Read lunyore 2 SAMWELI 11 Bible Online

2 SAMWELI 11 - lunyore bible

2 SAMWELI 11

¹Mukhuchiaka khwomuhika olwa abaruchi bang'aya okhutsia mwihe, Daudi yaruma Yoabu halala nabasikari baabe nende abasikari bandi bosi ba Isiraeli okhutsia okhulwana; baleka Abaamoni khandi nibafumbila litookho lia Rabba. Daudi siyatsia n'nabo tawe, nebutswa yasikala Yerusalemu.

²Litukhu elala khubwile, Daudi yabuukha okhurula mundoolo ma naniina khusilama sieinyumbaye yoburuchi. Ne olwa yali nachendanga ikulu khusilama, yalola omukhasi niyesinganga om'bili. Yali omukhasi welikondo lilahi okhusila.

³Kho Daudi yamala naba omurumikhili uwe okhumanyilisia nimukhasi wawina uyo, ne nabool'lwa mbu ni Berisheba omukhaana wa Eliamu, omukhasi wa Uria Omuhiti.

⁴Daudi yaruma abarumikhili baabe okhumwenda. Olwa yetsa, Daudi yamala naba n'naye; (Berisheba yali namal'le amatukhu kaake kokhwesiya namal'le okhuhenga ebukwe.) Ma Berisheba nakalukha ingo uwe.

⁵Olunyuma yamanya mbu umal'le okhunyoola inda ne narumania amang'ana okhumanyia Daudi mbu ali neinda.

⁶Daudi yamala narumania Amang'ana khu Yoabu mbu “Bool'la Uria Omuhiti yetse khu ise hano.” Kho Yoabu yaruma Uria okhutsia khu Daudi.

⁷Olwa Uria yetsa Daudi yamureeba nikali Yoabu nende abasikari bali nibatsilil'langa bulahi neliihe, khandi singa obulwani bwali nibutsilil'langa.

⁸Ma Daudi nabool'la Uria mbu, “Tsia ingo ma ohuluukhekhwo hatu.” Uria yarulaho, ne Daudi naruma esihanwa ingo uwe.

⁹Nebutswa Uria siyatsia ingo tawe, yamala akone hasilibwa siomuruchi halala nende abalindi bomuruchi.

¹⁰Olwa Daudi yahul'la mbu Uria siyaali okhutsia ingo tawe, yamala namureeba mbu, “Noluhono olurambi okhurula norula hano; busina oratsiyekhwo ingo olwo ocheleye?”

¹¹Uria nakalusia naboola mbu, “Abasaatsa ba Isiraeli nende Yuda bali ehale balwananga lihe, ne Lisanduku lie Indakano lili halala n'nabo; etswoni yanje Yoabu nende abemeli baabe bakhupile ekambi esioba musikuuri. Ise ndakhatsiye mbwena ingo, okhulia nende okhunywa ma khandi ngone nomukhasi wanje? Siahene oluhono lwosili mwoyo, ise sindakhakholakhwo esindu sifwana mbwo tawe!”

¹²Ma Daudi namubool'la mbu, “Kho ibe obe hano litukhu lisikaye liosi ne mukamba nokalukhe mwihe.” Kho Uria yali Yerusalemu litukhu yilio nende elialondakhwo.

¹³Daudi yamulanga okhwitsa okhulia esiakhulia siamukolooba ma namuhelesia amalwa okhunywa. Nebutswa kata obutukhu yibwo Uria siyatsia ingo tawe, nebutswa yeyalisia khwipalangeti lilie musikoti siomulindi weinyumba yomuruchi.

¹⁴Mukamba tsuli kwelitukhu lialondakhwo Daudi yahandika ebarwa khu Yoabu eya yahelesia Uria okhumuhil'la.

¹⁵Yahandika naboola mbu, “Ore Uria imbeli, ahobulwani buli obululu, ma m'mulekhe yenyene kho abe onyala okhufumirwa ma afwe.”

¹⁶Olwa Yoabu yali nafumbiye litookho, yaruma Uria habundu hamanyile mbu abasuku bali netsingufu.

¹⁷Abasikari babasuku barula esioba welitookho ne nibalwana abasikari ba Yoabu; balala khubemeli babasikari ba Daudi beerwa ne Uria yali mulala khubo.

¹⁸Ma Yoabu naruma amang'ana khu Daudi namubool'langa khukobulwani,

¹⁹ne nabool'la omurumwa uyo mbu, “Nomal'le okhubool'la omuruchi akobulwani,

²⁰omuruchi anyala okhuba nelirima ma akhureebe mbu, ‘Busina nimutsia ahembi nelitookho okhubalwana? Simwali okhumanyilisia mbu betsa okhulasa tsisele nibali khumasisi tawe?

²¹Simwitsul'langa singa Abimeleki omusiani wa Gideoni yerwa tawe? Yer'rwa Tsebesi, ahomukhasi yaniina khwisisi lioluhinga ma namulasa nende iso yokhuluchina lwokhusa ma nemwira. Kho busina inywe nimutsia ahembi khwisisi lioluhinga?’ Omuruchi niyakhakhureeba yili omubool'le mbu, ‘Uria, omusikariwo nimulala khuyabo abaali okhwirwa.’ ”

²²Kho omurumwa yatsia khu Daudi ma namubool'la aka Yoabu yali namulachile okhuboola.

²³Omurumwa yaboola mbu, “Abasuku befwe bali netsingufu okhuyomba etsiefwe ma nibarula mwitookho nibetsa okhulwana n'nefwe musikuuri, nebutswa khubakhunjile nibakalukha musilibwa sielitookho.

²⁴Ne bamal'le nibakhulasa tsisele nibanin'ne khwisisi lioluhinga, ma balala khubasikari baabo nibeerwa, ne Uria nimulala khubo.”

²⁵Daudi nabool'la omurumwa mbu, “Otinyilisie Yoabu ma omubool'le arafwa omwoyo tawe, sichila siomanyanga niwina owakheerwa olwabandu balwananga tawe. Omubool'le ameete tsingufu okhuseera litookho ma alifumile.”

²⁶Olwa Berisheba yahul'la mbu omusaatsa uwe wairwa, yali okhumwekhuula.

²⁷Olwa amatukhu kokhwekhuula kali nikaweye Daudi yarumania amang'ana mbu Berisheba yetse hango homuruchi. Yamala namubukula singa omukhasiwe ma Berisheba namwibul'la omwana omusiani. Nebutswa OMWAMI siyanzisibwa nende amang'ana ka Daudi yali okhukhola tawe.