Read lunyore OKHUCHIAKA 33 Bible Online

OKHUCHIAKA 33 - lunyore bible

OKHUCHIAKA 33

¹Yakobo yalola Esau niyeetsanga nende abandube etsimia tsine, ma nakabula abaana khu Lea, Raheli nende khubakhaana abatiyi, baabe babili.

²Niyemesia abakhaana batiyi nende abaana babwe, ma nalondiakhwo Lea nende abaanabe, ne Raheli nende Yusufu nibasikala inyuma.

³Yakobo niyemela imbeli wabwe ma niyenama esiakhane nakhataru olwayali niyesundanga ahembi khumwana wabwe.

⁴Nebutswa Esau niyelukha bwangu okhutsia okhumwakan'na, namukwaaka, ma namutsunzuuna. Bosi nibalakaya amasika.

⁵Olwa Esau yahenga nalola abakhasi nende abaana, yareeba mbu, “Nibeena abo oli n'nabo yaba?” Yakobo namukalusia mbu, “Yaba nabaana ba Nyasaye yambelesia khulwesirendasie.”

⁶Ma abakhasi abali abatiiyi niboolaho nende abaana babwe, nibeenama.

⁷Lea niyoolaho nende abaanabe, nibeenama, ne olunyuma Yosefu nende Raheli niboolaho, khandi nabo nibeenama.

⁸Esau nareeba mbu, “Ne omukanda kwandali okhwakaana n'nakwo kula kuli nende amang'ana sina?” Yakobo namukalusia mbu, “Kwali okwokhukhuhombelesia khe umbuchiil'le.”

⁹Esau nakalusia mbu, “Ebiandi n'nabio nebinji, mwana wefwe, ebioli n'nabio bibe butswa ebibio.”

¹⁰Yakobo naboola, “Tawe nimba nimbuchiliiywe imbeliwo, khe oyanze obukule ebihanwa bianje. Olwa ndolan'ne n'nawe fwananga singa ololan'ne nende Nyasaye m'moni, sichila obulina buliho hakari wefwe.

¹¹Yanza obukule ebihanwa biakhuleereye yibi, Nyasaye waimbeela esirenda ma ndi nende siosi esiandakhenya.” Natsilil'la okhumunichilisia okhwola olwa yabihuchiil'la.

¹²Esau naboola mbu, “Chenda khuchiake oluchendo. Ise nise owitsa okhwemela.”

¹³Yakobo nakalusia, “Omanye abaana batohele, khandi okhwola nganakane amakondi kanje netsing'ombe nende ebimoosi biandi n'nabio. Nibitetekhanibwakhwo kata litukhu elala biosi biakhafwa.

¹⁴Nobulahi ibe wemele, ma nase khulonde kalaha, ninjendia ebiayo nende abaana kalaha okhwola olwa nakhunyool'le Edomu.”

¹⁵Esau naboola mbu, “Lekha khulekhele abandu banje balala.” Nebutswa Yakobo nakalusia mbu, “Sindola esifune tawe sichila esianyenyelenje butswa nokhuhuchiil'lwa.”

¹⁶Khe litukhu yilio Esau nachaaka oluchendo lwokhukalukha Edomu.

¹⁷Ne Yakobo naye natsia Sukotsi, niyeyombokhelayo inyumba nende ebiko biemirukochie. Niko akachilanga habwene yaho nihalangwa Sukotsi.

¹⁸Olwa Yakobo yakalukha okhurula Mesopotamia, yoola nomulembe mwitookho lia Shekemu musibala sia Kanaani, ma niyombokha ekambiye ahembi nelitookho.

¹⁹Yakula esitonye siomukunda yisio khubaana ba Amori samwana Shekemu khulwe ebitonye emia ndala ebiefetsa.

²⁰Nasinjisiaho olusambwa ma nakulikhaho Eli, Elohe Isiraeli[17].