Read lunyore OKHUCHIAKA 40 Bible Online

OKHUCHIAKA 40 - lunyore bible

OKHUCHIAKA 40

¹Olunyumakhwo omulindi wewaini yomuruchi we Misiri nende omuteekhi wemikaati bali okhukhol'la omuruchi obubi.

²Omuruchi yasinyikhila abemeli babili yabo

³ma nabara mububohe munyumba yomulindi wobuhambe, omwa Yosefu yali niyabohelwa.

⁴Bamala oluhono olurambi okhusila mububohe ma omulindi nahelesia Yosefu omulimo kwokhubarumikhila.

⁵Obutukhu bulala omulindi wewaini nende omuteekhi wemikaati baloora amalooro kabukhan'ne, buli mundu nende esifune siabukhan'ne khwiloorolie.

⁶Olwa Yosefu yeetsa khubo mukamba tsuli yalola nibarali nobusangali tawe.

⁷Nabareeba mbu, “Busina mubeeleye butswa ma mukhuunisie m'moni?”

⁸Nibakalusia mbu, “Buli mulala khu ifwe aloor're lilooro ne abulaho onyala okhukhubool'la esifune siamalooro kefwe.” Yosefu nababool'la mbu, “Nyasaye niye ohaananga esihanwa siokhuribula esifune siamalooro. Mbool'le amalooro kenywe.”

⁹Ma omulindi wewaini naboola mbu, “Mwilooro lianje omusabibu kwali imbeli wanje

¹⁰nikulikhwo tsisaka tsitaru. Olwa masaafu kachiaka okhurula ne esimuli nasio nisirula ma amatunde nikenga.

¹¹Esikombe siomuruchi siali nisili m'mukhono kwanje ma nimbukula amatunde nimiin'na musikombe nimbelesia omuruchi.”

¹²Yosefu naboola mbu, “Sino nisio esifune sieliloorolio: tsisaka tsitaru namatukhu kataru.

¹³Mumatukhu kataru omuruchi nakhulekhele ma nakhubohool'le, ma khandi nakhukalusie khumilimo chichio. Nomuhetsenje esikombesie singa khasotso olwa walinji omulindi wewaini.

¹⁴Nebutswa, noyanza olanzitsul'le olwe bindu biakhabe nibili bulahi khuibe, ma olarale eliira lianje khumuruchi ma olakhonye okhurula mububohe muno.

¹⁵Sichila tooto mwene ise ndeebwa okhurula musibala sia Abaheburania, ne kata mu Misiri muno sindakholakhwo esindu esiachila nimbohwa mububohe tawe.”

¹⁶Olwa omuteekhi wemikaati yalola mbu lilooro liomulindi wewaini linoosibwe bulahi, naye nabool'la Yosefu mbu, “Nase khandi ndali nelilooro. Ndali ninjinjile ebimwelo bitaru ebiemikaati khumurwe kwanje.

¹⁷Musimwelo sieikulu bialimwo ebiakhulia tsimbila lukano ebiomuruchi, ne amanyonyi kali nikabiliitsanga.”

¹⁸Yosefu nakalusia naboola mbu, “Sino nisio esifune sieliloorolio: ebimwelo bitaru namatukhu kataru.

¹⁹Mumatukhu kataru omuruchi nakhulakhuule ma nalake mbu omurwekwo kukhalakwe. Ma nahanikhe om'bilikwo khumusaala, ne amanyonyi nakalie om'bilikwo.”

²⁰Amatukhu kataru nikahweye, ne litukhu liomuruchi okhwitsul'la okhwibulwakhwe lioola, ma nalomba lisabo likali khulwabakholibe bosi. Yalakhuula omulindi wewaini nende omuteekhi wemikaati ma nabaleera imbeli wabakholibe.

²¹Yakalusia omulindi wewaini khumilimochie echiayakholanga,

²²nebutswa niyeera omuteekhi wemikaati. Kekhola butswa singa Yosefu yali nabooye.

²³Nebutswa omulindi wewaini siyamala apaalekhwo khuka Yosefu tawe — yali okhumwibil'la butswa.