Read lunyore OKHUCHIAKA 26 Bible Online

OKHUCHIAKA 26 - lunyore bible

OKHUCHIAKA 26

¹Inzala yindi yali musibala eralikhwoho olwokhuranga mumatukhu ka Aburahamu tawe. Isaka natsia khu Abimeleki, omuruchi wa Abafilisiti musibala sia Kerari.

²OMWAMI yali nalolekheeye Isaka ma namubooleye mbu, “Orakhatsia Emisiri tawe, omenye musibala sino ahanakhubool'le omenye.

³Omenye hano ne nambe n'nawe ma nakhulaamile ikhabi nambaane eb'bala yibi biosi khuibe nende olwibulo lulwo. Ndakhahesie akandasubisia papawo Aburahamu.

⁴Ndakhakalihie olwibulolwo singa tsinyininyini tsiokhwikulu ma ndakhabahelesie eb'bala bino biosi. Tsimbia tsiosi tsiakhaareebe okhutsihelesia tsikhabi singa etsiandihelesia olwibulo lulwo.

⁵Ndakhakhuhe tsikhabi, sichila Aburahamu yambul'la ma nalonda amalako kanje nende amebaalo kanje.”

⁶Ma Isaka namenya Kerari.

⁷Olwabandu bamureebanga khukomukhasiwe, ne aboola mbu nomukhaana wabwe. Siyahuchil'langa mbu nomukhasiwe tawe sichila yariitsanga mbu abandu bakhamwira khulwa Rebeka, owali nelikondo lilahi okhusila.

⁸Olwa Isaka yali niyamenyeleyo amatukhu amenji, omuruchi Abimeleki yahenjel'la mwitilisa ne nalola Isaka nakwakanga Rebeka.

⁹Abimeleki naruma Isaka alangwe ma namubool'la mbu, “Khane uyo nomukhasiwo! Busina noboola nomukhaana wenywe?” Isaka nakalusia mbu, “Ndapaalanga ndakheerwa nimba nimboola nomukhasi wanje.”

¹⁰Abimeleki namureeba mbu, “Neling'ana sina elia okhukholeye lino? Mulala khubandu banje yakhakon'ne nende omukhasiwo ma esiina siakhakhufiliiye ibe omwene.”

¹¹Ma Abimeleki nalaka abandu bosi nababool'la mbu, “Omundu wosi nakhol'lakhwo uno nohomba omukhasiwe obubi, yakherwe.”

¹²Isaka yaraaka imwo musibala yisio, ma omuhika yikwo nachesa ebindu ebinji ebiyomba ebiayaraka esia emia ndala, sichila OMWAMI yomuhelesia tsikhabi.

¹³Yatsilil'la okhumeetekha nemiandu ma naba omuhinda okhusila.

¹⁴Ne sichila yali nende emiruko chiamakondi, tsing'ombe ma nende abakholi abenji hangohe Abafilisiti bamala nibasiendekha.

¹⁵Ma nibeekala ebitaho biosi ebiabakholi ba samwanawe Aburahamu bali nibayaba olwa Aburahamu yali nasili mwoyo.

¹⁶Ma Abimeleki nabool'la Isaka mbu, “Orule musibala siefwe sino. Umal'le okhuba nende tsingufu okhukhuyomba.”

¹⁷Khe Isaka yamala narulayo ne nalomba amaheemake Mwibanda lia Kerari, ma namenyamwo.

¹⁸Nayabul'la ebitaho ebiali nibiayabwa mumatukhu ka Aburahamu, ebia Abafilisiti bali nibekala olwa Aburahamu yafwa. Isaka yakulikha ebitaho yibio amera akasamwana yali niyabikulikha.

¹⁹Abakholi ba Isaka bayaba esitaho mwibanda nibanyoola amaatsi.

²⁰Abaayi ba Kerari basoolana nende abaayi ba Isaka, nibaboola, “Amaatsi kano nakefwe.” Ma Isaka nakulikha esitaho yisi Isaka sichila basoolan'naho n'naye.

²¹Abakholi ba Isaka nibayaba esitaho sindi ne nibasoolan'na khusiene yisio khandi, ma nasikulikha, Sitina[12].

²²Narulaho natsia haundi ma nayaba esitaho sindi. Esiene yisi sibasoolan'nakhwo tawe, ma nasikulikha Rehobotsi[13]. Naboola mbu, “Luno OMWAMI ukhuheeye obulakhuule khumenye musibala sino, ma nakhuhindihal'lemwo.”

²³Isaka yarulaho natsia Berisheba[14]

²⁴OMWAMI namulolekhela obutukhu yibwo namubool'la, “Ise nise Nyasaye wa papawo Aburahamu. Oraria tawe, okhuba ndi n'nawe. Nakhuhelesie tsikhabi ma nanyinjihie olwibulolwo okhulondokhana nende lisubisio lianje khumurumikhili wanje Aburahamu.”

²⁵Isaka niyombokha olusambwa habwene yaho niyekayakayilaho OMWAMI. Ma niyombokhaho liheemalie ne abakholibe nibayaba esitaho sindi.

²⁶Abimeleki yarula Kerari nibali nende Ahusatsi omuchetsihiwe nende Fikoli omwemeli wamahe, nibeetsa okhulola Isaka.

²⁷Ma Isaka nareeba mbu, “Busina mwitsile okhundola ne mwasuula ma nimundaabia musibala sienywe?”

²⁸Nabo nibakalusia mbu, “Luno khumanyile mbu OMWAMI ali n'nawe, ne khuluutsi mbu khube nende obuhuchilisanie hakari wefwe. Khwenyanga okhusubisie

²⁹mbu sinokhukhol'lekhwo obubi bwosi, singa obwakhwakhukhol'la obubi tawe. Khwakhukhol'la bulahi nikhukhulekha nomulembe. Luno kali butswa kol'lani mbu OMWAMI wakhuha ibe ikhabi.”

³⁰Isaka nabateekhela lisabo ma nibalia khandi nibanywa.

³¹Omukamba okwalondakhwo nikusili m'mabwebwe nibesuhan'na amasubisio kabwe. Isaka nasebulana n'nabo ma nibarula nomulembe.

³²Khwitukhu liene yilio abakholi ba Isaka beetsa nibamubool'la akesitaho siabali nibayabile. Nibaboola mbu, “Khunyooye amaatsi.”

³³Nakulikha esitaho yisio Sheba[15]. Nimbwo litaala lia Berisheba lianyoola eliira.

³⁴Olwa Esau yali nemihika amakhumi kane yaleera abakhasi bandi babili abakhaana Abahiti, Yuditsi omukhaana wa Beeri, nende Basematsi omukhaana wa Eloni.

³⁵Bakhola obulamu bwa Isaka nende Rebeka okhuba obutinyu okhusila.