Read lunyore OKHUCHIAKA 41 Bible Online

OKHUCHIAKA 41 - lunyore bible

OKHUCHIAKA 41

¹Emihika chibili nichibir're, omuruchi we Misiri yaloora lilooro, mbu yali nasinjiiye khundulo khwomuchela, kwa Naili

²ne nalola tsing'ombe tsine natsitaru tsikhomefu nitsirulanga m'maatsi ma nitsichiaka okhwaya obunyaasi.

³Ma tsing'ombe tsindi tsine natsitaru nitsirul'lamwo, tsiang'aha ma nitsilolekhanga amakumba. Nitsisinjila ahembi nende tsing'ombe tsiokhuranga khundulo khwomuchela.

⁴Tsing'ombe tsiali tsing'ahu nitsilia tsing'ombe tsikhomefu. Ma omuruchi nabuukha.

⁵Khandi olwe etsindoolo tsiamuhila yaloora lilooro lindi. Ebiangala bine nabitaru biamabele ebiakhomela obulahi, biali nibili khus'sina silala.

⁶Ma ebiangala bindi bine nabitaru ebiang'aha khandi ebianiala nibimelakhwo,

⁷ma ebiang'aha yibio nibimila ebiakhomela. Omuruchi nabuukha ne namanya mbu aloor'renje.

⁸Olwa bwasia yali nende esihenda mwoyo, ma nalanga abafumu nende abandu bobuchesi musibala sie Misiri siosi. Nababool'la liloorolie, ne siyalikhwo mubo owanyala okhuboola esifune sielilooro liomuruchi tawe.

⁹Ma omulindi wewaini nabool'la omuruchi mbu, “Nyenyanga ndeyame mbu ndakhola obubi.

¹⁰Wali okhusinyikhila omuteekhi wemikaati nende ise, ma nokhura mububohe munyumba yomwemeli wabasikari behangowo.

¹¹Obutukhu nalebe fwesi khwaloora amalooro akabukhan'ne khandi akebifune biabukhan'ne.

¹²Yalimwo omusiani Omuheburania, owali omubohe womwemeli wabasikari. Khwamubool'la amalooro kefwe ne naye nakhubool'la ebifune biako.

¹³Akayakhubool'la niko akamala nikekhola. Ise wangalusia khumilimo chianje, ne omuteekhi wemikaati nomwira.”

¹⁴Omuruchi yarumana mbu Yosefu yendwe, ma nahiinibwa mububohe bwangu, nabeka tsindefu, ma naheebwa tsingubo tsindahi niyebiikha, nahilwa imbeli womuruchi.

¹⁵Omuruchi namubool'la mbu, “Ndor're lilooro ne abulaho onyala okhulinoosia tawe. Mbooleywe mbu ibe onyala okhuboola ebifune biamalooro.”

¹⁶Yosefu nakalusia mbu, “Ise sinyala tawe, Omwami wanje, nebutswa Nyasaye anyala okhuhaana esifune esilahi esieliloorolio.”

¹⁷Omuruchi naboola mbu, “Ndor're mbu ndali nisinjiye khundulo khwomuchela kwa Naili,

¹⁸netsing'ombe tsine natsitaru tsikhomefu nitsirula mumuchela ma nitsichiaka okhwaya obulimo.

¹⁹Ma tsing'ombe tsindi tsine natsitaru nitsirul'lamwo, tsing'ahu okhusila etsiasili okhulolakhwo mu Misiri mwosi.

²⁰Ma tsing'ombe tsing'ahu nitsilia tsikhomefu,

²¹ne abulaho omundu owakhamanyile tsiliiye etsindi sichila tsiatsilil'la butswa okhuba tsing'ahu. Ma nimbuukha.

²²Khandi nindoora mbu nduutsi ebiangala bine nabitaru ebiamabele, ebikhomefu nibili khus'sala silala.

²³Ma ebiangala bindi bine nabitaru ebiang'aha okhusila nibimela,

²⁴ne yibio nibimila ebikhomefu. Mbooleye abafumu banje amalooro yaka nebutswa abulaho khubo onyala okhunyinoosia ebifune biako.”

²⁵Yosefu nabool'la omuruchi mbu, “Amalooro kabili yako kali nende esifune silala. Nyasaye ukhumanyisie akanakhole.

²⁶Tsing'ombe tsine natsitaru tsikhomefu nemihika chine nachitaru, khandi ebirwe bine nabitaru biamabele nemihika emiteelwa chine nachitaru yichio, ne kali nesifune silala.

²⁷Tsing'ombe tsine natsitaru etsietsa nyuma ma nende ebiangala biatora bine nabitaru biobuswache ebietsa nyuma nemihika chine nachitaru echieinzala.

²⁸Kali butswa singa khubooleye — Nyasaye ukhumanyisie aka yenya okhukhola.

²⁹Emihika nachibeho chine nachitaru echieinzikura musibala siosi esie Misiri.

³⁰Inyuma wachio inzala nebeho ikhongo khulwemihika chindi chine nachitaru, ne emihika emilahi chiosi chiakhebil'lwe sichila inzala yakhamume esibala.

³¹Tsinyinga tsieinzikura tsiakhebil'lwe sichila inzala yakhalondekhwo yakhabe imbibibi okhusila.

³²Olwe lilooro litsile khabili kaboolanga mbu amang'ana yaka kaloosibwe nende Nyasaye ne nalole mbu kekhol'le ahembi yaha.

³³“Luno kenyekhanga wele omundu oli nobuchesi nende okhumanyilisia ma omwemekhe okhulinda esibala.

³⁴Khandi wahule abemeli bandi abokhusolola esitonye siakharano siamachese okhurula khubandu khulwemihika chine nachitaru echieinzikura.

³⁵Obalache okhusolola ebiakhulia biosi mumihika emilahi echiitsanga, ma obahelesie obunyali okhulomba ebiachi mumataala ebiokhubiikhamwo ebiakhulia ma babilinde obulahi.

³⁶Ebiakhulia yibio biakhabe libiikhilo liesibala sino mumihika chine nachitaru echieinzala echianachiitse musibala sie Misiri. Munjila yiyi abandu sinabanyakhane khulweinzala tawe.”

³⁷Omuruchi nende abemelibe bahuchiil'la inganakani yiyi,

³⁸ma nababool'la mbu, “Sikhwakhanyoola oundi onyala okhuyomba Yosefu, omundu owomwoyo wa Nyasaye alimwo tawe.”

³⁹Ma omuruchi nabool'la Yosefu, “Nyasaye niye owakhumanyisie kano kosi, ma kalolekhele kol'lani mbu oli nende obuchesi nende obumanyilisi obwomundu undi wosi aralikhwo n'nabwo tawe.

⁴⁰Nzia okhukhukhola omusinjil'li wesibala sianje, ne abandu banje bosi nabakhuhul'lenje. Obunyalibwo nabubetsenje butswa hasi wobwanje bwonyene.

⁴¹Luno khweelanga okhuba omukafuna musibala sie Misiri siosi.”

⁴²Ma omuruchi nahiinia ingaka khusiteresie elimwo nende omuhuri kwobwami, nara khusitere sia Yosefu. Namubikha tsingubo etsiekatani tsindahi ma namura mwikosi omunyol'lo kwetsahabu.

⁴³Namuhelesia likarilie eliakhabili elioburuchi okhuchendelamwo, ne abasikari beemela imbeliwe nibaboola, “Rule khunjila.” Ma nimbwo Yosefu yeelwa okhuba omukafuna we Misiri.

⁴⁴Omuruchi namubool'la mbu, “Ise nise omuruchi; abulaho omundu mu Misiri mwosi owanochinguule omukhono nohomba esilenje norahuchiliye.”

⁴⁵Omuruchi nakulikha Yosefu eliiralie Misiri mbu Safenatsi Panea, ma nomuhelesia omukhasi owalangwa Asenatsi, omukhaana wa Potifera, owali omwesaalisi wa Oni.

⁴⁶Yosefu yali nemihika amakhumi kataru olwa yachaaka okhurumikhila omuruchi we Misiri. Yarula munyumba yobwami eyomuruchi ma nachendela esibala yisio siosi.

⁴⁷Mumihika chine nachitaru echieinzikura, esibala sialimwo amachese amenji,

⁴⁸ma Yosefu nasolola ebiakhulia nabiikha mumataala. Mubuli litaala yabikhangamwo ebiakhulia okhurula mumikunda chili ahembi.

⁴⁹Ebichese biali ebinji okhusila ma kata Yosefu nalekha okhuchela. Biali butswa singa omuyekhe khundulo khweinyanza.

⁵⁰Emihika chieinzala nichisili okhuchiaka, Yosefu nende Asenatsi banyoola abaana babili.

⁵¹Ma Yosefu nakulikha owokhuranga Manase, naboola mbu, “Nyasaye ukhol'le nzibiliye amanyakhano kanje kosi nende akahango hefwe.”

⁵²Owakhabili yamukulikha Efuraimu, naboola, “Nyasaye umbeeye olwibulo musibala siandanyakhan'namwo.”

⁵³Emihika chine nachitaru echieinzikura eyaliho musibala sie Misiri nichihwa,

⁵⁴ma emihika chine nachitaru echieinzala nichichiaka singa Yosefu yali niyaboola. Inzala yali mubibala bindi biosi nebutswa ebiakhulia nibiba musibala sie Misiri.

⁵⁵Olwa Abaamisiri bachiaka okhunyoola inzala balakayila omuruchi mbu abaheelesie ebiakhulia. Ma nabalaka batsie khu Yosefu ma bakhole kosi aka ababool'la okhukhola.

⁵⁶Inzala yameetekha ma nelanda musibala siosi, ma Yosefu niyekula ebiachi biosi nakusisia Abaamisiri ebiakhulia.

⁵⁷Abandu beetsa Emisiri okhurula mubibala bindi biosi okhukula ebiakhulia, okhurula khu Yosefu sichila inzala yali ingali okhusila habundu hosi.