Read lunyore OKHUCHIAKA 7 Bible Online

OKHUCHIAKA 7 - lunyore bible

OKHUCHIAKA 7

¹OMWAMI yabool'la Noa mbu, “Tsia winjile musafina halala nende abeinyumba yiyo bosi. Niwe owanduutsi noli omulunji musibala siosi.

²Khubuli imbila yetsisolo tsisiyikhu obukulekhwo tsine natsitaru tsisaatsa ne tsine natsitaru tsikhasi, ne khutsisolo etsirali tsisiyikhu obukulenjekhwo tsibili, isaatsa nende ikhasi.

³Khandi khubuli imbila yamanyonyi obukulekhwo kane nakataru amasaatsa, khandi kane nakataru amakhasi. Okhole akene yaka kho mbu buli imbila yesolo nohomba yamanyonyi etsilil'le okhuba khusibala nende okhwibulana.

⁴Olwa matukhu kane nakataru nakabe nikahweye, nangwisie ifula khusibala khulwa amatukhu amakhumi kane, om'basu nende obutukhu, khulwa okhumulula ebindu biosi ebiandalomba musibala.”

⁵Noa yakhola kosi aka Nyasaye yamulaka.

⁶Noa yali nemihika etsimia tsisasaba olwemikhula chietsa khusibala.

⁷Ye nende omukhasiwe nende abaanabe nabakhasi babaana baabe benjila musafina khulwokhwehonia okhurula khumikhula chiamaatsi yitsio.

⁸Ne buli es'saatsa nesikhasi khutsisolo tsiosi tsisiyikhu nende etsirali tsisiyikhu, nende amanyonyi, nende biosi ebimoolanga hasi,

⁹bienjila halala nende Noa, singa Nyasaye yali nalachile.

¹⁰Inyuma wamatukhu kane nakataru, emikhula chiamaatsi chiamala nichiba khusibala.

¹¹Olwa Noa yali nali nemihika etsimia tsisasaba, omwesi wakhabili nikuli likhumi nende khane nakhataru, tsimoni tsiamaatsi tsiosi etsiomulutungu tsiafutukha ne ebilibwa biemikhula tsiomwikulu nibiikulwa.

¹²Ifula yakwa khusibala khulwa amatukhu amakhumi kane, om'basu nende obutukhu.

¹³Khwitukhu liene yilio, Noa niyenjila musafina nende omukhasiwe ma nende abaanabe bataru Shemu, Hamu nende Yafetsi nabakhasi babwe.

¹⁴Benjila nende tsimbila tsiosi etsietsisolo tsiom'bulimo nende etsiarukwa, tsingali nende tsindititi, nende tsimbila tsiosi etsiamanyonyi ma nende etsiebindu ebimoolanga hasi biosi.

¹⁵Biosi b'bili, es'saatsa nende esikhasi bienjila musafina halala nende Noa,

¹⁶singa obwa Nyasaye yali nalachile. Ma OMWAMI niyekala omuliango.

¹⁷Emikhula nichitsilil'la khusibala khulwa amatukhu amakhumi kane, ma amaatsi nikameetekha nikachinga esafina ikulu, nayo neba ikulu weliloba.

¹⁸Amaatsi kameetekha okhusila ne esafina nayo niyelemakhwo ikulu.

¹⁹Amaatsi kasilaana tsingufu okhusila ma kata nikafuunikha ebikulu ebiali ebirambi biosi.

²⁰Katsilil'la okhumeetekha okhwola olwakayombela ebikulu etsimiita tsine natsitaru.

²¹Ebindu biosi ebiali nobulamu khusibala biafwa, amanyonyi kosi, etsisolo tsiosi nende abandu bosi.

²²Ebindu biosi khusibala ebialimwo emiiya chiokhuheelana biafwa.

²³OMWAMI yamulula ebindu biosi ebiali nibili mwoyo khusibala. Yamulula abandu, etsisolo, amanyonyi nende ebikooko. Noa niye owasikala yenyene nende abayali n'nabo musafina.

²⁴Amaatsi kamala khusibala amatukhu emia ndala nende amakhumi karano nikasili okhutitiha.