Read lunyore OKHUCHIAKA 46 Bible Online

OKHUCHIAKA 46 - lunyore bible

OKHUCHIAKA 46

¹Yakobo yaboha biosi ebiayali n'nabio ma natsia Berisheba, ahayakhol'la emisango khu Nyasaye wa papa uwe Isaka.

²Nyasaye nal'loma n'naye mwilooro butukhu, namulanga, “Yakobo, Yakobo!” Naye nahuchil'la mbu, “Yee, ndi hano.”

³Naboola, “Ise nise Nyasaye, Nyasaye wa papawo. Orakharia okhutsia Emisiri tawe, ndakhalombe olwibulolwo okhuba esibala esikali.

⁴Ndakhatsie n'nawe Emisiri, ma khandi ndakhakalusie olwibulolwo musibala sino. Yosefu yakhabe n'nawe olwa wakhafwe.”

⁵Yakobo nachaaka oluchendo okhurula Berisheba. Abasianibe nibamura ye halala nabaana, nabakhasi babwe mumakaari akomuruchi we Misiri yali nahaan'ne.

⁶Babukula emiruko chiabwe nende biosi ebiabali nibanyoola Kanaani ma nibatsia Emisiri. Yakobo yabukula abolwibulolwe bosi,

⁷abasianibe, abakhaanabe nende abetsukhulube.

⁸Abeinyumba ya Yakobo abayatsia n'nabo Emisiri bali omusianiwe omukhulundu Rubeni,

⁹nende abaana ba Rubeni, Hanoki, Palu, Hesironi nende Karimi.

¹⁰Simioni nende abasianibe: Yemweli, Yamini, Ohadi, Yakini, Sohari, nende Shauli, omwana womukhasi Omukanaani.

¹¹Lawi nende abasianibe: Gerishoni, Kohatsi, nende Merari.

¹²Yuda nende abasianibe: Shela, Peresi, Sera. Abasiani bandi ba Yuda Eri nende Onani bali nibafwila Kanaani. Abasiani ba Peresi bali Hesironi nende Hamuli.

¹³Isakari nende abasianibe: Tola, Puwa, Yashubu nende Shimironi.

¹⁴Sabuloni nende abasianibe: Seredi, Eloni, nende Yaleeli.

¹⁵Bano nibo abasiani aba Lea yali niyebul'la Yakobo mu Mesopotamia, halala nende omwana omukhaana owalangwa Dina. Abolwibulolwe abayanyoola okhubir'ra mu Lea bosi bali amakhumi kataru nende bataru.

¹⁶Khandi yatsia nende Gadi nende abasianibe: Sefori, Hagi, Shuni, Eseboni, Eri, Arodi, nende Areli.

¹⁷Asheri nabasianibe: Imina, Ishiwa, Ishiwi nende Beria, ma nende omukhaana wabwe Sera. Abasiani ba Beria bali Heberi nende Malakhieli.

¹⁸Likhumi nende basasaba yaba nibo abolwibulo lwa Yakobo abayanyoola okhubir'ra mu Silipa, owali omukhaana omukholi owa Labani yahelesia omukhaanawe Lea.

¹⁹Omukhasi wa Yakobo owalangwa Raheli yamwibul'la abaana babili: Yosefu nende Benjameni.

²⁰Yosefu yebul'la musibala sie Misiri abasiani babili, Manase nende Efuraimu okhurula mu Asenatsi omukhaana wa Potifera, omwesaalisi wa Oni.

²¹Abaana ba Benjameni bali Bela, Bekeli, Ashibeli, Gera, Naamani, Eli, Roshi, Mupiimu, Hupimu, nende Aradi.

²²Likhumi nende bane bano nibo aba Yakobo yanyoola okhubir'ra mu Raheli.

²³Khandi yatsia nende Dani nende omusianiwe Hushimu.

²⁴Nafutali nende abasianibe: Yaseeli, Guni, Yeseri, nende Shilemu.

²⁵Bane nabataru bano nibo aba Yakobo yanyoola okhubir'ra mu Biliha, omukholi owa Labani yahelesia omukhaanawe Raheli.

²⁶Abandu bosi abolwibulo lwa Yakobo abayenjila n'nabo Emisiri bali amakhumi kasasaba nende basasaba, nibaralimwo abakhasi babaanabe.

²⁷Yosefu yebul'la Emisiri abaana babili ma abolwibulo lwa Yakobo abatsiayo niboola abandu amakhumi kane nakataru.

²⁸Yakobo yaruma Yuda okhwemela okhutsia okhubool'la Yosefu yeetse okhubakaan'na mu Kosheni. Olwaboola,

²⁹Yosefu yaniina mwikaarilie ma natsia Kosheni okhwakaan'na samwana. Olwa bakaana, Yosefu yakwaka samwana ma nalakaya khulwa oluhono olurambi.

³⁰Yakobo nabool'la Yosefu, “Ise nderechekhele okhufwa, sichila luno mal'le okhukhulolakhwo ma manyile osiliho mwoyo.”

³¹Ma Yosefu nabool'la abasiani babwe nende abandi bosi abolwibulo lwa samwana mbu, “Okhwola nzie okhubool'la omuruchi mbu abasiani befwe nende bosi abolwibulo lwa papa abamenyanga mu Kanaani, betsele khuise.

³²Nzia okhumubool'la mbu inywe muli abaayi ma mulindanga ebiayo, khandi muleer're emiruko chienywe nende ebindu bienywe biosi.

³³Olwomuruchi namulanje namureeba emilimo chienywe,

³⁴namumubool'le mbu obulamu bwenywe bwosi mwalinji abaayi singa abakuka benywe bakholanga. Nimuboola mbwo ne nalekha namumenye Kosheni.” Yosefu yaboola mbwo sichila Abaamisiri sibahendelangakhwo abaayi tawe.