Read lunyore OKHUCHIAKA 35 Bible Online

OKHUCHIAKA 35 - lunyore bible

OKHUCHIAKA 35

¹Nyasaye yabool'la Yakobo mbu, “Tsia bwangu Betseli ma omenyeyo. Unyombokheleyo olusambwa. Nise Nyasaye owakhulolekhela olwa wali niwilukhanga omusiani wenywe Esau.”

²Ma Yakobo nabool'la abeinyumbaye nende bosi abali n'naye mbu, “Muhiinie abanyasaye abamuli n'nabo, mwelombe abeene ma mwebiikhe tsingubo tsindafu.

³Khwitsa okhurula hano khutsie Betseli, ahanzia okhwombokha olusambwa khu Nyasaye owakhonya mutsinyinga tsiamanyakhano ma owabeyenje n'nase hosi handatsiyenje.”

⁴Ma nibahelesia Yakobo abanyasaye babwe abacheni bosi aba bali n'nabo, nende tsingaka etsiali m'marwi. Yakobo nabiyabila hasi womusaala omuriba okuli ahembi nende Shekemu.

⁵Olwa Yakobo nende abaanabe bachiaka oluchendo, oburi obwinji bwenjil'la abandu bomumataala akali ahembi, ma sibabalondel'la tawe.

⁶Yakobo yoola nende abandube bosi mu Lusi, elilangungwa khandi Betseli musibala sia Kanaani.

⁷Niyombokhayo olusambwa ma nakulikha habundu yaho Betseli, sichila niho aha Nyasaye yamwebul'la olwayali niyelukhanga omwana wabwe.

⁸Debora owali omuleli wa Rebeka yafwa ma nayabilwa hasi womuriba emwalo wa Betseli. Ma nikulangwa Aloni Bakutsi[18].

⁹Olwa Yakobo yakalukha okhurula Mesopotamia, Nyasaye yamulolekhela khandi ma namulaamila tsikhabi.

¹⁰Nyasaye namubool'la mbu, “Eliiralio ni Yakobo, nebutswa okhurula leelo nalibetsenje Isiraeli.” Kho Nyasaye namukulikha Isiraeli.

¹¹Nyasaye namubool'la, “Ise nise Nyasaye Wokhunyala Biosi. Onyoole abaana abenji. Tsimbia tsiakharule khuibe, ne wakhabe kukanyene abaami.

¹²Khuhetsanga esibala esiandaheelesia Aburahamu nende Isaka, ma khuhetsanga ibe nende abolwibulo lwakhetse inyumawo.”

¹³Ma Nyasaye namulekha.

¹⁴Yaho, aha Nyasaye yali nal'lomeye n'naye, Yakobo yamala nasinjisiaho lichina liesitsusio ma nalitsienula khulwa okhulitsukhil'lakhwo amafura.

¹⁵Nakulikha habundu tsana Betseli.

¹⁶Yakobo nende abeinyumbaye nibachaaka oluchendo okhurula Betseli, ne olwa bali nibasili ehale okhurula Efuratsa, tsinyinga tsia Raheli okhwibula tsioola, ne inumwaye neba indinyu okhusila.

¹⁷Olweinumwa yali niyakhaba indinyu, omulesi owali namwibusianga, namubool'la, “Oraria tawe, witsa okhunyoola omwana undi omusiani.”

¹⁸Nebutswa yali nafwitsanga, ne naheelana emiyachie echiokhumalilikha, nakulikha omusianiwe Benoni[19], nebutswa samwana naye yamukulikha Benjameni[20].

¹⁹Olwa Raheli yafwa, yayabilwa khunjila etsitsanga Efuratsa, elilangungwa Betselehemu luno.

²⁰Yakobo nasinjisiaho lichina liesiitsusio, ma lisimanyia esilindwa sia Raheli okhwola olwaleelo.

²¹Yakobo natsilil'la ma nalomba ekambi ahembi nende omunaara kwa Ederi.

²²Olwa Yakobo yali nasimenyele musibala yisio, Rubeni yakona nende Biliha, owali omukhasi omubiikha wa samwana. Yakobo yakahul'la ma nabihil'lwa okhusila. Yakobo yali nabaana likhumi nende babili.

²³Abaana ba Lea bali Rubeni (omwana wa Yakobo wokhuranga), Simioni, Lawi, Yuda, Isakari, nende Sabuloni.

²⁴Abaana ba Raheli nabo bali, Yosefu nende Benjameni.

²⁵Abaana ba Biliha owali omukholi wa Raheli bali, Dani nende Nafutali.

²⁶Abaana ba Silipa owali omukholi wa Lea bali Gadi nende Asheri. Abaana yaba bosi bebul'lwa Mesopotamia.

²⁷Yakobo yatsia khu Isaka samwanawe mu Mamure, ahembi nende Heburoni aha Aburahamu nende Isaka bamenyanga.

²⁸Isaka yamala emihika emia ndala nende amakhumi munane

²⁹ma nafwa nakhunguhile, ne abaanabe Esau nende Yakobo nibamuyabila.