Read lunyore OKHUCHIAKA 28 Bible Online

OKHUCHIAKA 28 - lunyore bible

OKHUCHIAKA 28

¹Isaka yalanga Yakobo, namulaamila ikhabi ma namubool'la mbu, “Orakhateesiakhwo omukhaana Omukanaani tawe.

²Otsie Mesopotamia, munyumba yakuukawo Betsweli, ma oteesie mulala khubakhaana bebwene yio, khubaana ba khotsawo Labani.

³Ne Nyasaye Wokhunyala Biosi akhuhelesie tsikhabi ma akhuhe abaana abenji, khe olabe samwana tsinzibulo tsinyinji.

⁴Akhuhelesie ikhabi nende olwibulo singa yahelesia Aburahamu ikhabi, ne obukule esibala sino, esiawamenyangamwo ma khandi esia Nyasaye yahelesia Aburahamu.”

⁵Isaka nasebula Yakobo okhutsia Mesopotamia, khu Labani, omwana wa Betsweli Omuaramu, omusiani wanga Rebeka, nyina Yakobo nende Esau.

⁶Esau yahul'la mbu Isaka ulaamiye Yakobo ikhabi ma umurumile Mesopotamia okhunyoolayo omukhasi. Khandi nahul'la mbu olwa Isaka yamulaamila ikhabi yam'bool'la alekhe okhuteesia omukhaana Omukanaani.

⁷Ma khandi nahul'la mbu Yakobo ahuliye akasamwana nende nyina ma natsia Mesopotamia.

⁸Esau yamanya nalola mbu Isaka samwana sayanzanga abakhaana Bakanaani tawe.

⁹Yamala natsia khu Ishimaeli omwana wa Aburahamu ma nateesia omukhaanawe owalangwa Mahalatsi, owali mbotsonyene Nebayotsi.

¹⁰Yakobo yarula Berisheba ma nachaaka oluchendo lwokhutsia Harani.

¹¹Olwa bwali m'bwiil'le yoola habundu hatsienukhu ma nahakamilaho. Nakona hasi ne nasichikha omurwekwe khwichina.

¹²Naloora mbu alolanga esirandaalo nisisinjiiye okhurula khusibala okhwola mwikulu, ne abamalaika nibaniinangakhwo ne nibeekha.

¹³Ne Omwami yali nasinjiiye hekulu khusirandaalo tsana, naboola mbu, “Ise nise OMWAMI, Nyasaye wa Aburahamu nende Isaka. Khuhelesianga ibe nende olwibulolwo esibala siokon'nekhwo sino.

¹⁴Olwibulolwo lwakhabe olwinji singa olukuukhi lwokhusibala. Lwakhalande tsimbeka tsiosi, ne mu ibe nende mulwibulolwo, ndakhalaamile tsinzibulo tiosi tsikhabi.

¹⁵Witsul'le mbu ndakhabe n'nawe, ma ndakhakhulinde hosi aholiba notsia, ma ndakhakhukalusie khwiloba yili. Sindikhulekhakhwo tawe okhwola olwandiba nimbesisie akandakhusubisia.”

¹⁶Yakobo yasimukukha mundoolo ma naboola mbu, “Khane OMWAMI ali habundu hano, nase simanyilekhwo tawe.”

¹⁷Naria okhusila, ma naboola mbu, “Habundu hano nahokhuriisia muno. Sihakhachweya okhuba inyumba ya Nyasaye tawe, khandi sino sifwananga esilibwa siomwikulu.”

¹⁸Yakobo yabuukha mukamba tsuli, nabukula lichina eliayali niyesichikhilenjekhwo omurwe, nalisinjisia singa esitsusio. Ma natsukhil'lakhwo amafura khulwa okhulihaana khu Nyasaye.

¹⁹Nakulikha habundu tsana Betseli[16]. Litaala yilio lialangwanga khale Lusi.

²⁰Ma Yakobo nalomba esietsubo khu Nyasaye, naboola mbu, “Niwakhaba n'nase ma nauninde muluchendo lwanje lwandikhwo luno ma khandi naumbelesie ebiakhulia nende ebiokhwebiikha,

²¹ne nindakhakalukha hango ha papa wanje nomulembe, ibe wakhaba Nyasaye wanje.

²²Lichina liesitsusio eliasinjisisie lino liakhabe habundu hokhukhwekayakayila, ne ndakhakhuhelesie esielikhumi siabuli esindu esiawakhambelesie.”