Read lunyore OKHUCHIAKA 43 Bible Online

OKHUCHIAKA 43 - lunyore bible

OKHUCHIAKA 43

¹Inzala yameetekha okhusila mu Kanaani,

²ma Olwa abeinyumba ya Yakobo bali nibaliiye obuswache bwosi obwabaleera okhurula Emisiri, Yakobo yabool'la abaanabe mbu, “Kalukhe, mukhukul'lekhwo ebiakhulia bindi.”

³Yuda namubool'la mbu, “Omusaatsa we Misiri yakhulaka obutinyu mbu sinakhuhuchil'lwekhwo okhumulola nikhurali nende omwana wefwe omukhokosi tawe.

⁴Nikakhaba uhuchiliye khutsie nende omwana wefwe, ne khutsia okhukhukul'la ebiakhulia.

⁵Ne norahuchiliye, ne sikhutsia tawe, sichila omundu uyo yakhubool'la sinakhuhuchil'le okhumulola nikhurali no mwana wefwe tawe.”

⁶Yakobo naboola mbu, “Busina nimundeer'ra amanyakhano okhubool'la omundu uyo mbu muli nende omwana wenywe undi?”

⁷Nibamukalusia mbu, “Omundu uyo yakhurebelesisie amang'ana amenji khubeinyumba yefwe singa, ‘Papa wenywe asiliho mwoyo? Mulikhwo nende omusiani wenywe undi?’ Kakhuhachia okhwola khukalusie amareebo kaake. Khwakhamanyile mbwena nakhureebe okhumuleer'ra omwana wefwe?”

⁸Yuda nabool'la samwana mbu, “Ruma omusiani khutsie n'naye, ma khurule bwangu, khe omundu wosi abule okhufwakhwo khulweinzala.

⁹Nzia okhuhaana obulamu bwanje singa esiesingo. Nimba niramuleera naali omulamu, mbuchiliye okhutulwa.

¹⁰Khulaba abaralin'de oluhono khane khutsiye esiakhabili nikhuchel'langa.”

¹¹Samwana nababool'la mbu, “Nikali okhwola kekhole mbwo, khe mubukule ebihanwa ebilahi musibala siefwe mure mumakunia kenywe bibe ebihanwa khu mwami. Mumuhil'le omusaala kwomwayo omulahi, obuukhi, obubaane, obusakisaki, tsinjuku, nende etsilusi.

¹²Khandi mubukule amapesa esiakhabili sichila okhwola namukalusie akamwakaluchisisie mumakunia kenywe. Haundi kabeye amabi.

¹³Bukule omusiani wenywe mutsie n'naye nebutswa namukalukhe bwangu.

¹⁴Nyasaye Wokhunyala Biosi achile omundu uyo amubeele esirenda, khe abe onyala okhumuhelesia Benjameni nende omwana wenywe undi. Ne nase, nikali mbu okhwola ngosie abaana banje khe okhwola mbakosie.”

¹⁵Ma abasiani yabo nibabukula ebihanwa nende amapesa esiakhabili, nibachaaka oluchendo lwokhutsia Emisiri nibali nende Benjameni. Olwa boolayo nibemanyia khu Yosefu.

¹⁶Olwa Yosefu yalola Benjameni nali n'nabo yabool'la omukholi womunyumbaye mbu, “Yila abandu yaba munyumba mwanje. Betsa okhulia n'nase ebiakhulia biam'basu, khe muber're omuruko ma mukutekhe.”

¹⁷Omukholi nakhola singa yalakwa ma nahila abasiani yabo munyumba mwa Yosefu.

¹⁸Olwabali nibahilwanga munyumba, baria okhusila nibapaala, “Khulerwanga hano khulwamapesa kakalusibwa mumakunia kefwe olwokhuranga. Betsa okhukhwinjil'la ma babukule etsipunda tsiefwe ne nefwe bakhukhole okhuba abasumbabe.”

¹⁹Khe olwa boola m'muliango kweinyumba nibabool'la omukholi mbu,

²⁰“Omwami, ifwe khwetsakhwo yino okhukula ebiakhulia.

²¹Olwa khwoola habundu hokhuhulukhila nikhuli khuluchendo lwokhukalukha ingo, khwekula amakunia kefwe ne buli siamulala khu ifwe nanyoola amapesa kaake mwikunialie — kosi butswa obwakali. Khukakalusisie khuibe.

²²Khandi khwitsile nende amapesa kandi okhukula ebiakhulia bindi. Sikhumanyile niwina owakalusia amapesa mumakunia kefwe tawe.”

²³Omukholi uyo naboola mbu, “Murahenda emioyo nohomba okhuria tawe. Nyasaye wenywe, Nyasaye wa papa wenywe niye owamureela amapesa mumakunia kenywe. Ise ndanyooye omurungo kwenywe.” Ma nabaleer'ra Simioni.

²⁴Omukholi uyo nahila abasiani yabo munyumba. Nabahelesia amaatsi besaabe ebilenje biabwe, ma naliisia etsipunda tsiabwe.

²⁵Barechekha ebihanwa biabwe okhuhaana khu Yosefu olwa yeetsa khubilibwa biam'basu, sichila bali nibabooleywe mbu beetsa okhulia n'naye.

²⁶Olwa Yosefu yoola munyumba, bamuhil'la ebihanwa ne nibamwinamila bosi.

²⁷Nabareeba nibali abalamu ma naboola, “Mwambool'la aka omusakhulu papa wenywe — ali mbwena? Asili omulamu?”

²⁸Nibakalusia mbu, “Omurumikhiliwo papa wefwe, asili omulamu khandi ali bulahi.” Ma nibasikama nibamwinamila.

²⁹Olwa Yosefu yalola amwabowe, Benjameni, yaboola mbu, “Uno khane niye omusiani wenywe omukhokosi, owamwambool'la? Nyasaye akhulaamile ikhabi, omusiani wanje.”

³⁰Ma Yosefu narula matetekhana, sichila omwoyokwe kwalimwo amahofu amenji khumwana wabwe, niyenjila musikoti sindi natsia okhulakaya.

³¹Olwayali niyakhosia m'moni yakalukha niyetinyia ma nalaka mbu ebiakhulia bileerwe.

³²Yosefu yaheelwa ebiakhulia khumesa ndala ne abasiani babwe khumesa yindi. Abaamisiri abalimwo baheelwa ebiakhulia khumesa yindi sichila balola nomusilo okhulia halala nende Abayahudi.

³³Abasiani yabo bali nibekhaye khumesa eyali nehenjele Yosefu, nibeloosisie okhulondokhana nelikhula liabwe, okhurula khumukhulundu okhwola khumukhokosi. Olwabalola singa bali nibekhaye nibahengana ma nibahuka.

³⁴Baleer'rwa ebiakhulia okhurula khumesa ya Yosefu, ne Benjameni yaheebwa ebiakhulia esiakharaano okhuyomba abandi bosi. Ma nibalia khandi nibanywa okhwola nibakholwa.