Read lunyore OKHUCHIAKA 47 Bible Online

OKHUCHIAKA 47 - lunyore bible

OKHUCHIAKA 47

¹Yosefu yabukula abasiani babwe barano natsia n'nabo khumuruchi, Naboola, “Papa wanje nende abaana befwe betsele okhurula Kanaani, halala nende emiruko chiabwe nende tsing'ombe tsiabwe, nende biosi ebia bali n'nabio. Bali musibala sia Kosheni.”

²Ma namanyia omuruchi abaana babwe.

³Omuruchi nabareeba, “Emilimo chienywe echiamukholanga nechiliena?” Nabo nibakalusia, “Omwami, ifwe khuli abaayi singa abakuka befwe balinji abaayi.

⁴Khwitsile okhumenya musibala sino, sichila musibala sia Kanaani inzala neingali okhusila makata obunyaasi bwokhwaya emiruko chiefwe bubula. Noyanza khuhelesie obweyangu okhumenya musibala sia Kosheni.”

⁵Omuruchi nabool'la Yosefu, “Luno sichila mbu Papawo nende abasiani benywe betsele,

⁶esibala sie Misiri nesiabwe. Lekha bamenye musibala sia Kosheni, esili neliloba lilahi okhuyomba haundi hosi. Ne noba nomanyile balala mubo abali netsingufu obare okhulinda emiruko chianje.”

⁷Ma Yosefu naleera Yakobo samwana, namumanyia khumuruchi. Yakobo nasabila omuruchi ikhabi,

⁸ne omuruchi namureeba, “Oli nemihika chianga?”

⁹Yakobo nakalusia mbu, “Amatukhu kobulamu bwanje nemihika emia ndala nende amakhumi kataru ne ndachendanga y'yi neyiyi. Emihika yichio nemitututu khandi emitinyu, sichihela nende emihika eminji chiabakuka banje tawe, kata nikali nabo bachendananga yiyi neyiyi.”

¹⁰Yakobo nasabila omuruchi ikhabi yokhumuseebula ma narula.

¹¹Ma Yosefu namenyia samwana nende abaana babwe musibala sie Misiri, nabahelesia liloba eliali lilahi ahembi nende Ramase, singa obwomuruchi yali nalachile.

¹²Yosefu nahaana ebiakhulia khu samwana, abasiani babwe nende bosi abeinyumba yasamwana halala nende abaana abati.

¹³Inzala yali ingali okhusila ma ebiakhulia nibibula musibala siosi, ne abandu be Misiri nende Abakanaani nibahwa tsingufu khulweinzala.

¹⁴Olwa bakulanga obuswache ne Yosefu nabunjelesia amapesa kosi nahila munyumba yomuruchi.

¹⁵Olwa amapesa kosi musibala sie Misiri nende esia Kanaani kali nikahweye, Abaamisiri beetsa khu Yosefu nibaboola mbu, “Khuhelesie ebiakhulia. Orakhulekha butswa khufwe tawe. Amapesa kefwe kosi kahwa.”

¹⁶Yosefu nakalusia mbu, “Muleere emiruko chienywe nase muhelesie ebiakhulia, nimuba nimubula amapesa.”

¹⁷Ma nibaleera emiruko chiabwe khu Yosefu, naye nasilaania ebiakhulia nende etsisululi tsiabwe, namakondi, netsimbusi, netsing'ombe, nende etsipunda. Omuhika yikwo yabakabul'la ebiakhulia nende emiruko chiabwe chiosi.

¹⁸Omuhika okwalondakhwo beetsa khuye nibaboola mbu, “Omwami, sikhukhubisakhwo ling'ana liosi tawe. Amapesa kefwe kosi kahwa khandi emiruko chiefwe chiosi luno nechichio. Sikhuli nende esindu siosi esisikaaye tawe nichirali emibili chiefwe nende emikunda chiefwe.

¹⁹Orakhulekha khufwe tawe. Okhukule ifwe nende emikunda chiefwe khulwebiakhulia. Nakhube abasumba bomuruchi ma nabe niye mwene emikunda chiefwe. Okhuheelesie obuswache bwokhulia nende imwo eyokhuraaka mumikunda chiefwe.”

²⁰Yosefu nakul'la omuruchi liloba liosi elie Misiri. Abaamisiri bosi bakusia emikunda chiabwe sichila inzala yali inyinji, ma liloba liosi niliba omwandu kwomuruchi.

²¹Yosefu nakhola abandu bosi okhuba abasumba okhurula khutsindulo tsiosi etsie Misiri.

²²Liloba elirakulwa liali eliabesaalisi lionyene. Bo sibali okhukusia emikunda chiabwe tawe sichila omuruchi yabahuchil'la okhumenyamwo.

²³Yosefu nabool'la abandu mbu, “Lole, mal'le okhumukula inywe nende emikunda chienywe khulwomuruchi, imwo njieino muraache mumikunda chienywe.

²⁴Olwe lichesa liakhoole mwakhahaane buli sitonye silala khubirano khumuruchi. Ebitonye bindi bine khubirano mwakharumikhile singa imwo nende ebiakhulia bienywe nabaana benywe.”

²⁵Nabo nibamukalusia mbu, “Uhonisie obulamu bwefwe. Ukhukholeye obulahi omwami, ne nakhube abasumba bomuruchi.”

²⁶Ma Yosefu naraho lilako musibala sie Misiri mbu esitonye silala khubirano khumachese kosi nesiomuruchi. Lilako yilio lisiliho okhwola leelo. Emikunda chiabesaalisi chionyene nichio echirabukulwa okhuba echiomuruchi.

²⁷Abaisiraeli bamenyanga musibala sie Misiri musibala sia Kosheni, nibenyool'layo emiandu eminji, nibebulan'nayo ma nibenjiha okhusila.

²⁸Yakobo yamenya Emisiri emihika likhumi nende chine nachitaru, okhwola olwa yoola emihika emia ndala nende amakhumi kane nende chine nachitaru.

²⁹Olwe tsinyinga tsitsie tsiokhufwa tsioola, yalanga omwanawe Yosefu namubool'la mbu, “Ra omukhonokwo mumarango kanje ma undesuhile mbu siwakhanzabilekhwo Emisiri tawe.

³⁰Nyenyanga nanzabilwe ahabakuka banje bayabilwa, naunjinge okhurula Emisiri ma naunzabile habayabilwa.” Yosefu nakalusia, “Nakhole singa obwobooye.”

³¹Yakobo naboola, “Wesuuhe mbu nokhole mbwo.” Yosefu niyesuha, ma Yakobo nakhupa embwo nali khusitandasie.