Read lunyore OKHUCHIAKA 27 Bible Online

OKHUCHIAKA 27 - lunyore bible

OKHUCHIAKA 27

¹Isaka yali niyakhunguhile ma tsimonitsie nitsiabofula. Narumana mbu omusianiwe omukhulundu Esau alangwe, ma namubool'la, “Mwana wanje!” Naye nakalusia, “Ndi hano.”

²Isaka naboola, “Singa ololanga ise ndakhunguhile, ndi ahembi okhufwa.

³Bukula obuyingobwo nende tsisele otsie m'mutsuru okhuhiima ma unzir're esolo.

⁴Ma witse unombele ebiakhulia ebilahi ebiandayanza, under're ndie. Nindakhalia nzia okhukhulaamila ikhabi yokhumal'likha nisili okhufwa.”

⁵Olwa Isaka yal'lomanga nende Esau, Rebeka yali nahul'langa. Khe olwa Esau yarula natsia okhuhiima,

⁶Rebeka nabool'la Yakobo mbu, “Mbuliye papawo nabool'langa Esau mbu,

⁷‘Under're inyama ma undekhele. Nindakhalia, nzia okhukhuhelesia tsikhabi imbeli wo MWAMI nisili okhufwa!’

⁸Kho luno mwana wanje ohul'le akakhubool'la ma okhole.

⁹Otsie mubiayo ma wele ebimeme ebilahi b'bili ebietsimbusi, mbiteekhe, ma nombe ebiakhulia ebilahi ebia papawo yayanza okhusila.

¹⁰Witsa okhumuhil'la alie, ma akhuhelesie tsikhabitsie nasili okhufwa.”

¹¹Nebutswa Yakobo yabool'la nyina mbu, “Ibe umanyile Esau nomundu oli nende amaswa khum'bili kukwe, ne nase ndi nende om'bili omurel'le.

¹²Haundi papa anyala okhumbabasiakhwo ma amanye mbu mukaatanga. Ma ndakhanyoola esilaamo musilenje siokhunyoola tsikhabi.”

¹³Nyina nakalusia mbu, “Esilaamo siosi esiakheetsa khu ibe sikwe khu ise, omwana wanje, ibe okhole butswa singa mbooye, ma otsie under're tsimbusi.”

¹⁴Ma natsia naleer'ra nyina tsimbusi. Ma naye nateekha ebiakhulia ebilahi ebiapapawe yayanza.

¹⁵Ma nabukula tsingubo tsia Esau tsindahi, etsiayali niyabikha munyumba nabiikha Yakobo.

¹⁶Nara amaseelo kebimeme biamakondi mumakhono ka Yakobo nende khwikosi eliali lirel'le.

¹⁷Namuhelesia ebiakhulia ebilahi, halala nende obusuma obwayali nafuchile.

¹⁸Ma Yakobo natsia khusamwana naboola, “Papa.” Naye nakalusia mbu, “Yee, niwe wina, omwana wanje?”

¹⁹Yakobo nakalusia mbu, “Nise Esau omwanawo omukhulundu, ndakhakhola singa umbooleye. Buukha wikhale olie khunyama yakhuleereye, khe unaamile tsikhabi.”

²⁰Isaka namureeba mbu, “Otsinyooye mbwena bwangu, mwana wanje?” Yakobo nakalusia mbu, “OMWAMI Nyasayewo yakhonyele okhutsinyoola bwangu.”

²¹Isaka nabool'la Yakobo, “Yanza wesute ahembi khuhabasiekhwo. Tooto niwe Esau?”

²²Yakobo niyesuta ahembi khu samwana, naye namuhabaasiakhwo ma naboola mbu, “Omwoyokwo kufwananga okwa Yakobo, nebutswa amakhono kafwananga aka Esau.”

²³Siyali onyala okhumanya ni Yakobo tawe, sichila amakhonoke kalikhwo amaswa singa aka Esau. Yali nali ahembi okhumuhelesia tsikhabi,

²⁴nebutswa namureeba khandi, “Tooto niwe Esau.” Naye nakalusia mbu, “Yee, nise.”

²⁵Isaka naboola mbu, “Sut'ta hano, inyama ndie. Nimal'le okhulia nekhuhelesia ikhabi yanje.” Yakobo namusut'ta inyama nalia, khandi namuhelesia ewaini, nanywa.

²⁶Ma samwana namubool'la mbu, “Esute ahembi unzunzuune, mwana wanje.”

²⁷Olwa yesuta ahembi okhumutsunzuuna ne Isaka nahul'la okhuhunya khwetsingubotsie, ma namulaamila tsikhabi. Naboola mbu, “Okhuhunya khwomwana wanje khufwana okhuhunya khwo omukunda okwo OMWAMI yalaamila ikhabi.

²⁸Nyasaye akhuhelesie liime okhurula mwikulu ma alombe lilobalio okhuba linolu. Akhuhelesie ebichese ebinji nende ewaini.

²⁹Tsimbia tsiabandu tsilakhutiiyilenje, ne abandu bakhwinamilenje. Oruche abeekho baabo bosi ma abolwibulo lwa mamawo bakhwinamilenje. Omundu wosi nakhulaama naye alaamwe; ne omundu wosi nakhusaayila ikhabi naye asaayilwe ikhabi.”

³⁰Isaka yamala okhulaamila Yakobo tsikhabi, ne olwa Yakobo yarula butswa, ne omusiani wabwe Esau niyenjila okhurula muluhitsi.

³¹Naye khandi nateekha ebiakhulia ebilahi nahil'la samwana. Naboola mbu, “Papa, yanza obuukhe olie inyama yakhuleereye, khe unaamile tsikhabi.”

³²Isaka namureeba, “Niwe wina?” Naye namukalusia mbu, “Nise Esau, omwanawo omukhulundu.”

³³Isaka nachaaka okhutechela om'bili kwosi, ma nareeba mbu, “Ne yaali wiina owir're esolo ma niyander'ra inyama? Ndiye nosili okhwitsa ma mulaamiye tsikhabi tsiosi, natsibetsenje etsisaie khasotso.”

³⁴Olwa Esau yahul'la amang'ana ka samwana, yalakaya okhusila ma nabool'la samwana, “Nase mbeekho ikhabi, papa!”

³⁵Isaka namukalusia mbu, “Omwana wenywe yetsele niyangaata ma ubukuuye ikhabiyo.”

³⁶Esau naboola mbu, “Luno nolwakhabili niyanuulanga obweyangu bwanje. Yalanjilwa khubwene Yakobo. Yabukula ikhabi yanje yobukhulundu, khandi leelo ubukuuye tsikhabi tsianje. Siundekheeyekhwo ikhabi nase tawe?”

³⁷Isaka nakalusia mbu, “Mal'le okhumukhola okhuba omukhongowo, ma khol'le abeekho baabe bosi okhuba abakholi baabe. Muheeye ebichese nende ewaini. Ma n'nondi sindikhwo nende akanyala okhukhukhol'la tawe, mwana wanje.”

³⁸Esau natsilil'la okhumuhombelesia samwana, “Oli butswa nende ikhabi ndala yonyene, papa? Nase saayilakhwo ikhabi, Papa.” Ma nachaaka okhulakaya.

³⁹Isaka namubool'la mbu, “Liime liomwikulu siliakhabeekhwo khuibe tawe. Khandi obunolu bwesibala siwakhabunyoolekhwo tawe.

⁴⁰Wakhamenyele olukanga lulwo, khandi oliba omurumikhili womwana wenywe, nebutswa olwolisuula akake ne orula muburuchibwe.”

⁴¹Esau yasuula omwana wabwe Yakobo, sichila samwana yomuhelesia tsikhabi. Napaala m'mwoyokwe mbu, “Amatukhu kamasika ka papa kali ahembi, nilwo olwa nanzire Yakobo.”

⁴²Ne olwa Rebeka yahul'la aka Esau yali nakanakananga, yalanga Yakobo ma namubool'la mbu, “Omwana wenywe Esau aloosianga okhukhwiira khulwokhurunga es'sialia.

⁴³Luno mwana wanje okhole akakhubool'la. Rula otsie ahomusiani wefwe musibala sia Harani,

⁴⁴omenye n'naye amatukhu mati; okhwola olwo oburima bwomwana wenywe buliyeela

⁴⁵ma alebil'le akawamukhol'la. Ma ndakharume omundu okhwitsa okhukhwenda. Busina ngosie abaana banje babili khwitukhu elala?”

⁴⁶Rebeka nabool'la Isaka, “Omwoyo kwanje kwachoonya khulwabakhaana Abahiti aba Esau yaleera yaba. Yakobo niyakhateesia khubakhaana Abahiti yaba bwakhaba obukhala ise fwe.”