Read lunyore 2 SAMWELI 1 Bible Online

2 SAMWELI 1 - lunyore bible

2 SAMWELI 1

¹Saulo namal'le okhufwa, Daudi yakalukha okhurula mwihe eliayali namal'le okhuleka Abaamaleki, ma nakona Sikilaki amatukhu kabili.

²Khwitukhu liakhataru, omusiani omubuukha yeetsa okhurula mukambi ya Saulo. Khulwokhumanyia mbu yali nesibeela, yali naranduye tsingubo tsitsie ma khandi niyebakhile obutoyi khumurwe kukwe. Yamala natsia aha Daudi yali ma namwinamila khulwokhuhaana oluyali.

³Daudi namureeba mbu, “Orula hena?” Naye nakalusia mbu, “Ndali okhwebisa okhurula mukambi ya Isiraeli.”

⁴Daudi namureeba khandi mbu, “Mbool'la esiali okhwekholekha.” Ne omubuukha uyo namukalusia naboola mbu, “Abasikari befwe baali okhwilukha okhurula mubulwani, ma abandu befwe abenji nibeerwa. Saulo nende omusiani uwe Yonatsani bali okhwirwa.”

⁵Daudi namureeba mbu, “Omanyile mbwena mbu Saulo nende omusianiwe Yonatsani bafwiye?”

⁶Ne omubuukha uyo nakalusia mbu, “Yaka kekholekhele nindi khusikulu sia Kiliboa, ne ndaali okhulola Saulo niyelet'te khwifumo lilie ne amakaari kabasuku halala nabelusi betsisululi bali nibamufumbiye.

⁷Ma Saulo nasukhana ne niyandola ma niyananga. Nase ningalusia mbu, ‘Ndi hano omwami!’

⁸Amal'le niyareeba mbu ise nise wina, nase nimboola mbu, ‘Ise ndi Omuamaleki.’

⁹Ma Saulo naboola mbu, ‘Yitsa hano unzire! Ise mal'le okhufumirwa obubi okhusila, ne ndi ahembi okhufwa.’

¹⁰Ma mal'le ninzia aha yali ma nimwira sichila ndaali okhumanya mbu yetsa okhufwa olwa akwakhwo hasi. Ma nimbukula olusimbi okhurula khumurwe kukwe halala nende omukasa okwali khumukhono kukwe, ma khulereye omwami.”

¹¹Daudi narandula tsingubo tsitsie khulwo khumanyia esibeela khandi abandu baabe bosi nibakhola mbwo.

¹²Bali okhwekhuula nende okhulakaya ma nibahonga okhulia litukhu yilio liosi okhwola mukolooba khulwo khufwa khwa Saulo nende omusianiwe Yonatsani halala nende Isiraeli, abandu bo MWAMI, sichila abenji bali nibeereywe mwihe.

¹³Daudi nareeba omubuukha omusiani uyo owali namuleereye amang'ana mbu, “Ibe orulanga hena?” Naye nakalusia mbu, “Ise ndi Omuamaleki nebutswa ndamenya musibala sienywe.”

¹⁴Daudi namureeba khandi mbu, “Kali mbwena mbu ibe siwalikhwo noburi okhwira omuruchi wo MWAMI yeela tawe?”

¹⁵Ma Daudi nalanga mulala khubasikari baabe, namubool'la mbu, “Yira omundu uyu!” Omusikari nafumira Omuamaleki uyo ma namwira,

¹⁶ne Daudi nabool'la Omuamaleki mbu, “Ibe omwene weleereye yaka. Wali okhwekhalachila okhufwa olwa ohuchiliye omwene mbu wali okhwira uyo owo MWAMI yeela okhuba omuruchi.”

¹⁷Daudi yemba olwembo lwokhwekhuula Saulo halala nomusianiwe Yonatsani,

¹⁸ma nalaka mbu olwembo lwolwekhuulu yilwo lwechesibwe abandu ba Yuda (Olwembo lwolwekhuulu yilwo lwahandikwa Musitapu sia Yasari)[1]

¹⁹“Abemeli befwe bereywe khusikulu sia Isiraeli! Abasikari befwe abalulu bakwiye hasi!

²⁰Murakaboolakhwo mu Gatsi tawe, kata khumihanda chia Ashikeloni tawe. Murayanzisia abakhasi ba Filisiti tawe; murahuchil'la abakhasi abanasibala okhusangala tawe.

²¹“Ifula nohomba lime birakhakwakhwo khubikulu bia Kiliboa tawe; emikunda chiasio tsibetsenge sila ebiamo biosi khasotso! Ebikhumba biabandu abalulu bialekhwaho okhusimbia abandu emirwe, esikhumba sia Saulo sisiabakhwakhwo namafura khandi tawe.

²²Obuyingo bwa Yonatsani sibwachelebanga okhwira tawe, olukanga lwa Saulo silwabelel'langakhwo omundu wosi tawe, lwafumiranga abetsingufu, nilwira abasuku.

²³“Saulo nende Yonatsani bali abokhuchenyia khandi abayanzana okhusila; balinji halala nibali mwoyo, khandi belukhanga bwangu okhuyomba tsinditsu, khandi bali netsingufu okhuyomba etsisimba.

²⁴“E Abakhasi ba Isiraeli bamulakaya Saulo! Yali okhumubiikha tsingubo tsiobukusi tsinzakhanyu khandi namufwala ebimili bietsahabu.

²⁵“Abasikari abalulu bamal'le okhukwa hasi, bereywe mubulwani. Yonatsani akonanga hasi mubikulu nafwiye.

²⁶“Mbeleye khulwe ibe, ahefwe Yonatsani; wali owobukusi obukali khu ise! Obuyanzi bubwo khu ise bwali obwokhuchenyia, bwali okhuyomba obuyanzi bwabakhasi.

²⁷“Abasikari abalulu bamal'le okhukwa hasi, ebilasan'nwe biabwe bilekhelwe ma bibula obukhala.”