Read lunyore OKHUCHIAKA 37 Bible Online

OKHUCHIAKA 37 - lunyore bible

OKHUCHIAKA 37

¹Yakobo yatsilil'la okhumenya musibala sia Kanaani aha samwana yamenyanga.

²Tsino nitsio tsinzibulo tsia Yakobo. Olwa Yosefu yali omubuukha wemihika likhumi nende chine nachitaru, yali niyayanga emiruko halala nende abaana babwe abaana ba Biliha nende Silipa, abakhasi ba samwana. Yosefu yaleer'ranga samwana amang'ana amabi akabasiani babwe bakholanga.

³Yakobo yayanza Yosefu okhuyomba abaanabe bandi bosi, sichila yamwibula nali omusakhulu. Namunabila ekanzu yamakhono amarambi.

⁴Olwabaana babwe balola mbu samwana wayanza Yosefu okhuyomba singa yabayanza, basuula omusiani wabwe okhusila, kata sibali abanyala okhul'loma n'naye bulahi tawe.

⁵Litukhu elala mubutukhu, Yosefu yaloora lilooro, ne olwa yabool'lakhwo abaana babwe, bamusuula okhuyombakhwo esichelo.

⁶Yababool'la mbu, “Hul'le mubool'lekhwo lilooro liandor're.

⁷Fwesi khwali nikhuli m'mukunda nikhubohanga emirwe chiobule, ne esirwe sianje nisiisinjila silunji. Ebirwe bienywe nibibotokhana esirwe sianje ma nibisiinaamila.”

⁸Abaana babwe nibamureeba mbu, “Ibe opaalanga wakhaba omuruchi wefwe?” Nibameeta okhumusuula khulwa amalooro kaake nende amang'ana kaake.

⁹Khandi Yosefu naloora lilooro lindi ma nabool'la abaana babwe mbu, “Ndor're lilooro lindi, mbu eliuba, omwesi nende tsinyininyini likhumi nandala tsinyinamilanga.”

¹⁰Khandi yabool'la samwana akelilooro yilio ma samwana namulul'la, namubool'la mbu, “Yilio nelilooro liambila sina? Ibe opaalanga mbu mamawo, abaana benywe nende ise khwakhakhwinamila?”

¹¹Abaana babwe nibamulol'la obubi, nebutswa samwana yatsilil'la okhupaala khumang'ana yako.

¹²Litukhu elala olwabaana banga Yosefu bali nibatsiye okhwaya ebiayo bia samwana mu Shekemu,

¹³Yakobo yabool'la Yosefu mbu, “Nyenyanga otsie Shekemu, habaana benywe batsiye okhwaya ebiayo.” Yosefu nakalusia mbu, “Ise nderechekhele okhutsia.”

¹⁴Samwana naboola, “Tsia olole nikali abaana benywe nabalamu khandi nikali ebiayo bili bulahi, ma witse okhumbool'la.” Ma namuruma okhutsia mwibanda lia Heburoni. Yosefu yoola Shekemu

¹⁵ma naba achendachendanga musibala yimwo olwa omundu undi yamulola ma namureeba mbu, “Okhabanga sina?”

¹⁶Naye nakalusia mbu, “Khabanga abaana befwe abaitsile okhwaya ebiayo yino. Wakhambool'la ahabali?”

¹⁷Omundu uyo naboola, “Mbaale barul'le. Mbuliiye nibaboolanga batsie Dotsani.” Ma Yosefu nalondel'la abaana babwe ma nabanyool'la Dotsani.

¹⁸Bamulola nasili ehale, ne olwayali nasili okhwola ahabali, nibalomba obwa banyala okhumwira.

¹⁹Nibabool'lana abene khubene mbu, “Omuloori wamalooro ngwoyo yetsanga.

²⁰Chende khumwire, ma khufuube om'bili kukwe mwiyabo elala okhuyaaka. Nakhuboole butswa mbu esolo emuliiye, khe nakhulole obwa amalooroke kakhabe.”

²¹Rubeni yahul'la nibaboolanga mbwo ma nateema okhuhonia Yosefu. Naboola mbu, “Khuramwira tawe.

²²Khumufuube butswa mwiyabo yili musitsiimi muno, nebutswa muramusalisia tawe.” Yaboolanga yaka khe abe onyala okhukalukha okhumuhonia ma amukalusie khusamwana.

²³Olwa Yosefu yoola habaana babwe bali, bamunaabula ekanzuye eyamakhono amarambi.

²⁴Ma nibamubukula nibamufuuba mwiyabo eliali niliooma.

²⁵Olwabali nibaliitsanga, balola omukanda kwabachendi ba Ishimaeli nibarulanga Gileadi nibahenjele Emisiri. Tsingamia tsiabwe tsiali nitsichinjile omusaala kwomwayo omulahi nende manemane.

²⁶Yuda nabool'la abaana babwe, “Nisina esianakhunyoole nikali khwakheera omwana wefwe ma khubise?

²⁷Chende khumukusie khu Baishimaeli yaba, khulekhe okhumusaalisia sichila ye no mwana wefwe, owamatsahi kefwe.” Abaana babwe nibahuchil'la.

²⁸Olwa abakholi bobukhala okhurula Midiani boolaho, abahabwe Yosefu nibamukhweesa okhurula mwiyabo ma nibamukusia khu Baishimaeli ebitonye biefetsa amakhumi kabili. Ma nabo nibamuhila Emisiri.

²⁹Olwa Rubeni yakalukha khwiyabo ma nanyoola Yosefu salimwo tawe, yarandula tsingubotsie musibeela.

³⁰Nakalukha khubaana babwe naboola, “Omusiani salimwo tawe, nakhole mbwena?”

³¹Ma nibeera imbusi, ne nibeena ekanzu ya Yosefu mumatsahi kayo.

³²Nibahil'la samwana ekanzu, nibamubool'la mbu, “Khunyooye ekanzu yino. Neyomwanawo nohomba?”

³³Ma nachimanyilisia, naboola, “Yee, neyomwana wanje. Esolo okhwola ebe nemuliiye. Omwana wanje Yosefu utonyelwe mubitonye.”

³⁴Yakobo narandula tsingubo tsitsie musibeela ma niyeboha amakunia mus'sienjesie. Niyekhuula omwanawe amatukhu amenji.

³⁵Abaanabe bosi abasiani nende abakhaana, nibeetsa okhumuhotselesia, nebutswa yasuula okhuhotselesibwa naboola, “Ndakhatsie musibala siabafwa nisimwekhuula omwana wanje.” Ma natsilil'la okhwekhuula omwanawe Yosefu.

³⁶Ne Abaamidiani nabo bakusia Yosefu Emisiri khu Potifa, owali mulala khubakhongo bomuruchi we Misiri, omwemeli wabasikari.