Read lunyore OKHUCHIAKA 44 Bible Online

OKHUCHIAKA 44 - lunyore bible

OKHUCHIAKA 44

¹Yosefu yalaka omukholi owali omusinjil'li weinyumbaye mbu, “Yitsusia amakunia kabandu yaba ebiakhulia ebinji ebiabanyala okhuchinga, ma ore amapesa kabuli mulala khwikulu khwelikunialie.

²Ore esikombe sianje esiomukasa mwikunia liomwana wabwe omukhokosi, halala nende amapesa kobuswachebwe.” Naye nakhola singa yabool'lwa.

³Olwa bwasia, abasiani yabo nibaseebulwa nende etsipunda tsiabwe.

⁴Olwabali nibasili okhutsia ehale muno okhurula mwitookho, Yosefu nabool'la omukholi owali omusinjil'li weinyumbaye, “Tsia bwangu, olonde abandu bala. Olwanobanyoole nobareeba, ‘Esichil'le nimurunga obubi khubulahi nisina?

⁵Nisina esichil'le nimwiiba esikombe siomwami wanje esiomukasa? Nisio esia anywelangamwo, khandi esiakhol'langamwo obulakulibwe. Mukhol'le obubi okhusila.’ ”

⁶Olwomukholi uyo yabanyoola, nababool'la amang'ana kene yako.

⁷Nibamukalusia mbu, “Omwami, oli nasifune sina, okhuboola yaka?

⁸Ibe umanyile mbu khwakhukaluchisiye amapesa akakhwanyoola mumakunia kefwe okhurula Kanaani, esiakhachila khuibe omukasa nohomba etsahabu okhurula munyumba yomwamiwo nisina?

⁹Omwami, mulala khu ifwe niyakhanyoolekha nali n'nasio, yerwe, ne ifwe abandi fwesi nakhube abasumba baabo.”

¹⁰Naye naboola mbu, “Mbuchiliye, nebutswa owanonyoolekhe nende esikombe yenyene niye owanobe omusumba wanje, ne abandi bosi muba abalakhuule okhutsia.”

¹¹Ma nibaruula amakunia kabwe bwangu, ne buli mulala niyekula likunialie.

¹²Omukholi wa Yosefu nakhaaba, nachiakila khumukhulundu ma namaliil'la khumukhokosi, ne esikombe nisinyoolekha mwikunia lia Benjameni.

¹³Abaana babwe nibarandula tsingubo tsiabwe musibeela, nibatuukha etsipunda tsiabwe ma nibakalukha mwitookho.

¹⁴Olwa Yuda nende abaana babwe boola munyumba ya Yosefu, banyoola nasilimwo. Nibamwinamila,

¹⁵ma Yosefu nababool'la mbu, “Mukhol'le sina yisi? Simumanyilenje omundu singa ise nyala okhukhola oburoobi mamanye akamukhol'le tawe?”

¹⁶Yuda nakalusia mbu, “Khwakhakhubool'la sina, omwami, khwakhakhanuukha mbwena? Khwakhabisa mbwena obubi bwefwe? Nyasaye ubisuuye obubi bwefwe. Fwesi khe luno khuli abasumbabo halala nende owesikombe sinyolekhele mwikunialie.”

¹⁷Yosefu naboola, “Tawe, sindakhakholambwo tawe! Uyo owali nende esikombe yenyene niye owanobe omusumba wanje. Abandi murule mukalukhe khu senywe nomulembe.”

¹⁸Yuda yatsia khu Yosefu ma naboola, “Omwami, noyanza ohuchiil'le n'nome n'nawe nobulakhuule. Orasinyikhila tawe, ibe ofwana singa omuruchi mwene.

¹⁹Omwami, wakhureeba mbu, ‘Muli nende senywe nohomba omusiani wenywe undi?’

²⁰Khwakhukalusia mbu, ‘Khuli nende papa owasaakhula ma khandi khuli nende omusiani wefwe omukhokosi owayebula nali omusakhulu. Omusiani wanga omwana uyu wafwa, ma niye osilikhwo omulamu yenyene khubaana ba nyina. Samwana wamuyanza okhusila.’

²¹Omwami, wakhubool'la khumuleere, omulole,

²²nefwe nikhukhukalusia mbu omwana uyo sali olekha samwana tawe, narulaho ne samwana yakhafwa.

²³Ma noboola mbu, ‘Sinambuchil'le okhumulolakhwo m'moni mwanje nimuretsele nende omwana wenywe omukhokosi tawe.’

²⁴“Olwa khwakalukha khu papa, khwamubool'la akawali nobooye.

²⁵Ma nakhubool'la khukalukhe khukule ebiakhulia bindi.

²⁶Nefwe nikhumukalusia mbu, ‘Sikhunyala okhwitsa tawe, sinakhuhuchil'lwe okhulola omusaatsa uyo nikhurali nende omwana wefwe omukhokosi tawe. Khunyala okhutsia nikali omwana wefwe omukhokosi atsia halala n'nefwe.’

²⁷Papa wefwe nakhubool'la mbu, ‘Mumanyile bulahi mbu omukhasi wanje Raheli yanzibul'la abaana babili bonyene.

²⁸Mulala yaarulakhwo. Okhwola abe niyaliibwa nende etsisolo tsiom'bulimo sichila sili okhumulolakhwo okhurula olwene yilwo.

²⁹Nimwakhabukula uno lunondi ma esindu nisiekhola khuye, esibeela siamwakhandekhela siakhanzira obwandi omusakhulu mbu.’

³⁰“Luno, nindakhatsia khu papa wanje nirali nende omwana uyo tawe, olwa nayandole nirali n'naye Ise nafwe.

³¹Obulamubwe bwahambaana nende obwomusiani uno ne nomusakhulu okhusila, esibeela siakhamwiira.

³²Okhuyomba yako ise ndasinga obulamu bwanje khulwomwana uyu. Ndabool'la papa mbu nimbula okhukalusia omwana uyu, mbe owokhutulwa mubulamu bwanje bwosi.

³³Khe luno khusaayanga mbu olekhe ise sikale hano singa omusumbawo musilenje siomwana uyu, olekhe akalukhe ingo nende abasiani babwe.

³⁴Ndakhakalukha mbwena khu papa nikhurali nende omwana uyu? Sindakhefwila okhulola amabi nikamukwiila Papa tawe.”