Read lunyore OKHUCHIAKA 34 Bible Online

OKHUCHIAKA 34 - lunyore bible

OKHUCHIAKA 34

¹Litukhu elala Dina, omukhaana wa Yakobo nende Lea yatsia okhukonya abakhaana besibala sia Kanaani.

²Ne olwa Shekemu omwana wa Hamori Omuhiwi, owali omuruchi wesibala yisio, yamulola, yamubukula nakona n'naye khulwetsingufu ma namusimbia omurwe.

³Nebutswa yanyoola omukhaana uyo nali nelikondo lilahi ma namuyanza, namuselela naye amuyanze.

⁴Nabool'la samwana mbu, “Nyenyanga ukhwel'le omukhaana uno abe omukhasi wanje.”

⁵Yakobo yahul'la mbu omukhaanawe wononibwe, ne khulwa mbu abasianibe bali nibatsiye nende ebiayo musiayo, yabuna tsi nalinda okhwola olwa bali nibetsele.

⁶Ne Hamori samwana Shekemu natsia okhul'loma nende Yakobo,

⁷olwabaana ba Yakobo bali nibachelelanga okhurula musiayo. Olwa bakahulila bali okhuhuka ma nibasinyikha khuka Shekemu yali nakhol'le okhufwabia abandu ba Isiraeli olwa yakona nende omukhaana wa Yakobo netsingufu.

⁸Hamori nabool'la Yakobo mbu, “Omusiani wanje Shekemu uyanzile omukhaanawo, yanza olekhe amuteesie.

⁹Chenda khuhuchilisanie abandu befwe nabateesanenje nende abenywe.

¹⁰Ma mumenye musibala sino n'nefwe, mumenye hosi aha muba nimwenya, mube abalakhuule okhukhola obukhala nende okhubamwo nemiandu.”

¹¹Ma Shekemu nabool'la samwana Dina nende abasiani babwe mbu, “Muhuchil'le yaka, ne esianamureebe siosi namuhelesie.

¹²Kata nimureeba ikhwe efwana mbwena, nende ebihetso bifwana mbwena, namuhelesie singa obwa namube nimureebele nikaba mbu mwakhahuchil'la ndeesie omukhaana wenywe.”

¹³Abasiani ba Yakobo bakalusia Shekemu nende Hamori munjila yobukaati sichila Shekemu yali niyoononisie omukhaana wabwe Dina.

¹⁴Nibababool'la mbu, “Sikhunyala okhuhuchiil'la omukhaana wefwe ateekhele omundu osili okhusebwa tawe, yako kakhaba akes'simbamurwe khu ifwe.

¹⁵Khunyala okhuhuchiil'la nikali mwakhakhusubisia mbu namube singa ifwe, ma namusebenje abasaatsa benywe bosi.

¹⁶Nimukhola mbwo ne nakhuhuchiil'le okhuteesania n'nenywe singa abandu balala.

¹⁷Nebutswa nimuba nimusuula okhuhuchiil'la ma namubule okhusebwa, nakhubukule omukhaana wefwe ma khutsie.”

¹⁸Amang'ana kabwe kalolekha okhuba amalahi khu Hamori nende omusianiwe Shekemu.

¹⁹Omubuukha siyamala nanyoola obutinyu okhukhola akene yako tawe, sichila yali niyayanza omukhaana. Khandi niye owali noluyali okhusila munyumba mwabwe.

²⁰Hamori nende omusianiwe Shekemu batsia ma niboola habundu hokhwakan'na musilibwa sie litookho. Bal'loma nende abasaatsa bomwitookho nibaboola mbu.

²¹“Abandu bano bali nomulembe, mulekhe bamenye n'nefwe nobulakhuule. Esibala sino nesikali esiabanyala okhumenyakhwomwo nabo. Nakhutesanienje n'nabo.

²²Nebutswa abasaatsa yaba nabahuchiil'le okhumenya n'nefwe khandi okhuba mulala n'nefwe nikali nakhuhuchiil'le okhuseba abasaatsa befwe singa bo bakholanga.

²³Emiruko chiabwe nende emiandu chiabwe sinabibe ebiefwe?”

²⁴Abandu bosi abomwitookho nibahuchilisania nende aka Hamori nende Shekemu baboola, ma abasaatsa bosi nibasebwa.

²⁵Inyuma wamatukhu kataru, abasaatsa nibasitsunwa khulwokhusebwa, babili khubaana ba Yakobo, Simioni nende Lawi, abasiani banga Dina, babukula tsinganga tsiabwe, nibatsia mwitookho sila omundu okhumanya, ma nibeera abasaatsa bosi.

²⁶Nibeer'ramwo Hamori nende omusianiwe Shekemu, ma nibabukula Dina okhurula munyumba ya Shekemu nibarula.

²⁷Nibamal'le okhwira mbwo, abaana ba Yakobo bayaaka ebindu biosi mwitookho yimwo khulwokhurunga es'sialia sichila omukhaana wabwe yali niyonoonibwe.

²⁸Babukula ebiayo, tsing'ombe, etsipunda, nende buli siesindu siosi mwitookho nende mubwayilo.

²⁹Babukula esindu siosi esiali nobukusi, nibatiila abakhasi nende abaana, ma nibachinga biosi ebiali mutsinyumba.

³⁰Yakobo nabool'la Simioni nende Lawi mbu, “Mundereye omunyakhano; luno Abakanaani, Abaperisi nende abandu bandi bosi musibala sino nabaasuule. Sindi nende abasaatsa abenji tawe, olwabandu yabo nabebunjikhe halala ma nabanyinjil'le, inyumba yanje yosi nemalwe.”

³¹Nabo nibakalusia nibaboola mbu, “Sikhwakhahuchil'la omukhaana wefwe okhukhol'lwa singa omutamba tawe.”