Read lunyore OKHUCHIAKA 29 Bible Online

OKHUCHIAKA 29 - lunyore bible

OKHUCHIAKA 29

¹Yakobo yatsilil'la noluchendolwe ma niyoola musibala siebukwe.

²Ne matetekhana yoola khusitaho siamaatsi nisili m'mukunda, ne ebiayo biamakondi bitaru nibikon'ne ahembi n'nasio. Ebiayo bianywesibwanga amaatsi okhurula musitaho tsana. Ne lichina likali liali khumunwa kwesitaho tsana.

³Ne lwosi olwe biayo biebunjikhanga khusitaho abaayi bahiinianga lichina ma banywesia ebiayo, ma khandi bakalusia lichina khumunwa kwesitaho.

⁴Yakobo nareeba abaayi, “Abalina banje, owenywe nihena?” Nabo nibakalusia, “Owefwe ni Harani.”

⁵Nareeba, “Mwamanya Labani omwana wa Nahori?” Nabo nibakalusia, “Yee, khwam'manya.”

⁶Nabareeba, “Nomulamu?” Nabo nibakalusia, “Nomulamu. Kata lola omukhaanawe Raheli niye owitsanga okhunywesia ebiayobie ula.”

⁷Yakobo naboola mbu, “Sichila kusili m'basu ma inyinga yokhuchelesia ebiayo esili okhwola, kenyekhanga munywesie amakondi ma mukakalusie musikuuri kaaye.”

⁸Nibakalusia mbu, “Sikhunyala okhunywesia tawe okhwola ebiayo biosi bileerwe ma lichina lihiinibwe khusitaho, khe khunywesie.”

⁹Olwa Yakobo yali nasiboola n'nabo, Raheli niyoola nende ebiayo biasamwana.

¹⁰Olwa Yakobo yalola Raheli nende amakondi ka Labani khotsanyene, yatsia khusitaho, nasukuma lichina, ma nanywesia amakondi.

¹¹Ma Yakobo natsunzuuna Raheli ne nalakaya khulwobusangali.

¹²Namubool'la, “Ise ndi omwikho wa papawo, omwana wa Rebeka.” Raheli niyelukha natsia okhubool'la samwana.

¹³Olwa Labani yahul'la aka Yakobo omwiwawe, yelukha tsimbilo natsia okhumwakan'na, namukwaka ma namutsunzuuna, ma namuleera munyumba. Olwa Yakobo yabool'la Labani kosi akali nikekhol'le,

¹⁴Labani yaboola mbu, “Tooto mwene oli likumba liom'bili kwanje khandi amatsahi kanje kene.” Yakobo namenyayo omwesi mulala.

¹⁵Labani yabool'la Yakobo mbu, “Sokwan'ne okhundiyila butswa sichila oli omwikho wanje tawe. Ololanga ndakhakhurunga sina?”

¹⁶Labani yali nabakhaana babili, omukhulundu yalangwanga Lea ne omutu Raheli.

¹⁷Lea yali netsimoni tsindekhele, nebutswa Raheli yali nomubili omulahi khandi owelikondo lilahi.

¹⁸Yakobo yayanza Raheli, ma naboola mbu, “Nakhukhol'lenje emilimo emihika chine nachitaru nikali wakhambuchilil'la okhuteesia Raheli.”

¹⁹Labani nakalusia mbu, “Bwakhaba obulahi ndamuhaana khuibe okhuyomba omundu undi. Menya hano n'nase.”

²⁰Yakobo nakhola emilimo emihika chine nachitaru khe abe onyala okhunyoola Raheli, ne nikafwana khuye singa amatukhu mati butswa, sichila yali niyamuyanza.

²¹Ma Yakobo nabool'la Labani mbu, “Ndamal'le amatukhu kawambelesia, luno nyenyanga okhuteesia omukhaanawo.”

²²Labani nalomba lisabo lies'selelo ma nalanga abandu bosi.

²³Nebutswa obutukhu yibwo musilenje siokhuhaana Raheli khu Yakobo, yahaana Lea, ma Yakobo naba n'naye.

²⁴Labani yahelesia Lea omukholiwe owalangwa Silipa abe owokhumutiiyilanga.

²⁵Olwa bwasia nilwo olwa Yakobo yamanya mbu aheywe Lea. Natsia khu Labani naboola mbu, “Busina niukhol'la mbwo? Ndakhutiiyiyenje khulwa Raheli. Busina niungaata?”

²⁶Labani nakalusia mbu, “Sikakholekhangakhwo musibala siefwe sino mbu omwana mutu abakhwe omukhulundu nasili tawe.

²⁷Linda lihonga lielisabo lihwe ma nakhuhelesie Raheli, nikali naundiyile emihika chindi chine nachitaru.”

²⁸Yakobo nahuchiil'la, ne olwe lihonga lielisabo liali nilihweye, Labani namubakhila omukhaanawe Raheli okhuba omukhasiwe.

²⁹Labani yahaana omukholiwe Biliha khu Raheli mbu amukhol'lenje emilimo.

³⁰Yakobo naba nende Raheli khandi, ne namuyanza okhuyomba Lea. Ma nakhol'la Labani emilimo emihika chindi chine nachitaru

³¹Olwa Nyasaye yalola mbu Yakobo siyayanza Lea singa Raheli tawe, namwikul'la okhunyoola abaana, nebutswa Raheli naba omukumba.

³²Lea nabelekha niyebula omwana omusiani ma naboola mbu, “OMWAMI uluutsi amanyakhano kanje, luno omusaatsa wanje nayanyanze.” Ma nakulikha omwanawe Rubeni.

³³Nabelekha khandi, ma niyebula omusiani undi, naboola mbu, “OMWAMI umbelesisie omusiani uno khandi sichila yahuliye sindayanzwa tawe,” ma namukulikha Simioni.

³⁴Khandi nabelekha ma niyebula omusiani undi. Naboola mbu, “Luno omusaatsa wanje nahambaane n'nase, sichila mwibuliye abasiani bataru,” ma namukulikha Lawi.

³⁵Ma khandi nabelekha ne niyebula omusiani undi. Naboola mbu, “Luno nanzitsoomie OMWAMI,” ma namukulikha Yuda, ma nasinjila okhwibula abaana.