Read lunyore OKHUCHIAKA 6 Bible Online

OKHUCHIAKA 6 - lunyore bible

OKHUCHIAKA 6

¹Olwabandu bachiaka okhumeetekha khusibala ma nibebula abaana bakhaana,

²abasiani ba Nyasaye balola abakhaana yabo nibali abelikondo lilahi, kho bamala nibabukula mubo ababali nibaluutsi nibali abalahi okhuba abakhasi babwe.

³OMWAMI naboola mbu, “Sinambuchil'le khandi abandu okhumenya inziayo tawe. Okhurula lunondi sibakhamenye okhuyombia emihika emia ndala nende amakhumi kabili tawe.”

⁴Mumatukhu kene yako emindu emikhongo chialinji khusibala echiebulwa nende abaana ba Nyasaye olwa baleera abakhaana babandu. Emindu emikhongo yichio nichio echiamala nichiba singa abalulu bakhale, abasaatsa abali neifuma.

⁵Olwo MWAMI yalola obumayaanu bwabandu bosi singa bwali obukali musibala nende obwamakani kabwe kali amabi,

⁶yabeelela esiachila nabalomba ma nabara khusibala. Yabeelela okhusila khwene ma naboola mbu,

⁷“Naamulule abandu yaba bosi kata nende etsisolo tsiosi nende amanyonyi kosi, sichila mbeeleye khulwa okhubilomba biosi.”

⁸Nebutswa OMWAMI yayanzisibwa nende Noa.

⁹Tsino nitsio tsinzibulo tsia Noa. Yali omulunji, khandi naba owahabwene mukhukhula khukhwe. Yalinji mubulala nende Nyasaye.

¹⁰Noa yebula abasiani bataru, Shemu, Hamu nende Yafetsi.

¹¹Omundu wosi musibala yali omubi imbeli wa Nyasaye, ma esibala siali nisietsulamwo obusoolo.

¹²Nyasaye nalola singa obwesibala siali nisiononekha sichila abandu bali nibamenyele obulamu obusiamu.

¹³Nyasaye nabool'la Noa mbu, “Mal'le okhukhalaka mbu naamulule abandu bosi sichila esibala sitsuuyemwo obusoolo.

¹⁴Welombele esafina khumusaala omulahi, oremwo ebikoti ma ohome mukari nende esioba norumikhilanga elaamu.

¹⁵Oburambi bwayo bube etsimiita emia ndala nende amakhumi kataru nachitaru, obuchiikha bwayo bube etsimiita amakhumi kabili natsibili, ne oburambi bwehekulu bube etsimiita likhumi natsitaru.

¹⁶Olombe esilama ne olekhe obweyangu bwetsisentimita amakhumi kane nende tsine hakari wesilama nende lisisi. Omuliango kwesafina okure mumbafu ma oremwo etsikorofa[4] tsitaru.

¹⁷Nandeere ikhumaatsi khusibala khulwo okhumulula bulisindu siosi esiobulamu. Ebindu biosi khusibala nabifwe.

¹⁸Nebutswa nanombe indakano n'nawe. Nawinjile musafina nende omukhasiwo nabaanabo ma nende abakhasi ababaana baabo.

¹⁹Khandi nawinjisie musafina ebindu esia b'bili es'saatsa nende esikhasi khubindu biosi ebiobulamu ebili musibala khulwokhubilinda bibe mwoyo.

²⁰Nobukule khutsimbila tsiosi etsiamanyonyi nende etsisolo ma nende biosi ebimoolanga hasi.

²¹Khandi obukulekhwo tsimbila lukano etsiebiakhulia, ebibio nende ebietsisolo yitsio tsiosi.”

²²Noa yakhola kosi aka Nyasaye yamulaka akhole.