Read lunyore OKHUCHIAKA 49 Bible Online

OKHUCHIAKA 49 - lunyore bible

OKHUCHIAKA 49

¹Yakobo yalanga abasianibe ma naboola mbu, “Mwitse halala mwesi, m'mbool'le akaliekhola khu inyw mumatukhu keetsa:

²“Yitse ahembi muhulile, inywe abaana ba Yakobo. Hul'le aka papa wenywe Isiraeli.

³“Rubeni, niwe omwana wanje owokhuranga, khandi niwe tsingufu tsianje. Niwe omwana wokhuranga mulusaatsa lwanje, oli oweinjinia khandi owetsingufu okhuyomba abasiani banje bandi bosi.

⁴Ofwana singa emikhula chiamaatsi, nebutswa siwakhabekhwo omukhongo tawe, sichila wakona nende omukhasi wanje omubiikha. Wafwabia esitanda sia papawo.

⁵“Simioni nende Lawi nabomunda ndala. Barumikhilanga ebikhupan'no biabwe okhusaalisia abandu.

⁶Sindakheinjisiekhwo mubumonyani bwabwe obwamembiswi tawe, khandi kata sindakhabekho ahembi mubwakaani bwabwe tawe, sichila bali okhwira muburima, ne balemia tsing'ombe khulwokhwesangaasia mumusino.

⁷Esilaamo sibe khuburima bwabwe, sichila nobwesilache, khandi sibe khubululu bwabwe, sichila bubula tsimbabasi. Ndakhabasalaanie musibala sia Isiraeli; nimbakabula mubandu basio bosi.

⁸“Yuda, abasiani benywe bakhakhwitsoomie, wakhatiile abasukubo m'makosi kabwe nomukhonokwo. Abasiani benywe bakhakhwinamile.

⁹Yuda afwana singa esimba, eyiranga ma ekalukha hayamenya ma ekona hasi, ne abulaho onyala okhutsinyasia.

¹⁰Yuda yakhachinge indabusi yoburuchi, ne abolwibulolwe bakhamihenje khasotso. Abetsinzibulo bakhamuhulilenje nibamuha obusuru, ma nibamusikamila khulwokhumuha oluyali.

¹¹Abohanga esimoosi esiepundaye khumusabibu omulahi. Yosianga tsingubotsie mutsinzabibu, ne ebichendelwabie mumatsahi kemisabibu.

¹²Tsimonitsie tsiayakhanya khulwokhunywa ewaini, ne amenoke kaalaba okhusila khulwokhunywa amabeele.

¹³“Sabuloni yakhamenye khundulo khweinyanza. Oluchingalwe lwakhabekhwo etsimeeli tsinyinji. Esibalasie biakhoole khu lwakho lwa Sidoni.

¹⁴“Isakari sayombele epunda ekonanga hakari webikuuli tawe.

¹⁵Nebutswa alolanga mbu habundu hokhuhulukhila yaho nahalahi. Makhandi esibala nesikaasu. Ma yenamanga okhuchingila ebisirobie khumukongo, khandi atiiyanga singa omusumba.

¹⁶“Dani yakhabe omukhalachi wabandube. Bakhabe butswa singa tsinzibulo tsindi tsia Isiraeli.

¹⁷Dani yakhabe singa inzokha khundulo khweinjila, inzokha yesihilikoma khunjila. Eyokhuluma tsimbakayu tsiesululi, ma omwilusi wayo alakwe inyuma makalama.

¹⁸“OMWAMI nindil'langa umbonie.

¹⁹“Gadi yakhaseerwe nende abanuuli, nebutswa yakhasukhane alabataabie.

²⁰“Liloba lia Asheri liakhaame ebiakhulia ebinolu. Yakhahaane ebiakhulia ebitoro ebikwan'ne omuruchi.

²¹“Nafutali ali singa esitsusu esilakhuuywe esiibulanga abaana abalahi.

²²“Yosefu afwana omusaala okwaamanga, hamuchela, okwamasaka kakwo kalandanga khwisisi.

²³Abasukube bamuseeranga noburima nibamulondel'la okhumulasa tsisele.

²⁴Nebutswa obuyingobwe noburalilu, ne amakhonoke kakufuhasibwa nende obunyali bwa Nyasaye wa Yakobo nende obwo omwayi, Omulindi wa Isiraeli.

²⁵Nyasaye Wokhunyala Biosi niye okhukhonyanga tsikhabi, Nyasaye onyala biosi niye okhuhetsanga ikhabi, tsikhabi tsieifula okhurula khwikulu khandi etsiamaatsi okhurula hasi, tsikhabi tsiebiayo nende abaana.

²⁶Tsikhabi tsiobuswache nende obwamu, tsikhabi tsiebikulu biakhale, ebindu ebilahi okhurula mubikulu bieinziayo. Tsikhabi tsino tsiosi tsilaba khumurwe kwa Yosefu. Khulwotosi lwomurwe okwe uyo oweelwa mubaana babwe.

²⁷“Benjameni ali singa esibwe esilulu, mukamba nende mukolooba siiraanga nisirandula.”

²⁸Yabo nibo tsinzibulo likhumi natsibili etsia Isiraeli, ne kano niko aka samwana yababool'la nabalaamilanga ikhabi yokhusebula buli mwana.

²⁹Ma Yakobo nalaka abasianibe mbu, “Ise kho ndi ahembi okhufwa ma nzia okhuba halala nende abandu banje. Namunzabile halala nende abapapa banje, mulwangaywa oluli mumbinga m'mukunda kwa Efuroni Omuhiti,

³⁰mu Makapela ebukwe wa Mamure musibala sia Kanaani. Aburahamu yakula imbinga iyo nende omukunda yiku okhurula khu Efuroni lube olwebilindwa.

³¹Niho ahabayabila Aburahamu nende omukhasiwe Sara. Niho ahabayabila Isaka nende omukhasiwe Rebeka, khandi niho ahandayabila Lea.

³²Omukunda yikwo nende olwangaywa olulimwo biakulwa okhurula khu Bahiti. Namunzabileyo.”

³³Olwa Yakobo yali namal'le okhuhaana amalako khubaanabe, yakona hasi khandi, ma nafwa.