Read lunyore OKHUCHIAKA 45 Bible Online

OKHUCHIAKA 45 - lunyore bible

OKHUCHIAKA 45

¹Yosefu yamala naramwa okhwesimilisia imbeli wabakholibe, ma nalaka mbu barule. Omundu undi wosi siyaliho olwa Yosefu yeribul'la abasiani babwe tawe.

²Yalakaya nende omwoyo omukali okhusila ma Abaamisiri nibahul'la, ne amang'ana yaka kamala nikool'la abomunyumba yomuruchi.

³Yosefu nabool'la abasiani babwe, “Ise nise Yosefu. Papa asili mwoyo?” Olwabaana babwe bahul'la yako baria okhusila ma kata sibali abanyala okhukalusia tawe.

⁴Ma Yosefu nababool'la “Esute ahembi.” Nabo nibesunda, ma nababool'la, “Ise nise omwana wenywe Yosefu owamwali okhukusia Emisiri.

⁵Ne murabelela kata okhwetula sichila mwangusia yino tawe. Yali Nyasaye owaaruma ise okhwiitsa imbeli wenywe okhuhonia obulamu bwabandu.

⁶Kuno nomuhika kwakhabili inzala okhuba musibala, emihika chindi chirano chisili echiomundu arakhanyale okhulima nohomba okhuchesa tawe.

⁷Nyasaye yanyemesia imbeli wenywe khulwa okhumuhonia munjila yokhuchenya nende okhulola mbu inywe nende abetsinzibulo tsienywe muli mwoyo.

⁸Khe simwali inywe abandeera yino tawe, ni Nyasaye. Niye owakhola ise okhuba omukhongo womuruchi. Nise osinjiliye esibala siosi, ma nise omukhongo we Misiri yosi.

⁹Luno rule mutsie khu papa mumubool'le mbu kano niko akomwanawe Yosefu aboolanga, ‘Nyasaye waikhola okhuba omwami we Misiri, yitsa yino sila okhucheleba.

¹⁰Nomenye musibala sia Kosheni khe nobetsenje ahembi n'nase, ibe mwene, abaanabo abetsukhulubo, amakondiko, tsimbusitsio tsing'ombetsio nende ebindu bindi biosi ebioli n'nabio.

¹¹Noli mu Kosheni, ise nakhulindenje. Nachibe nichisikaye emihika chirano echieinzala, ne sindakhenya ibe, abeinyumbayo nende emirukochio okhufwa khulweinzala tawe.’ ”

¹²Yosefu yatsilil'la okhuboola mbu, “Luno inywe mwesi muluutsi, kata khandi Benjameni, mbu ise nise Yosefu.

¹³Mubool'le papa singa ndi nobunyali musibala sie Misiri sino ma m'mubool'le kosi akamuluutsi. Mwanguhe mumuleere hano.”

¹⁴Nakwaka Benjameni ma nachaaka okhulakaya, Benjameni naye khandi nalakaya olwa bakwakana.

¹⁵Ma natsunzuuna abaana babwe bosi nasilakaya. Olweinyuma abaana babwe bamala nibakhupa n'naye imbakha.

¹⁶Olwa mang'ana koola munyumba yomuruchi mbu abasiani banga Yusufu betsele, omuruchi nende abakholibe basangaala.

¹⁷Omuruchi nabool'la Yosefu mbu, “Bool'la abasiani benywe batuukhe etsipunda tsiabwe ebindu ma bakalukhe musibala sia Kanaani.

¹⁸Batsie babukule samwana nende abeekho babwe bosi ma bakalukhe yino. Nambahelesie liloba lilahi mu Misiri ma nabalie khubunolu bwesibala.

¹⁹Obabool'le khandi babukule amakaari okhurula Emisiri batsie n'nako khulwokhuchinga abakhasi babwe nende abaana babwe abatitiiti ma khandi beetse nende samwana.

²⁰Barakhahendel'lakhwo okhulekha emiandu chiabwe ingo tawe, ebindu ebilahi ebili musibala sie Misiri nabibe ebiabwe.”

²¹Abaana ba Yakobo bakhola singa babool'lwa. Yosefu yabaheelesia amakaari singa omuruchi yali nalachile, ma nende ebiakhulia ebiokhuliila khunjila.

²²Khandi nahelesia buli mulala khubo tsingubo tsiokhwekalukhania, nebutswa yahelesia Benjameni ebitonye etsimia tsitaru ebiefetsa nende tsingubo tsiokhwekalukhania tsirano.

²³Narumila samwana etsipunda likhumi nitsituukhilwe ebindu ebilahi bie Misiri nende etsipunda tsindi likhumi nitsilikhwo obuswache, emikaati, nende ebiakhulia bindi khulwoluchendo.

²⁴Nasebula abaana babwe ne olwa bali nibarulanga nababool'la mbu, “Murasoolan'na khunjila tawe.”

²⁵Barula Emisiri nibakalukha ingo wabwe Kanaani khusamwana wabwe Yakobo.

²⁶Nibamubool'la, “Yosefu asili mwoyo. Niye omuruchi we Misiri.” Yakobo yang'ang'aala butswa ne siyabasubila tawe.

²⁷Ne olwa bamubool'la kosi aka Yosefu yali nababooleye, ma olwa yalola amakaari aka Yosefu yali narumile khulwokhumuhila Emisiri, omwoyokwe nikukalukha.

²⁸Naboola, “Omwana wanje Yosefu asili mwoyo! Yaka kahel'le. Okhwola nzie okhumulolakhwo nisili okhufwa.”