Read lunyore 2 SAMWELI 12 Bible Online

2 SAMWELI 12 - lunyore bible

2 SAMWELI 12

¹OMWAMI yaruma omuroobi Natsani khu Daudi. Kho Natsani yatsia khuye ma namubool'la mbu, “Baliho abandu babili abamenyanga mwitookho elala; mulala yali omuhinda ne oundi yali omumanani.

²Omuhinda yali netsing'ombe tsinyinji khandi namakondi amenji.

³Nebutswa omumanani yali butswa nesimeme sielikondi esia yali nakul'le. Yasilela ma nisikhula mungomwe halala nabaana baabe. Yasilisinjia khubiokhulia bibie omwene, nasinywesia amaatsi musikombesie omwene, khandi yasiikhasianga mumakuluke. Kho esimeme yisio sialinji singa omwanawe omukhaana.

⁴Litukhu elala omucheni yeetsa okhukonya omuhinda ingowe. Omundu omuhinda uyo siyayenya okhwir'ra omucheniwe mulala khumirukochie tawe; musilenje yisio, yabukula esimeme siomumanani ma namwir'ra omucheniwe.”

⁵Daudi yahambila omuhinda uyo oburima obukali ma naboola mbu, “Khu Nyasaye mulala oli mwoyo, omundu owakhola ling'ana yili akwananga yeerwe!

⁶Ne khulwo okhukhola ling'ana yili sila tsimbabasi, omundu uyo okhwola arunge ebimeme bine khusimeme silala esia yabukula.”

⁷Natsani nabool'la Daudi mbu, “Niwe omundu tsana. Ne kano niko ako MWAMI Nyasaye wa Isiraeli aboolanga khuibe, mbu: ‘Ndakhwemekha okhuba omuruchi wa Isiraeli ma nikhuhabina okhurula khu Saulo.

⁸Ndakhuhelesia obwamibwe nende abakhasibe, ndakhwemekha okhwamiha Isiraeli yosi halala nende Yuda. Yaka kalaba nikarakhakhuhel'le, khane ndakhakhuheye akahelambwo esiakhabili.

⁹Nisina esichil'le nochaaya ling'ana lianje, ma nokhola akali amabi imbeli wanje? Wabeye okhuhaana Uria yer'rwe mwihe; wahaan'ne omunwa mbu Abaamoni bamwire ma nobukula omukhasiwe!

¹⁰Ne luno abalala khubomulwibulo lulwo nabafwilenje mubulwani sichila wali okhuukhol'la esikala marwi khandi wali okhubukula omukhasi wa Uria.

¹¹Siahene khubool'langa mbu nambuusie mulala khubeinyumbayo yene okhuleera obubi khuibe; khandi nambukule abakhasibo noreyekhwo imoni ma nambahaane khumurendewo; naye naheye n'nabo m'mubasu hakari.

¹²Okhuba ibe wakhol'le tsimbi mumambiswi, nebutswa ise nakhole ling'ana yili imbeli wa Baisiraeli bosi m'mubasu hakari.’ ”

¹³Ma Daudi nabool'la Natsani mbu, “Mal'le okhukhol'la OMWAMI tsimbi.” Natsani namukalusia naboola, mbu, “OMWAMI ukhulekheye; sinofwe tawe.

¹⁴Nebutswa khulwa mbu wali okhuleera es'simba murwe khu MWAMI olwokhol'le ling'ana yili, omwana uwo nafwe.”

¹⁵Ma Natsani nakalukha ingowe. OMWAMI nachila omwana owomukhasi wa Uria yebul'la Daudi naba nobulwaye obukali.

¹⁶Kho Daudi yahomba Nyasaye mbu omwana abe omulamu; ma Daudi nasuula okhulia esiokhulia siosi siosi, ne yakona hasi mubwelu obutukhu bwosi.

¹⁷Abakhongo behango hahe batsia khuye nibateema okhumubuusia, nebutswa yasuula, kata siyaliakhwo n'nabo esiokhulia tawe.

¹⁸Khwitukhu liakhane nakhataru, omwana yamala afwe. Ne abakhongo behango ha Daudi baria okhumubool'la mbu omwana ufwiye; okhuba baboola mumioyo mbu, “Lola olwo omwana yabeye nasili omulamu khwatsiye okhul'loma n'naye, ne siyahuliye akefwe tawe. Kho nakhumubool'le mbwena mbu omwanawe umal'le okhufwa? Yetsukhila niyekhola obubi.”

¹⁹Olwa Daudi yalola abakhongo behangowe nibamonyananga, yamanya mbu omwana umal'le okhufwa. Kho Daudi nabareeba mbu, “Omwana akhafwiye noho?” Nabo nibaboola, “Ufwiye.”

²⁰Daudi yamala abuukhe okhurula hasi, niyesinga omubili, ma niyebiikha tsingubo tsindi. Ma natsia munyumba yo MWAMI okhwekayakaya. Olwa yakalukha hango hahe, yasaba esiokhulia ma naliakhwo.

²¹Abakhongo behango hahe nibamubool'la mbu, “Busina nokhola yaka? Wasuuye okhulia ma nolakaya amasika olwo omwana yabeye nasili mwoyo, nebutswa olwo omwana amal'le okhufwa wali okhubuukha na nochiaka okhulia ebiokhulia.”

²²Daudi nababool'la mbu, “Yee, tooto ndasuuye okhulia nindakaya amasika olwo omwana yabeye nasili mwoyo. Ndapaal'lenje mbu OMWAMI yetsukhila niyambeela tsimbabasi ma alekhe omwana abe omulamu.

²³Nebutswa luno umal'le okhufwa; kho busina monge inzala? Mbula ndakhakalusia obulamubwe noho? Ise nise owakhatsie aha ye ali nebutswa ye sanyala okhukalukha khu ise tawe.”

²⁴Ma Daudi nahotselesia omukhasiwe Batsisheba. Yamala abe n'naye ma Batsisheba niyebula omwana omusiani owa Daudi yakulikha eliira mbu Solomoni. OMWAMI yayanza omwana uyo,

²⁵ma kho yalaka omuroobi Natsani atsie okhukulikha omwana uyo Yedidaya[6] sichila OMWAMI yali okhumuyanza.

²⁶Ne Yoabu yatsilil'la okhuseera Rabba litookho lia Baamoni likali, ne yali nali ahembi okhulifumila.

²⁷Kho Yoabu yarumila Daudi abarume okhumubool'la mbu, “Mal'le okhuseera litookho lia Rabba khandi okhumeetakhwo mal'le okhufumila ebitaho biamaatsi kabwe.

²⁸Luno obunjikha halala abasikari baabo bandi bosi, oseere litookho ma olifumile. Sinyenya nyoole oluyali khulwo okhulifumila tawe.”

²⁹Kho Daudi yabunjelesia abasikaribe bosi, natsia Rabba naliseera ma nalileka.

³⁰Yabukula olusimbi lwomuruchi wabwe okhurula khumurwekwe; obusiro bwalwo bwali etsikilo amakhumi kataru natsirano ne mukari mwalwo lwalimwo nelichina liobukusi. Daudi yalubukula ma nalura khumurwekwe. Khandi yachinga ebindu ebinji ebia yali nayaakila okhurula mwitookho.

³¹Ma nakhola abandu ba Rabba okhukhola emilimo nibarumikhilanga emisimeno, amachembe kebibia, nende etsisoka tsiebibia ma nabahachia okhukhola emilimo chiokhulonga amatifwali. Khandi yakhol'la abandu bamataala ka Amoni kandi amatelwa yako. Ma ye nende abasikaribe nibakalukha Yerusalemu.