Read lunyore OKHUCHIAKA 38 Bible Online

OKHUCHIAKA 38 - lunyore bible

OKHUCHIAKA 38

¹Mumatukhu kene yako Yuda yalekha abaana babwe ma natsia okhumenya nende omundu walangwa Hira, owomusibala sia Adulamu.

²Yuda yakan'nayo nende omukhaana Omukanaani owa samwana yalangwanga Shua, ma namuteesia.

³Niyebula omwana omusiani, namukulikha Eri.

⁴Khandi nabelekha ma niyebula omusiani undi, namukulikha Onani.

⁵Khandi niyebula omusiani undi namukulikha Shela. Yuda yali nali Akishibi olwo omwana uyo yebulwa.

⁶Yuda yanyool'la omwanawe owokhuranga Eri omukhasi owalangwa Tamari.

⁷Tsifwo tsia Eri tsiali tsimbibibi, ma sitsiayanzisia OMWAMI tawe, kachila OMWAMI namwiira.

⁸Ma Yuda nabool'la Onani mbu, “Tsia obe nende omukhasi womwana wenywe. Omukalusie singa omwana wanga omusaatsawe, khe onyool'le omwana wenywe olwibulo.”

⁹Ne Onani yamanya bulahi mbu abaana yabo sibakhaba abaabe tawe, kho olwayabetsanga nende omukhasi womusiani wabwe, yatsukhanga butswa obumwo bubwe hasi, khe alekhe okhunyool'la omusiani wabwe abaana.

¹⁰Akene yako kasinya OMWAMI okhusila, ma OMWAMI namwiira naye khandi.

¹¹Ma Yuda nabool'la omukhaanawe Tamari mbu, “Kalukha munyumba mwa papawo, omenye singa omulekhwa okhwola olwo omwana wanje Shela yakhabe nakhul'le.” Yaboola mbwo sichila yaria mbu Shela naye yakheerwa singa abaana babwe. Ma Tamari nakalukha owabwe.

¹²Olunyumakhwo mukha Yuda nafwa. Olwa Yuda yali namal'le amasika, yarula nende omulinawe Hira owokhurula Adulamu nibatsia Timina, hamakondike kali nikakhalakungwa obwoya.

¹³Omundu yamala nabool'la Tamari mbu nyakhusalanyene atsitsanga Timina okhukhalaka amakondike obwoya.

¹⁴Ma nanabula tsingubotsie etsiobulekhwa, niyebiikha olububi ma nafuunikha m'moni, niyekhala musilibwa sia Enaimu, khunjila yokhutsia Timina. Yali namanyile bulahi mbu Shela omwana wa Yuda yali niyakhula ne siyali niyamukalusia tawe.

¹⁵Olwa Yuda yamulola, yapaala mbu nomutamba, sichila yali nafuunikhile obweni bubwe.

¹⁶Natsia khuye khundulo khweinjila naboola mbu, “Nyenyanga mbe n'nawe, omurungokwo nisina?” Siyamanyanga mbu ninyakhusalawe tawe. Naye namureeba, “Nikhuba n'nawe wakhamba sina?”

¹⁷Yuda nakalusia, “Nakhuleer're esimeeme sieimbusi okhurula mubiayo bianje.” Naye naboola, “Umbelesie esindu esiandiila okhwola olwa nobe noler're imbusi tsana.”

¹⁸Yuda namureeba, “Nisina esiawenya khuhe otiile?” Naye nakalusia, “Ingakayo yesimanyisio nende olutsiha lwayo, ma nende indabusi yochinjile m'mukhono.” Namuhelesia ebindu yibio, ne niyenjila naba n'naye, ma nabelekha.

¹⁹Tamari yarula nakalukha ingo ne nanabula olububi ma niyebiikha khandi tsingubo tsiobulekhwa.

²⁰Yuda yaruma omulinawe Hira okhuhila imbusi ma abukule ebindu biayali nalekheye omukhasi uyo okhutiila, nebutswa Hira siyamunyoola tawe.

²¹Nareebakhwo abandu ba Enaimu, “Omutamba wali khunjila khuno ali hena?” Nabo nibaboola, “Omutamba sabetsangakhwo hano tawe.”

²²Nakalukha khu Yuda naboola, “Simunyooye tawe. Abandu bahabwene yaho babooye omutamba sabetsangakhwoho tawe.”

²³Yuda naboola mbu, “Lekha abe nebindu yibio sikhwenya abandu bakhutsekhel'le tawe. Njomele okhumurunga, nebutswa siomunyooye tawe.”

²⁴Inyuma wemiesi chitaru omundu nabool'la Yuda, “Nyakhusalawo Tamari yakhol'lenje obutamba ma wabelekhele inda yobuheyi.” Yuda nahaana lilako naboola, “Mumubukule ma mumusambe afwe.”

²⁵Olwayali nahiinibungwa yaruma ling'ana khunyakhusalanyene naboola, “Inda yandabelekha neyomundu mwene ebindu yibi. Bihenje olole nebiawina, ingaka yesimanyilo nolutsiha lwayo ma nende indabusi.”

²⁶Yuda niyeyama mbu nebibie, naboola, “Aboolanga akatooto. Sindahesia akandenyekhanga mbesie tawe. Kenyekhanga muhaane khumwana wanje Shela amuteesie.” Ma Yuda siyamala nabakhwo n'naye khandi tawe.

²⁷Olwe tsinyinga tsieinumwa tsioola, kalolekha mbu nayebule amakhwana.

²⁸Olwa yali nalumwanga omwana mulala yahiinia omukhono ne omukhasi wokhwibusia nakutiila ma nabohakhwo oluusi olwakhanyu. Naboola mbu, “Uno niye owokhuranga okhwibulwa.”

²⁹Nebutswa omwana uyo yakalusia omukhonokwe ma omwana wabwe naranga okhwibulwa. Ma omukhasi wokhwibusia naboola “Kho ibe omwene wekhal'liliiye okhurula.” Ma namukulikha Peresi.

³⁰Olunyumakhwo ne omusiani wabwe niyebulwa nali nende oluusi olwakhanyu khumukhonokwe ne nakulikhwa Sera.