Read lunyore 2 SAMWELI 10 Bible Online

2 SAMWELI 10 - lunyore bible

2 SAMWELI 10

¹Inyuma we yaka Nahashi omuruchi wa Amoni yafwa, ma omusianiwe olangwanga Hanuni yamala abe omuruchi.

²Ma Daudi naboola mbu, “Okhwola khol'le Hanuni obulahi singa obwa samwana yali okhuukhol'la ise.” Kho Daudi yaruma abarume khu Hanuni okhumulemia omwoyo khulwo okhufwa khwa Samwana. Olwa abarume boola Amoni,

³abemeli besibala sia Amoni babool'la omuruchi mbu, “Opaalanga mbu Daudi akhurumiye abandu bokhukhulemia omwoyo khulwokhuhaana oluyali khu papawo noho? Sikali mbwo tawe! Daudi abarumile hano okhurunilisia akelitookho nokhulilambuula masilisi kho babe abanyala okhukhuleka!”

⁴Kho Hanuni yafumila abarume ba Daudi, nababeka tsindefu tsiabwe olubeka l'lala, nakhalaka tsingubo tsiabwe mus'sienje ma nabakhunga.

⁵Abarume yabo bali nes'simba murwe esikali ma nibaria okhukalukha ingo. Olwa Daudi yahul'la akali nikekholekhele khubo, yabarumila ling'ana mbu bamenye Yeriko ne barachelela tawe okhwola olwe etsindefu tsiabwe tsiakhabe nitsikhul'le.

⁶Abandu ba Amoni bamanya mbu bamal'le okhuhamba Daudi obusuku, kho barumania ma nibahandika abasikari ba Basiria okhurula Betserehobu nende Soba abahela etsielefu amakhumi kabili, ne abandi etsielefu likhumi natsibili okhurula Tobu, khandi nende omuruchi wa Maaka nabasikaribe ehelefu ndala.

⁷Ne olwa Daudi yakahul'la, yaruma Yoabu halala nabasikari bosi abalulu okhutsia mwihe okhubaseera.

⁸Abaamoni barula esioba ma nibasinjila mubukono bwabwe bwokhulwana habwinjil'lo abuhenjele Rabba, elili litookho liabwe likhongo, ne abandi nabo, abarula Siria nende abasikari ba Tobu nende Maaka, basinjila musikuuri esikhaya.

⁹Yoabu yalola mbu abasikari babasuku betsukhila nibamuseera okhurula imbeli nende inyuma, kho yamala niyeela abasikari abalulu okhurula mu Baisiraeli ma nabara habundu aha bahengana nende Abasiria.

¹⁰Abasikari bandi bosi abasikala yabara khusinjil'lwa nende Abisai, omusiani wabwe. Abisai yali okhubara mubukono okhuhengana nende Abaamoni.

¹¹Yoabu yamala namubool'la mbu, “Nolola Abasiria nibandekel'langa, witse okhukhonya, ne Abaamoni nibaba nibakhulekel'langa ibe, nanzitse okhukhukhonya.

¹²Okufuhale khandi obe neikholo! Chenda khulwane butinyu khulwabandu befwe nende amatookho ka Nyasaye wefwe. Ne obulalilo bwo MWAMI bwekhole!”

¹³Yoabu halala nabasikari baabe besunda hambeli okhuseera Abasiria nebutswa Abasiria belukha okhurula khubo.

¹⁴Ne olwa Abaamoni balola Abasiria nibelukhanga, nabo khandi belukha okhurula khu Abisai ma nibenjila mwitookho. Ma Yoabu nachelela Yerusalemu olwa yali namal'le okhuseera Abaamoni.

¹⁵Abasiria bamanya mbu bamal'le okhulekwa nende Abaisiraeli kho bebunjikha halala.

¹⁶Omuruchi Hadadesa yarumania mbu Abasiria abali nibali injelekha womuchela kwa Efurate balangwe. Kho betsa Helamu hasi wobwemeli bwa Shobaki owali etswoni yabasikari ba Hadadesa omuruchi wa Soba.

¹⁷Olwa Daudi yakahul'la, yabunjikha emikanda chiabasikari ba Isiraeli bosi halala, nibambukha omuchela kwa Yorodani, ma nibatsia Helamu khubilenje, aha Abasiria basinjila okhuhengana n'naye. Obulwani bwachiaka,

¹⁸ne Abaisiraeli nibakhunga abasikari ba Basiria nibabakalusia inyuma. Daudi halala nabasikari baabe beera Abasiria abahela etsimia tsine natsitaru abali nibelusianga amakaari kobulwani halala nabasikari abokhutsisululi etsielefu amakhumi kane. Khandi beera Shobaki, etswoni yabasikari ba Siria, owamala nafwila mwihe.

¹⁹Olwa abaruchi abali nibarumikhanga hasi wa Hadadesa balola mbu balekelwe na Baisiraeli, balomba omulembe n'nabo ma nibarumikha hasi wa Baisiraeli. Ne Abasiria baria okhukhonyel'la Abaamoni khandi.