Read lunyore OKHUCHIAKA 3 Bible Online

OKHUCHIAKA 3 - lunyore bible

OKHUCHIAKA 3

¹Ne inzokha yali niyalwenyukha okhuyomba tsinyama tsindi etsiom'bulimo etsia OMWAMI Nyasaye yalomba. Inzokha nereeba omukhasi mbu, “Nitooto mbu Nyasaye yam'bool'la mulekhe okhuliakhwo amatunde komusaala nalebe m'mukunda?”

²Omukhasi nakalusia mbu, “Khunyala okhulia amatunde kemisaala chiosi m'mukunda,

³nikurali omusaala okuli hakari womukunda. Nyasaye yakhubool'la khurakhaliakhwo amatunde komusaala yikwo kata okhutiila khukwo tawe, nikhuliakhwo khwakhafwa.”

⁴Inzokha nebool'la omukhasi mbu, “Simunyala okhufwa tawe.

⁵Nyasaye yaboola mbwo sichila wamanya mbu nimuliakhwo, ne nimuba nokhumanyilisia okhwinji nende obuchesi singa Nyasaye ma mumanye amalahi nende amabi.”

⁶Omukhasi uyo yalola omusaala yikwo nikuli omulahi khandi amatunde nikali amalahi akokhulia, ma nikunyonya tsimoni tsitsie, khandi nalola bwakhaba obulahi okhuchetsiha. Yamala nanoka khwitunde liakwo nalia, khandi nahelesiakhwo omusaatsawe naye naliakhwo.

⁷Olwa baliakhwo, bali nende okhumanyilisia nende obuchesi ma nibamanya mbu bali esihechenye, ma nibanaba amasafu khumikhuyu nibeboha mubisienje.

⁸Khumukolooba kwelitukhu yilio bahul'la OMWAMI Nyasaye nachendanga m'mukunda, ne nibebisa m'musaala.

⁹OMWAMI Nyasaye nalanga Adamu, namureeba “Oli hena?”

¹⁰Naye nakalusia mbu, “Mbuliiye nochendanga m'mukunda ma niria, nindebisa sichila ndi esihechenye.”

¹¹Nyasaye namureeba mbu, “Niwina okhubooleye oli esihechenye? Oliye litunde liandakhukaya okhuliakhwo nohomba?”

¹²Adamu nakalusia mbu, “Omukhasi wawaimbeye khumenye n'naye niye oumbelesisie litunde ma nase nindia.”

¹³OMWAMI Nyasaye nareeba omukhasi mbu, “Esichil'le nokhola mbwo nisina?” Naye nakalusia, “Inzokha niyo eyaingaat'te ma nindiakhwo.”

¹⁴OMWAMI Nyasaye nabool'la inzokha mbu, “Sichila okhol'le akene yaka oli musilaamo siobubi esianasikhwabukhanie khutsisolo tsindi tsiosi. Nomoolenje nende indayo khandi nolitsenje olukuukhi amatukhu kobulamu bubwo bwosi.

¹⁵Khandi nare obusuku hakariwo nende omukhasi, khandi hakari wolwibulo lulwo nende olulwe. Olwibulo lulwe lwakhatuye omurwekwo nawe wakhalumache es'sisilo sisie.”

¹⁶Ne nabool'la omukhasi mbu, “Ndakhameete obunyakhanibwo bwokhubelekha nende okhutsunwakhwo khweinumwa. Obwekombibwo bwakhabetsenje khumusaatsawo, ne yakhakhwamihenje.”

¹⁷Ne nabool'la Adamu mbu, “Sichila ohuliye amang'ana komukhasiwo ma nolia litunde liomusaala kwandakhukaya okhuliakhwo, liloba lilaamilwe khulweibe. Notiyenje khulio netsingufu mubulamu bubwo bwosi khulwo okhunyoola esiolia.

¹⁸Liakhakhuleer're amarakalu nende eminyenya, nawe nolitsenje tsifwa tsiom'mukunda.

¹⁹Khulwoluchesi lulwo nonyoolenje esiolia okhurula khwiloba okhwola olwa wakhakalukhe khwiloba eliawalombwakhwo. Walombwa okhurula khwiloba khandi wakhakalukhe khwiloba.”

²⁰Adamu nakulikha omukhasiwe Hawa, sichila niye nyina abandu bosi.

²¹Ma OMWAMI Nyasaye nalomba tsingubo okhurula khumaseelo ketsisolo nababiikha.

²²OMWAMI Nyasaye naboola mbu, “Luno omundu uno wekhol'le singa mulala khu ifwe, okhumanya obulahi nende obubi. Arakhahuchil'lwa okhubukulakhwo amatunde komusaala kwobulamu aliekhwo tawe, khase yakhahindila inziayo.”

²³Kho OMWAMI Nyasaye yamala namuhiinia m'mukunda kwa Edeni mbu atsie alime liloba eliayahinibwakhwo.

²⁴Khulubeka lwebukwe lwomukunda kwa Edeni Nyasaye yarayo “Abakerubi”[2] nende olukanga lwolumemo olwasukhananga tsimbeka tsiosi, khulwa okhulinda injila yokhutsia khumusaala kwobulamu.