Read lunyore OKHUCHIAKA 42 Bible Online

OKHUCHIAKA 42 - lunyore bible

OKHUCHIAKA 42

¹Olwa Yakobo yahul'la mbu ebiakhulia bili Emisiri, yabool'la abasianibe mbu, “Muhengananga mbwena?

²Mbul'langa ebiakhulia bili Emisiri, tsieyo mukulekhwo, inzala elekhe okhwira.”

³Ma abasiani banga Yosefu likhumi nibatsia okhukula ebiakhulia Emisiri,

⁴nebutswa Yakobo siyaruma omwana wanga Yosefu mwene owalangwa Benjameni tawe sichila yaria esindu siakhekhola khuye esibi.

⁵Abasiani ba Yakobo beetsa nende abandu bandi okhukula ebiakhulia, sichila inzala yali musibala sia Kanaani.

⁶Yosefu, nali singa Omukafuna wesibala sie Misiri, niye owakusinjia ebiakhulia khubandu okhurula mubibala biosi, ma abaana banga Yosefu nibeetsa nibamwinamila.

⁷Olwa Yosefu yalola abaana babwe, yabamanyiliisia, nebutswa nakoyokoyia singa orabamanyile. Nabareeba nobululu, “Inywe murul'le hena.” Nabo nibakalusia mbu, “Khurul'le Kanaani, khwitsile okhukula ebiakhulia.”

⁸Kata olwa Yosefu yamanyilisia abaana babwe, bo sibamumanya tawe.

⁹Yetsul'la amalooro akayalooranga khubo ma nababool'la mbu, “Inywe muli abarunilisi. Mwitsile okhulola obutofu bwesibala siefwe.”

¹⁰Nibamubool'la mbu, “Tawe, omwami, khwitsile singa abasumbabo, okhukula ebiakhulia.

¹¹Ifwe fwesi khuli abaana bomundu mulala. Sikhuli abarunilisi tawe, khuli abandu batooto.”

¹²Yosefu nababool'la, “Tawe, inywe mwitsile okhulola obutofu bwesibala siefwe.”

¹³Nabo nibaboola, “Khwali abasiani likhumi nende babili abomundu mulala musibala sia Kanaani. Mulala wafwa ne omukhokosi yasikaye nende papa.”

¹⁴Yosefu nababool'la mbu, “Kali butswa singa mbooye. Inywe muli abarunilisi bamang'ana.

¹⁵Ne mwitsa okhumanyikha mbu: Ndesuhanga khuliira liomuruchi mbu simurula hano tawe okhwola olwo omwana wenywe omukhokosi nayetse hano.

¹⁶Mulala khu inywe okhwola atsie okhumwenda. Abandi betsa okhubohwa okhwola olwa amang'ana kenywe nakamanyikhe nikali akatooto. Nikarali mbwo tawe, singa obwa omuruchi ali mwoyo, inywe muli abarunilisi bamang'ana.”

¹⁷Ma nabara mububohe khulwa amatukhu kataru.

¹⁸Khwitukhu liakhataru Yosefu nababool'la, “Ise ndi omundu owaria Nyasaye, khe nzia okhumulekhela nimuba nimusubisia ling'ana elala.

¹⁹Okhumanyia mbu muli abatooto, mulala khu inywe asikale mububohe bwamwabeyenjemwo, ne abandi mutsie muhil'le abandu benywe ebiakhulia biamukul'le.

²⁰Ma okhwola munder're omwana wenywe omukhokosi. Kano nakamanyie mbu muboolanga akatooto, ne sindakhamwiira tawe!” Bahuchilisania khukene yaka,

²¹ma nibabool'lana abene khubene, “Tooto mwene khunyakhananga khulwa akakhwakhol'la omwana wefwe, khwalola amanyakhano kayalimwo olwa yakhusaaya khumukhonye, nebutswa sikhwahul'la tawe. Niko akachilanga nikhunyakhana.”

²²Rubeni naboola mbu, “Ndamubool'la mulekhe okhusaalisia omwana uyo nenywe nimusuula okhuhul'la. Niko akachilanga nikhurungwa kano khulwokhufwakhwe.”

²³Yosefu yamanyilisia akababoolanga nabo sibamanya tawe sichila bal'lomanga khuye ne omundu nakalukhanichis'sia Yosefu.

²⁴Yamala niyekwenya elubeka ma nachaaka okhulakaya. Olwa yakalukha, yabukula Simioni, nalaka abohwe imbeli wabwe.

²⁵Yosefu nalaka mbu amakunia kabaana babwe ketsusibwemwo obuswache, ma amapesa kabuli mulala karebwe mwikunia lilie ma khandi bahebwe ebiakhulia biokhuliila khuluchendo. Ma nibakhol'lwa mbwo.

²⁶Abasiani yabo nibara obuswache bwabwe khutsipunda ma nibarula.

²⁷Habundu habahulukhila butukhu, mulala khubo nabohol'la likunia lilie mbu alisie epundaye ne nanyoola amapesa nikali mwikunia.

²⁸Nabool'la abamwabo, “Amapesa kanje kakalusiibwe, kali mwikunia lianje yimu.” Bamala nibafwa emioyo okhusila nibareebana muburi, “Nyasaye akhukholeye sina sino?”

²⁹Olwaboola khu Yakobo samwana mu Kanaani, bamubool'la kosi akali nikekhol'le khubo:

³⁰“Omukafuna wesibala sie Misiri yal'lomele n'nefwe obululu ma naboola

³¹ifwe khuli abarunilisi bamang'ana musibalasie. Nikhumukalusia mbu, ‘Ifwe sikhuli abarunilisi tawe, khuli butswa abandu abalahi.

³²Khwali abasiani likhumi nende babili, abaana bomundu mulala. Mulala wafwa, ne omukhokosi yasikaye Kanaani nende papa wefwe.’

³³Omundu tsana naye nakalusia, ‘Kano niko akanzia okhumanyilakhwo nimuli abandu abalahi: Mulala khu inywe okhwola asikale, ne abandi mubukule obuswache muhil'le abandu benywe abali mwinyakhana khulweinzala.

³⁴Munder're omusiani wenywe omukhokosi. Nimukhola mbwo ne namanye simuli abarunilisi tawe, muli abandu abalahi, ne namukaluchis'sie omusiani wenywe, ma mumenye hano mukhole obukhala.’ ”

³⁵Olwa batsukha obuswache bwabwe okhurula mumakunia buli mulala khubo yanyoola omurukokwe kwamapesa mwikunialie, ne olwa balola amapesa yako, bo nende samwana bamala nibaria okhusila.

³⁶Samwana nababool'la mbu, “Mwenyanga ngosie abaana banje bosi? Yosefu watsia, Simioni utsiye, ne luno mwenyanga mubukule Benjameni. Ise nise omwene osal'langa!”

³⁷Rubeni nabool'la samawna, “Nimbula okhukhukaluchis'sia Benjameni, nawiire abasiani banje babili. Omure mumakhono kanje, ne okhwola namukalusie.”

³⁸Nebutswa Yakobo naboola mbu, “Omwana wanje satsiakhwo n'nenywe tawe, omusiani wabwe wafwa ma niye owasikala yenyene. Esindu sinyala okhwekhola khuye khunjila. Ise ndi omusakhulu, esibeela siakhanzira.”