Read lunyore OKHUCHIAKA 48 Bible Online

OKHUCHIAKA 48 - lunyore bible

OKHUCHIAKA 48

¹Olunyumakhwo Yosefu yabool'lwa mbu samwana nomulwaye okhusila. Ma nabukula abaanabe babili, Manase nende Efuraimu, natsia okhulola Yakobo.

²Olwa Yakobo yabool'lwa mbu omusianiwe Yosefu witsile okhumulola, yetinyilisia ma niyekhala khusitandasie.

³Yakobo nabool'la Yosefu, “Nyasaye Wokhunyala Biosi yandolekhela nindi Lusu musibala sia Kanaani, ma niyanamila ikhabi.

⁴Yambool'la mbu, ‘Ndakhakhuhe abaana ma olwibulo lulwo lwakhabe tsinzibulo tsinyinji, ndakhahaane liloba yili khutsinzibulo tsitsio libe eliabwe inziayo.’ ”

⁵Yakobo natsilil'la khuboola mbu, “Abaana baabo babili abawebul'la musibala sie Misiri ise nisili okhwitsa hano, nabaana banje, Efuraimu nende Manase nababe butswa abaana banje singa Rubeni nende Simioni.

⁶Nonyoola abaana bandi, sibakhaba abaana banje tawe, obulaame bwabakhanyoola bwakhabir're khu Efuraimu nende Manase.

⁷Kholanga yaka khulwa mamawo Raheli. Ndali nesibeela esikali olwa yafwila musibala sia Kanaani ahembi nende Efurate olwa ndali ningalukhanga okhurula Mesopotamia. Ndamuyabila khunjila ya Efurate.” (Efurate niyo elangungwa leelo Betselehemu).

⁸Olwa Yakobo yalola abaana ba Yosefu, yareeba mbu, “Yaba nibena?”

⁹Yosefu nakalusia mbu, “Yaba nabaana banje aba Nyasaye yambelesia nindi Emisiri yino.” Yakobo naboola mbu, “Baleere handi hano mbalamile ikhabi.”

¹⁰Tsimoni tsia Yakobo tsiali nitsielima khulwobusakhulu, ma siyali onyala okhulola bulahi tawe. Yosefu naleera abaana ahembi n'naye. Nabafumbeel'la ma nabatsunzuuna.

¹¹Yakobo nabool'la Yosefu, “Sindakanakananga ndikhulolakhwo khandi tawe, ne luno Nyasaye uhuchiliye nduutsi abaanabo.”

¹²Ma Yosefu nabahiinia khumakulu ka Yakobo ma namwinamila khulwo khuhana oluyali.

¹³Yosefu nara Efuraimu khumukhono mukhasi kwa Yakobo ne nara Manase khumukhono musaatsa.

¹⁴Nebutswa Yakobo yabisaania amakhonoke nara omukhonokwe omusaatsa khumurwe kwa Efuraimu, owali omuti, ne nara omukhonokwe omukhasi khumurwe kwa Manase, owali omukhulundu.

¹⁵Ma nalaamila Yosefu ikhabi naboola, “Nyasaye owabapapa banje Aburahamu nende Isaka barumikhilanga, ahelesie abaana yaba ikhabi. Nyasaye owaninda okhwola litukhu lino abalaamile ikhabi.

¹⁶Om'malaika owaninda okhurula khububi bwosi abalaamile ikhabi. Eliira lianje nende eliira liapapa Aburahamu nende elia Isaka katsiliil'le okhuhindihala okhubir'ra mubaana yaba. Ma Olwibulo lwinjihe.”

¹⁷Yosefu siyalola bulahi olwa samwana yara omukhonokwe omusaatsa khumurwe kwa Efuraimu tawe. Yamala nabukula omukhono kwasamwana na kuhiinia khumurwe kwa Efuraimu nakura khumurwe kwa Manase.

¹⁸Nabool'la samwana mbu, “Mbwo tawe papa. Uno niye omwana mukhulundu ore omukhonokwo omusaatsa khumurwekwe.”

¹⁹Ne samwana nasuula naboola mbu, “Manyile, mwana wanje, manyile. Olwibulo lwa Manase lwakhabe olukali nalwo. Nebutswa omwana wabwe omutu yakhabe omukali okhuyomba, Khandi olwibulolwe lwakhabe tsinzibulo tsingali.”

²⁰Ma nabalaamila ikhabi litukhu yilio naboola mbu, “Abaisiraeli balirumikhila amera kenywe Olwa balihaana ikhabi. Bakhaboole mbu, ‘Nyasaye akhukhole singa Efuraimu nende Manase!’ ” Kho Yakobo yemesia Efuraimu imbeli wa Manase.

²¹Ma Yakobo nabool'la Yosefu mbu, “Singa ololanga, ise ndi ahembi okhufwa, nebutswa Nyasaye nabe n'nawe ma yakhakhukalusie musibala siabakukabo.

²²Niwe owambetsanga esibala sia Shekemu, tawe abaana benywe. Esibala esilahi esiandanuula Abaamori nolukanga lwanje nende obuyingo bwanje.”