Read lunyore OKHUCHIAKA 39 Bible Online

OKHUCHIAKA 39 - lunyore bible

OKHUCHIAKA 39

¹Abaishimaeli bali nibakusia Yosefu Emisiri khu Potifa, omwemeli wabasikari abalindanga hango homuruchi.

²OMWAMI yali nende Yosefu ma amang'ana kosi nikaba amalahi. Yamenyanga munyumba yomwamiwe Omumisiri uyo.

³Omwamiwe yalola mbu OMWAMI Nyasaye yali nende Yosefu khandi yatsitsachisinjia kosi akayakholanga.

⁴Potifa yayanzisibwa n'naye ma namukhola okhuba omusinjil'li wemilimo munyumbaye, ne nara m'makhono ka Yosefu ebindu biosi ebiayali n'nabio.

⁵Okhurula olwene yilwo, OMWAMI yamala nalaamila inyumba yo Mumisiri uyo tsikhabi khulwa Yosefu, ma nende ebindu biosi ebia yali n'nabio munyumbamwe nende m'mukundakwe.

⁶Potifa yahelesia Yosefu ebindu biosi ebiayali n'nabio mbu abilinde ma siyahendel'langakhwo esindu tawe nibirali ebiakhulia ebiayalitsanga bionyene. Yosefu yali nom'bili omulahi khandi naba owelikondo lilahi.

⁷Ne inyuma wamatukhu matu omukhasi womwamiwe nachaaka okhwekomba Yosefu ne namubool'la mbu babe n'naye.

⁸Naye nasuula ma namubool'la mbu, “Lola, omwami wanje sahendelangakhwo siosi esiandi n'nasio munyumba tawe, ma wara m'makhono kanje biosi ebia ali n'nabio.

⁹Ndi nende obunyali munyumba muno singa ye ne siyanyimakhwo esindu siosi tawe, norali ibe wenyene. Khe ndakhakhola mbwena amang'ana amabi yaka imbeli wa Nyasaye wanje.”

¹⁰Kata olwa yareebanga Yosefu buli litukhu, ye siyahuchiil'la babe n'naye tawe.

¹¹Nebutswa litukhu elala olwa Yosefu yatsia munyumba okhukhola emilimochie, omukholi undi wosi siyalikhwomwo tawe.

¹²Yatiila ingubo ya Yosefu naboola, “Yitsa khukone n'nawe.” Nebutswa naye yelukha narula esioba ne nalekha inguboye mumakhono komukhasi uyo.

¹³Olwomukhasi uyo yalola mbu Yosefu ulekhele inguboye ma wilukhile utsiye esioba,

¹⁴yalanga abakholi bomunzu yimwo nababool'la, “Lole khukano, Omuheburania womusaatsa wanje yakhuleereye akhuchiayanga. Yetsele munyumba mwanje niyenya akone n'nase khulwetsingufu, nebutswa mal'le nikhupa etsikhwisi.

¹⁵Olwa ahuliye etsikhwisi ne niyelukha natsia esioba, ne nalekha ingubo yiye hatsana.”

¹⁶Yabiikha ingubo tsana okhwola olwomusaatsawe omwamiwe yachelela hango.

¹⁷Namubool'la amang'ana yako mbu, “Omundu Muhiburania owawaleer're hano ula yetsele musikoti sianje ma niyasimbia omurwe.

¹⁸Nebutswa olwa khupile etsikhwisi amal'le niyelukha natsia esioba, nalekha inguboye hatsana.”

¹⁹Omwamiwe yanyoola lileko okhusila okhuhul'la amang'ana yako

²⁰ma nara Yosefu mububohe ahabahambe bomuruchi babohelungwa, nabayo mubuhambe.

²¹Nebutswa OMWAMI yali nende Yosefu ma namumeeta tsikhabi, ma omulindi womubuhambe nasangasibwa n'naye.

²²Yakhola Yosefu okhuba omukali wababohe bandi bosi ma khandi naba omusinjil'li wamang'ana kosi akekholanga mububohe yimwo.

²³Omulindi womubuhambe siyahenjelesinjiakhwo esindu sia Yosefu asinjiliye tawe, sichila OMWAMI yali nende Yosefu ma nachila biosi ebiayakholanga nibiba ebilahi.