Read lunyore OKHUCHIAKA 25 Bible Online

OKHUCHIAKA 25 - lunyore bible

OKHUCHIAKA 25

¹Aburahamu yaleera omukhasi undi owalangwa Ketura.

²Yamwibul'la Simurani, Yokoshani, Medani, Midiani, Ishibaki, nende Shuha.

³Yokoshani naye yebula Sheba nende Dedani. Abaana ba Dedani nabo nibaba Ashurimu, Letushimu, nende Leumimu.

⁴Abaana ba Midiani bali Efa, Eferi, Hanoki, Abida, nende Eledaa. Bano bosi bali abaana bolwibulo lwa Ketura.

⁵Aburahamu yahelesia Isaka ebindu biosi ebiayali n'nabio,

⁶nebutswa yahelesia abaana babakhasibe bandi ebihanwa nasili mwoyo. Ma nabahiinia nibatsia musibala siebukwe, ehale okhurula ahomwanawe Isaka yali.

⁷Aburahamu yamenya nali nende emihika emia ndala nende amakhumi kane nakataru nende chirano.

⁸Yafwa nali omusakhulu wemihika emilahi ma nayabilwa singa abakukabe.

⁹Abaanabe Isaka nende Ishimaeli bamuyabila mulwangaywa lwa Makapela, oluli imbeli wa Mamure musianyi siali sia Efuroni omwana wa Sohari Omuhiti.

¹⁰Yisio nisio esianyi esia Aburahamu yakula okhurula khuba Bahiti, ma Aburahamu nende omukhasiwe Sara bayabilwamwo.

¹¹Olunyuma lwokhufwa khwa Aburahamu, Nyasaye yalaamila Isaka omwanawe ikhabi, Isaka yamenyanga ahembi nende Beeri Lahai Roi.

¹²Ishimaeli owa Hagari, omukhaana Omumisiri owali omusumba wa Sara yebul'la Aburahamu.

¹³Yali nabaana abalondakhwo bano, okhulondokhana mukhwibulwa khwabwe: Nebayotsi, Kedari, Abideeli, Mibisamu,

¹⁴Mishima, Duma, Mabi,

¹⁵Hadadi, Tema, Yeturi, Nafishi, nende Kedema.

¹⁶Nibo abaana ba Ishimaeli abachiakia tsinzibulo likhumi na tsibili, ne amera kaabwe kakulikhwa amataala kabwe nende amaheema kabwe.

¹⁷Ishimaeli yafwa nali nende emihika emia ndala nende amakhumi kataru nende chine nachitaru.

¹⁸Abolwibulo lwa Ishimaeli bamenyanga musibala sili hakari wa Hawila nende Shuri, ebukwe we Misiri khunjila yokhutsia Asiria. Bamenyanga ehale okhurula khubaana babwe bandi bosi abolwibulo lwa Aburahamu.

¹⁹Tsino nitsio tsinzibulo etsiomwana wa Aburahamu owalangwa Isaka.

²⁰Isaka yali nemihika amakhumi kane olwa yaleera Rebeka, omukhaana wa Betsweli Omwaramu okhurula Mesopotamia, owali omukhaana wanga Labani.

²¹Sichila mbu Rebeka yali omukumba Isaka yamusaayila khu MWAMI. OMWAMI yahul'la amasaayoke ma Rebeka nabelekha.

²²Nikaba mbu nayebule amakhwana, ne olwa abaana yabo bali nibasili okhwibulwa balwan'na mundaye. Naboola mbu, “Nisina esichil'le kano nikekhola khu ise?” Ma natsia okhureeba OMWAMI esifune.

²³OMWAMI namubool'la mbu, “Tsimbia tsibili tsili mundamwo. Wakhebule tsinzibulo tsibili etsiakhahinganenje. Olwibulo l'lala lwakhabe netsingufu okhuyomba olundi. Omukhulundu yakharumikhile omutu.”

²⁴Litukhu liokhwibula lioola, ma niyebula abaana abasiani babili.

²⁵Owokhuranga yali omwakhanyu, ne yali nende om'bili singa ingubo yobwoya, ma namukulikha Esau.

²⁶Owakhabili yarula nahand'e khus'sisilo sia Esau, ma namukulikha Yakobo. Isaka yali nemihika amakhumi kasasaba olwabaana yabo bebulwa.

²⁷Abaana yabo nibakhula, ne Esau naba Omuhitsi omulahi, omundu owayanza obulamu bwomusitsiimi, nebutswa Yakobo naba omundu om'buni owayanza okhuhonga hango.

²⁸Isaka yayanza Esau sichila yalitsanga khunyama tsiayeeranga, ne Rebeka naye nayanza Yakobo.

²⁹Litukhu elala olwa Yakobo yali natekhanga esitiani, Esau yenjila narula okhuhiima. Yali neinzala okhusila

³⁰ma nabool'la Yakobo mbu, “Mbul'langa nindi neinzala okhusila, yanza umbekhwo esitiani siolombanga esiakhanyu yisio.” (Niko akachila nalangwa Edomu[11]).

³¹Yakobo namubool'la mbu, “Nyala okhukhuhaakhwo nikali wakhambelesia ikhabiyo eyobukhulundu bwokhwibulwa.”

³²Esau naboola mbu, “Ise luno ndi ahembi okhufwa, ikhabi yobukhulundu naingasile sina?”

³³Yakobo nakalusia mbu, “Ranga undesuhile mbu umbeetsanga ikhabi yiyo yobukhulundu.” Esau niyesuha ma nakusia ikhabiye yobukhulundu khu Yakobo.

³⁴Ma Yakobo namuha obusuma nende esitiani. Nalia ma nanywa, ma narula natsia. Nimbwo Esau yachaaya akeikhabi eyobukhulundu bwokhwibulwakhwe.