Read lunyore OKHUCHIAKA 4 Bible Online

OKHUCHIAKA 4 - lunyore bible

OKHUCHIAKA 4

¹Adamu naba nende Hawa omukhasiwe, ma Hawa nabelekha, niyebula omwana omusiani ma naboola mbu, “Nyooye omwana wes'saatsa khulwobukhonyi bwo MWAMI.” Namukulikha eliiralie Kaini.

²Olunyuma khandi yebula omwana undi omusiani owayakulikha Abili. Abili yakhula naba omwayi wamakondi ne Kaini naba omulimi.

³Inyuma weinyinga nalebe Kaini yaleer'ra OMWAMI khubiamo biom'mukunda singa esihanwa.

⁴Abili naye naleera sil'la khubimeme biokhuranga ebiamakondike, niyeera ma nahaana esitonye sieinyama indubukhu singa esihanwa. OMWAMI yayanzisibwa nende Abili khulwe esihanwa sisie,

⁵nebutswa siyayanzisibwa na Kaini nende esihanwa sisie tawe. Oburima nibuhamba Kaini okhusila ma nakhuunyia m'moni.

⁶OMWAMI nareeba Kaini mbu, “Busina osinyikhile? Khandi busina okhunyisie m'moni?

⁷Olaba nokhol'le bulahi khane uyanzile. Nebutswa norakhakhola obulahi, imbi ikhwekonekheye hamuliango, yenyanga ekhwamihe, nebutswa okwan'ne okhuchileka.”

⁸Kaini nabool'la omwana wabwe Abili mbu, “Chenda khutsie m'mukunda.” Ne olwa bali nibool'le m'mukunda, Kaini yasukhana omwana wabwe, ma namwira.

⁹OMWAMI nareeba Kaini mbu, “Omwana wenywe Abili ali hena?” Naye nakalusia mbu, “Simanyile tawe. Nise omulindi womwana wefwe noho?”

¹⁰OMWAMI naboola mbu, “Nisina esiokhol'le yisi? Amayoosi kamatsahi komwana wenywe kandakayilanga okhurula khwiloba.

¹¹Khe lunondi umal'le okhulaamwa okhurula khwiloba eliasamisie omunwa kwalio okhubukula amatsahi komwana wenywe okhurula m'makhono kaako.

¹²Olwa nolimenje khwiloba sinalikhuhelesinjie ebiraakwa bihela tawe, nobetsenje omuboyaboyi notimatima khusibala.”

¹³Kaini nabool'la OMWAMI mbu, “Omunyakhano yiku nomukali okhusila, sindi onyala okhwetuukha tawe.

¹⁴Undabinjia okhurula khwiloba khandi okhurula mumoni mumwo. Nambetsenje butswa omuboyaboyi owokhutimatima khusibala, oliinyoola wosi yakhanzire.”

¹⁵OMWAMI namubool'la mbu, “Tawe. Omundu wosi naba niyakhakhwira, yakhamal'lwakhwo es'sialia hali khane nakhataru.” Ma OMWAMI nara khu Kaini esilolelo khe omundu wosi omulola alekhe okhumwira.

¹⁶Ma Kaini narula imbeli wo MWAMI, namenya musibala sia “Nodi”[3] esili ebukwe wa Edeni.

¹⁷Kaini naba nende omukhasiwe, naye nabelekha ma niyebula omwana omusiani nibamukulikha Enoka. Kaini niyombokha litookho ma nalikulikha eliira liomwanawe Enoka.

¹⁸Enoka naye yali samwana Iradi, ne Iradi naba samwana Mehuyaeli, ne Mehuyaeli naba samwana Metsushaeli, ne Metsushaeli naba samwana Lameki.

¹⁹Lameki yaleera abakhasi babili, mulala yalangwa Ada ne oundi Sila.

²⁰Ada yebula Yabali, owali kukanyene yabo abamenyanga mumaheema nibaruka emiruko.

²¹Omusiani wabwe yalangwa Yubali, kukanyene abakhupi bobukhana nende lilele.

²²Sila naye niyebula Tubali Kaini owali omuruli webindu ebiomukasa nende ebibia. Omukhaana wanga Tubali Kaini yalangwa Naama.

²³Lameki nabool'la abakhasi baabe mbu, “Ada nende Sila, hul'le akanyenya okhuboola: Nzir're omwana omuyaaye sichila yaali okhukhupaka.

²⁴Nikakhaba wosi owakheera Kaini yakhamal'lwakhwo es'sialia hali khane nakhataru, nase wosi naba niyanzira, es'sialia siakhamal'lwakhwo hali amakhumi kane nakataru nende khane nakhataru.”

²⁵Adamu nende omukhasiwe banyoola omwana undi omusiani. Bamukulikha eliiralie Setsi. Mukha Adamu naboola mbu, “Nyasaye umbeye omwana omusiani owokhukalukha musilenje sia Abili owa Kaini yali okhwira.”

²⁶Setsi naye yamala niyebula omwana omusiani namukulikha Enoshi. Olwene yilwo nilwo olwabandu bachiaka okhwekayakaya muliira lio MWAMI litsienukhu.