Read lunyore OKHUCHIAKA 8 Bible Online

OKHUCHIAKA 8 - lunyore bible

OKHUCHIAKA 8

¹Nyasaye yetsul'la Noa nende biosi ebiayali n'nabio musafina, naleera omuyeka okhuhungutsa musibala, ne amaatsi nikachiaka okhutitiha.

²Tsimoni tsiolutungu nende ebilibwa biomwikulu nibiikalwa ma ifula nelekha okhukwa,

³ne amaatsi nikachiaka okhutitiha. Inyuma wamatukhu emia ndala nende amakhumi karano amaatsi nikaba katitihile khusibala.

⁴Litukhu liakhane nakhataru mumwesi kwakhane nakhataru esafina yerenjekha khubikulu bia Ararati.

⁵Amaatsi nako katsilil'la okhutitiha ne litukhu liokhuranga mumwesi kwelikhumi obutenje bwebikulu nibulolekha.

⁶Inyuma wamatukhu amakhumi kane Noa yekula litilisa liesafina

⁷nabichis'siamwo likhookho naliruma. Siliamala likalukhe tawe nebutswa liapulukhil'la y'yi nende y'yi okhwola olwa maatsi kakhama.

⁸Noa yamala naruma likhuulwi okhulola nikali amaatsi katitiha khusibala.

⁹Ne khulwokhuba amaatsi kali nikasili okhukhama khusibala likhuulwi silianyoola halinyala okhuyeela tawe. Liamala nilikalukha khusafina ma Noa nanyiila omukhono nalibukula nalinjisia musafina.

¹⁰Yalindakhwo amatukhu kandi kane nakataru ma naruma likhuulwi khandi.

¹¹Liamala nilikalukha khuye khubwiile nilichinjile lisafu libisi eliomusaala khumunwa kwalio. Ma Noa namanya mbu amaatsi kakhamile khusibala.

¹²Yalinda amatukhu kandi kane nakataru ma naruma likhuulwi khandi. Olwene yilwo siliakalukha khandi tawe.

¹³Olwa Noa yali nemihika etsimia tsisasaba nende mulala, litukhu liokhuranga khumwesi kwokhuranga amaatsi kali nikakhamile khusibala. Noa nafunula esilama siesafina, nahenga tsimbeka tsiosi ne nalola liloba niliomele.

¹⁴Omwesi kwakhabili nikuli amakhumi kabili nende khane nakhataru esibala siali nisiomele.

¹⁵Nyasaye nabool'la Noa mbu,

¹⁶“Orule musafina nende omukhasiwo halala nabaana baabo nende abakhasi babwe.

¹⁷Obukule amanyonyi kosi, nende tsisolo ma nende ebikooko biosi khe bibe ebinyala okhwibulana, binjihe khusibala.”

¹⁸Kho Noa narula musafina nende omukhasiwe, nabaanabe ma nende abakhasi babwe.

¹⁹Etsisolo tsiosi nende amanyonyi nende ebikooko biarula musafina mutsimbila tsiabio.

²⁰Noa niyombokhela OMWAMI olusambwa, nabukula ndala khubuli esolo isiyikhu nende elala khubuli linyonyi lisiiyikhu nabisamba singa omusango khulusambwa.

²¹Omwayo kwomusango kwayanzisia OMWAMI ma naboola m'mwoyokwe mbu, “Sindakhalaamekhwo esibala khandi khulwomundu tawe, manyile mbu tsinganakani tsitsie netsimbibiibi okhurula khubwana bubwe. Kata khandi sindakhamululekhwo ebindu biosi ebili mwoyo singa ndakhol'le tawe.

²²Oluhono lwesibala sisiliho, liraaka nende lichesa nabibetsenjeho. Khandi obusindu nende oluya biakhabeho halala nende erootso nende esubwe, ma nende om'basu nobutukhu.”