Read lunyore OKHUCHIAKA 9 Bible Online

OKHUCHIAKA 9 - lunyore bible

OKHUCHIAKA 9

¹Nyasaye yalaamila Noa nende abaanabe ikhabi ma nababool'la mbu, “Mwibulane mwinjihe ma mwitsusie esibala.

²Etsisolo tsiosi, amanyonyi, ebikooko nende tsisutse nabimuriitsenje. Biosi bireywe hasi wobunyali bwenywe.

³Luno binyala okhuba ebiakhulia bienywe, kata khandi munyala okhulia emimela. Mbihaan'ne biosi khu inywe khulwa ebiakhulia.

⁴Esindu sil'la esiamurakhaliakhwo tawe neinyama esilimwo amatsahi.

⁵Omundu wosi niyakheera owasie yakhanyoola esinyasio. Ndakhahaane esinyasio siokhufwa khusolo yosi eyakheere omundu.

⁶Omundu yalombwa mukhufwana khwa Nyasaye, khe wosi owakheera omundu wasie naye yakheerwe nende omundu wasie.

⁷Nenywe mwibulane, mwinjihe mwitsusie esibala.”

⁸Nyasaye yabool'la Noa nende abaanabe mbu,

⁹“Luno ise nombanga indakano n'nenywe nende tsinzibulo tsiosi inyuma wenywe,

¹⁰nende ebindu bienywe biosi ebili mwoyo singa amanyonyi kosi nende etsisolo tsiosi, biosi ebiamwarula n'nabio musafina.

¹¹Nombanga indakano n'nenywe mbu ebindu biosi ebili mwoyo sibiakhamululwe nende emikhula khandi tawe, emikhula sichiakhononiekhwo esibala khandi tawe.

¹²Singa esimanyilo hakari weindakano yanje n'nenywe, ma nende ebindu biosi ebili mwoyo,

¹³retsanga esitsahi mumalumbesi. Nisio esianasibe esimanyilo esieindakano hakari wanje nende esibala.

¹⁴Lwosi olwa naretsenje amalumbesi khwikulu ma esitsahi silolekhe,

¹⁵nanzitsul'lenje indakano yanje n'nenywe nende etsisolo tsiosi mbu emikhula sitsiakhamululekhwo ebindu biosi ebili mwoyo khandi tawe.

¹⁶Olwesitsahi nasilolekhenje mumalumbesi, nasilolenje ma nzitsusia indakano yeinziayo hakari wanje nende ebindu biosi ebili mwoyo khusibala.

¹⁷Yisio nisio esimanyilo sieindakano eyanombanga nende ebindu bili mwoyo biosi.”

¹⁸Abaana ba Noa barula musafina bali Shemu, Hamu, nende Yafetsi. (Hamu niye owali samwana Kanaani).

¹⁹Abaana ba Noa bataru bano nibo abakukanyene abandu bosi abali musibala.

²⁰Noa naye naba omulimi wokhuranga ma naraaka emisabibu m'mukunda kukwe.

²¹Olwa yanywakhwo ewaini, yamala nakholwa, ma nahiinia tsingubo, nakona mwiheemalie nali esihechenye.

²²Olwa Hamu, samwana Kanaani, yalola esihechenye sia samwana yarula esioba nabool'la abasiani babwe babili.

²³Shemu nende Yafetsi babukula ingubo nibara khumabeka kabwe emukongo, nibatsiila omukongo okhwola mwiheema, ma nibafuunikha esihechenye sia samwana, nibaramulolakhwo esichenye tawe.

²⁴Olwewaini yahwa m'moni mwa Noa ma namanya akomwana omutu yali namukholeye,

²⁵yaboola mbu, “Esilaamo sibe khu Kanaani! Yakhabe omusumba wabaana babwe.

²⁶OMWAMI yetsoomibwe, Nyasaye wa Shemu! Kanaani yakhabe omusumba wa Shemu.

²⁷Nyasaye abambuusie Yafetsi, amenye mumaheema ka Shemu, Kanaani yakhabe omusumba wa Yafetsi.”

²⁸Inyuma wemikhula chiamaatsi Noa yamala emihika etsimia tsitaru namakhumi karano.

²⁹Yafwa nali nende emihika etsimia tsirano natsine nende amakhumi karano.