akandi n'nako tawe.” Labani naboola, “Khakaboolekhwo khul'le.”

³⁴Naye naboola mbu, “Ise ndi omukholi wa Aburahamu.

³⁵OMWAMI wahelesia omwami wanje tsikhabi tsinyinji ma wamukhola okhuba omuhinda. Womuhelesia amakondi nende tsimbusi, tsing'ombe, efetsa, etsahabu abasumba bes'saatsa nende abesikhasi, tsingamia ma nende etsipunda.

³⁶Sara, omukhasi womwami wanje yamwibul'la omwana mubusiele bubwe, ne omwami wanje wahelesia omwanawe uyo ebindu biosi ebiali n'nabio.

³⁷Omwami wanje yandesuhila naboola mbu, ‘Orakhaler'rakhwo omwana wanje omukhasi okhurula mubakhaana Abakanaani tawe.

³⁸Nebutswa otsie musibala siefwe, musibala siabeekho banje, wel'lemwo omwana wanje omukhasi.’

³⁹Nase nireeba omwami wanje mbu, ‘Ne omukhaana tsana naba nasuula okhwitsa n'nase ndakhakhola mbwena?’

⁴⁰Naye niyambool'la mbu ‘OMWAMI owambulilanga khasotso narume om'malaikawe nakhulombele injila ma nonyool'le omwana wanje omukhasi okhurula mubandu befwe bene, abebule ba papa wanje.

⁴¹Niwakhoola mubekho banje ma nibakhusuula, noba omulakhuule musietsubo sianje!’

⁴²Olwa ndaali okhwola khusitaho n'nondi, ndaali okhusaaya nimboola mbu, ‘OMWAMI Nyasaye womwami wanje Aburahamu, umbechis'sie kosi akandikhwo.

⁴³Lola ndi khusitaho siamaatsi, olwa omukhaana yetsa okhutaha amaatsi namureebe niyakhambakhwo amaatsi kokhunywa okhurula musongoye.

⁴⁴Niyakhahuchil'la ma yambe amaatsi nywe ma khandi aleer'rekhwo tsingamia tsianje, abe niye owa OMWAMI yahuye okhuba omukhasi womwana womwami wanje!’

⁴⁵Olwa ndaali nisili okhumala lisaayo lianje, Rebeka amal'le niyetsa nende isongo yamaatsi khumurwekwe nabira natsia musitaho okhwenda amaatsi. Mal'le nimubool'la mbu, ‘Yanza umbekhwo amaatsi nywe.’

⁴⁶Yanguhile okhwisia isongoye okhurula khumurwe niyambool'la mbu, ‘Nywa, khandi nzia okhunywesia tsingamia tsitsio.’ Ma ninywa, khandi nanywesia tsingamia tsianje.

⁴⁷Mal'le nimureeba mbu, ‘Oli omwana wa wina?’ Naye niyangalusia mbu, ‘Ise ndi omwana wa Betsweli nende Milika!’ Ma nimura epete m'moolu nende emikasa khumakhono.

⁴⁸Nisikama hasi ninzitsoomia OMWAMI Nyasaye womwami wanje Aburahamu owainyemeleye okhwitsa mubekho bomwami wanje, abanyooyemwo omukhaana owanotekhele omusiani womwami wanje.

⁴⁹Kho luno nimwakhenya okhukhol'la omwami wanje akesirenda nende obwatooto mumbool'le, ne nikaralimbwo tawe ma ndole ahanzia, khandi ndole obwakhola.”

⁵⁰Labani nende Betsweli nibakalusia, “Khulwa mbu amang'ana kano karul'le khu MWAMI, sikali akefwe okhukhalaka tawe.

⁵¹Rebeka ngwoyu, mubukule otsie n'naye, abe omukhasi womwana wo Mwamiwe singa obwo MWAMI mwene yabooye.”

⁵²Olwomukholi wa Aburahamu yahul'la amang'ana kabwe, yenama hasi niyetsoomia OMWAMI.

⁵³Ma nahiinia tsingubo nende omukasa nefetsa nahelesia Rebeka. Khandi nahaana ebihanwa biobukusi obukali khumusiani wabwe nende nyina.

⁵⁴Ma omukholi wa Aburahamu nende abandu abayali n'nabo nibalia, nibanywa ma nibakonayo. Olwa babuukha mukamba tsuli yaboola mbu, “Musebule ngalukhe homwami wanje.”

⁵⁵Nebutswa omusiani wanga Rebeka nende nyina nibaboola mbu, “Lekha, omukhaana akhole nasimenya n'nefwe lihonga elala nohomba amatukhu likhumi, khe nayetse.”

⁵⁶Naye naboola mbu, “Muranjelebia tawe. OMWAMI yakasisie oluchendo lwanje, inywe mulekhe ngalukhe ewo MWAMI wanje.”

⁵⁷Nabo nibakalusia, “Lekha khulange omukhaana mwene khulole obwaboola.”

⁵⁸Ma nibalanga Rebeka nibamureeba, “Wenyanga otsie nende omusaatsa uyu?” Naye nakalusia “Yee, ndatsia n'naye.”

⁵⁹Ma nibaseebula Rebeka nende omukholi wamulela nibarula nende omutiiyi wa Aburahamu ma nende abayali n'nabo.

⁶⁰Nibalaamila Rebeka tsikhabi nibaboola, “Mukhaana wefwe, obe nyina amakhumi kebikhumila! Abolwibulo lulwo balaleke amataala kabasuku babwe!”

⁶¹Ma Rebeka nende abakhaana bayali n'nabo nibarula nibaniina khutsingamia nibalondana nende omukholi wa Aburahamu, nibachaaka oluchendo.

⁶²Isaka yali niyetsele musitsiimi sia Beeri Lahai Roi[10], ne yali niyamenya enandete wesibala sia Kanaani.

⁶³Yarula hamukolooba natsia okhuchenda m'mukunda ne nalola tsingamia nitsiitsanga.

⁶⁴Olwa Rebeka yalola Isaka, yeekha okhurula khungamia yiye

⁶⁵ne nareeba omukholi wa Aburahamu, “Niwina owitsanga okhukhwakaan'na ula?” Omukholi naye naboola mbu, “No mwami wanje?” Ma Rebeka nabukula olububi niyefunikha m'moni.

⁶⁶Omukholi nabool'la Isaka kosi akayali nakhol'le.

⁶⁷Ma Isaka niyenjisia Rebeka mwiheema elia Sara nyina mwana yamenyangamwo, naba omukhasiwe. Isaka yayanza Rebeka ma nalemibwa omwoyo khukhufwa khwa nyina.