Read lunyore OKHUCHIAKA 32 Bible Online

OKHUCHIAKA 32 - lunyore bible

OKHUCHIAKA 32

¹Olwa Yakobo yali natsilil'langa nende oluchendo lulwe, abamalaika ba Nyasaye bamwakaan'na.

²Olwa yabalola, yaboola mbu, “Yino nekambi ya Nyasaye,” ma nakulikha habundu yaho Mahanaimu.

³Yakobo naruma abarumwa bamuranjil'le okhutsia khumusiani wabwe Esau musibala sia Edomu.

⁴Yabalaka baboole mbu, “Ise Yakobo, omurumikhiliwo, nzitsanga khu iwe omwami Esau nimboola mbu ndamenyelenje nende Labani ma ndacheleba okhukalukha.

⁵Ndi nende tsing'ombe, etsipunda, amakondi, tsimbusi nende abatiiyi. Khurumilanga ling'ana nende obunaayi bwokhuhuchil'lwa imbeliwo.”

⁶Olwa barumwa bakalukha khu Yakobo, bamubool'la mbu, “Khwol'le khumwana wenywe Esau, ma ali khunjila yeetsanga okhukhubukaan'na. Ali nende abandu etsimia tsine abayeetsanga n'nabo.”

⁷Yakobo yaria okhusila, naba nende esihenda mwoyo. Yamala nakabula abandu bayali n'nabo nende amakondi, tsimbusi, tsing'ombe ma nende etsipunda mumikanda chibili.

⁸Okhuba yapaala, “Nikakhaba Esau yakheetsa okhuseera omukanda yiku ne okundi yiku kuhona ma kwilukhe.”

⁹Ma Yakobo nasaaya mbu, “Nyasaye wa kuka Aburahamu, Nyasaye wa papa Isaka, mbulila. OMWAMI, wambool'la mbu ningalukha musibala siabeekho banje ne ebindu biosi nabibe ebilahi.

¹⁰Singwan'ne obuyanzibwo nende obusubilwa ebiawakhol'la ise omusumbawo tawe. Ndambukha Yorodani nindi nende indabusi yonyene, ne lunondi ngalukhile nindi nemikanda chibili chino.

¹¹Umbabine khumukhono kwomwana wefwe Esau. Okhuba riiye mbu haundi yeetsanga okhukhuseera ma akhumale fwesi, kata abakhasi nende abaana.

¹²Witsul'le mbu waboola wakhakhol'le ebindu biosi ebilahi, ma wakhambelesie olwibulo olwomundu arakhabasiakhwo tawe, olwinji singa omuyekhe okuli khundulo khweinyanza.”

¹³Yakobo yakonaho obutukhu yibwo bwosi, ma nabukula khubiayo bibie esihanwa siokhuhelesia omwana wabwe Esau.

¹⁴Yabukula tsimbusi tsikhasi etsimia tsibili nende etsikhole amakhumi kabili, amakondi makhasi etsimia tsibili ne amamiiku etsimia tsibili.

¹⁵Tsingamia amakhumi kataru etsiali nitsinuuninjia halala nende ebimoosi biatsio, tsing'ombe etsitwasi amakhumi kane, ne etsichulukhi likhumi, etsipunda tsikhasi amakhumi kabili ne tsisaatsa likhumi.

¹⁶Nabikaba mumikanda chiebiayo ma nara mulala khubatiiyi babe okhusinjil'la buli esiayo. Nababool'la mbu, “Muranje okhwambukha ne mulekhenje obweyangu hakari wesiayo silala nende esindi.”

¹⁷Nalaka omurumikhili wokhuranga mbu, “Olwa nobukane nende Esau omwana wefwe nakhureeba, ‘Oli omurumikhili wa wiina, ne otsitsanga hena? Niwina mwene biayo biawemesisie yibi?’

¹⁸Ne okalusia mbu, ‘Nebiomurumwawo Yakobo. Ubirumile singa ebihanwa khu mwamiwe Esau. Ne ye omwene ali inyuma yetsanga.’ ”

¹⁹Yahaana lilako lifwana yilio khandi khumurumikhili wakhabili, nende owakhataru, nende khubandi bosi abali nibasinjiliye ebiayo. “Nimbwo namubool'le Esau olwa namwakane n'naye.

²⁰Okhwola muboole, ‘Omurumwawo Yakobo ali inyuma yeetsanga!’ ” Yakobo yali napaalanga mbu, “Namulechel'le nebihanwa, ne olwa nakhwakane n'naye, nayambuchil'le.”

²¹Yarumania ebihanwa nibitsia ne naye omwene nasikala inyuma nakona mukambi obutukhu yibwo.

²²Obutukhu yibwo Yakobo yabuukha, nabukula abakhasibe babili nende abatiiyi babwe babili, ma nende abaanabe likhumi namulala, nibambukha omuchela kwa Yaboku.

²³Olwayali nabambusisie injelekha womuchela yamala niyambusia biosi ebiayali n'nabio,

²⁴nebutswa ye omwene nasikala oluchelekha yenyene. Ne omusaatsa undi yeetsa namulwaana okhwola m'mabwebwe.

²⁵Olwomundu uyo yalola mbu salekanga Yakobo tawe, yam'miina mwifwon'no lieikhukunyu ma nilibinzukha.

²⁶Omundu uyo naboola mbu, “Ndakhuula nzie sichila buli ahembi okhusia.” Yakobo namubool'la mbu, “Sikhulakhuula tawe, okhwola unaamile ikhabi mbelio.”

²⁷Naye namureeba mbu, “Ibe niwe wiina?” Nakalusia, “Nise Yakobo.”

²⁸Omundu uyo namubool'la, “Eliira lilio sinalibe khandi Yakobo tawe. Olwan'nenje nende Nyasaye, ma nende abandu, ma ulechele kho, eliiralio nalibe Isiraeli.”

²⁹Yakobo namubool'la mbu, “Luno nawe mbool'la eliiralio.” Nebutswa naye namureeba mbu, “Busina wenyanga okhumanya eliira lianje?” Ma nalaamila Yakobo tsikhabi.

³⁰Yakobo naboola, “Nduutsi Nyasaye m'moni nom'moni, ma sili mwoyo.” Ma nakulikha habundu tsana Penieli.

³¹Eliuba liarula olwa Yakobo yali narulangaho, ne yali natiechelanga khulwe ikhukunyuye

³²kata okhwola leelo abolwibulo lwa Isiraeli sibalitsanga inyama yokhukhukunyu tawe, sichila niyo eya Yakobo yafwoolwa.